Levitikọs 27 - Edo Bible (E Baibol Ẹdo) Version 1996

Uhi Vbe Kpa Ọhẹ Ne A Zẹ Gie Nọyaẹnmwa

¹ E Nọyaẹnmwa keghi viọ uhi na ne Mosis,

² ne ọ viọ ne ivbi Izrẹl A deghẹ a ghi ya ọmwa fi ohan ne Nọyaẹnmwa nẹ, ne a miẹn ehe na mu eyan kpataki sẹ, ọmwa nii sẹtin rhan egbe ẹre vbe imu vbe ne ọ gha na hae avbe igho na.

^3-7 Zẹ vbe ive ne a fian yọ ne agbọn hia ye obọ yi: — okpia nọwanrẹn ne ọ rre ukpo ugie ya sẹ ukpo iyeha: esiliva ekigbe siyeha — okhuo Nọwanrẹn, esiliva ọgban — ọvbokhan okpia, ukpo isẹn yasẹ ikpugie: esiliva ugie — ọvbokhan okhuo: esiliva igbe — ọmọmọ ọmọ okpia nọ ma sẹ ukpo isẹn esiliva isẹn — ọmọmọ ọmọ okhuo, esiliva eha — okpia ne ọ gberra ukpo iyeha: esiliva ekesugie — ọmọ okhuo ne ọ gberra ukpo iyeha: esiliva igbe.

⁸ A deghẹ ọmwa nọ ve emwi nii ru ovbigue gbe ighẹ ẹ i sẹtin ha ive nii, a ghi rhie ọmwa nii bu ohẹn gha dee, ohẹn ghi fian ẹn sikẹ otọ zẹ vbene obọ ọmwa nii gha sẹ ọe ya hae.

⁹ A deghẹ emwi ne a ve nii ighẹ aranmwẹ ne ọ gie a ya zọ ese ghe Nọyaẹnmwa nọ, ẹghẹ nii, emwi hia ne a ya zẹ ọhẹ gie Nọyaẹnmwa ghi gha re ne ọ huanrẹn.

¹⁰ Wẹ ne ọmwa ne ọ ve emwi nii ghẹ ye aranmwẹ ọvbehe rọ ẹe, Ọ gha ru ẹe vberriọ, ọghe Nọyaẹnmwa ọ re aranmwẹ eveva nii ghi khin.

¹¹ Sokpan, deghẹ aranmwẹ ne awua ye ne ẹ i gie a ya zọ ese ghe Nọyaẹnmwa ọre ive nii khin, ọmwa nii ghi mu aranmwẹ nii gie ohẹn.

¹² Ohẹn ghi fian ive yọ zẹ vbene ọ maa sẹ, ra deghẹ ẹ i maa, ive ne ọ fian yọ ni gha re ọfo ẹre.

¹³ A deghẹ ọmwa nii wẹ rẹn ra dẹ ọe werriegbe, ọ ghi ha igho ne a fian yọ nii, ọ ghi vbe rrie a ghae ye ihe isẹn gbe ẹe.

¹⁴ Ọmwa gha ya owa ẹre fi ohan ne Nọyaẹnmwa, ohẹn ghi fian ive yọ zẹ vbene ọ maa sẹ, ra vbe ne ọ rhia sẹ, ive nii ọ gha re okiekie ẹre.

¹⁵ De ghẹ ọmwa ne ọ ya ẹe fi ohan ho ne ọ dẹ ọe werriegbe, ọ ghi ha a gha ye ihe isẹn ha inu igho ne ọ ka khin.

¹⁶ A deghẹ ọmwa ya obọ eso vbe otọ ne ọ mwẹ fi ohan ne Nọyaẹnmwa a ghi ghe inu emwi okọ ne a ya kọ emwi yọ fian ive yọ, vbene a gha na tie esiliva igbe ye izagodo ọkpa ọghe ọka.

¹⁷ A deghẹ vbe ada la ukpo Afanvbirri gberra ọre ọ na ya ẹe fi ohan, inu igho ne ọ rrọọ, te ọ wa gba.

¹⁸ A deghẹ ọ ye ẹghẹ eso gberra, ohẹn ghi roro ẹghẹ ne ọ ghi kẹe ọ te sẹ ukpo Afanvbirri ne ọ lele ẹe ya fian igho hin rre.

¹⁹ A deghẹ ọmwa ne ọ ya otọe nii fi ohan ho ne ọ dẹ ọe werriegbe, ọ ghi ha a ghae ye ihe isẹn ba igho ẹre.

²⁰ A deghẹ ọ khiẹn otọ nii ne ọmwa ọvbehe vbene irẹn ma na ka gu e Nọyaẹnmwa dẹ ọe werriegbe nẹ, ẹ i ghi mwẹ asẹ ne ọ ya dẹ ọe werriegbe.

²¹ Ọ gha ghi sẹ ukpo Afanvbirri ne ọ lele ẹe, otọe nii ghi khian ọghe Nọyaẹnmwa ẹdẹdẹmwẹdẹ, ọ ghi do gha re ọghe avbe ohẹn.

²² A deghẹ ọmwa ya otọe ne ọ dẹe fi ohan ne Nọyaẹnmwa,

²³ Ohẹn ghi roro inu ukpo ne ọ ghi kẹe a te sẹ ukpo Afanvbirri ne ọ lele ẹe ya fian ive yọ, ọmwa nii ghi wa ha osa ẹdẹ nii zẹẹ, ọghe Nọyaẹnmwa igho nii khin.

²⁴ Ọ gha ghi sẹ ukpo Afanvbirri ne ọ lele ẹe, ohẹn ghi mu otọ nii werriegbe ne ọmwa ne ọ ka yan rẹn ra avbe ivbi ẹre.

²⁵ Igho ne a gha tie ye ehia, ghi gha re vbene agbọn hia ye obọ yi.

²⁶ Ọmwa rhọkpa ghẹ ya ọmọ ọdiọn ọghe aranmwẹ zẹ ọhẹ akekhọerre ne Nọyaẹnmwa rhunmwuda, ọghe Nọyaẹnmwa ọre ka nọ yi. ovbi ẹmila ra ovbi ohuan ra ovbi ẹwe, ọghe Nọyaẹnmwa nọ.

²⁷ Sokpan emọ ọdiọn ọghe avbe aranmwẹ ni mwẹ awua, wa ghi gha ya igho ne a mwa yọ dẹ ọe werriegbe deba a ghae ye ihe isẹn. (Deghẹ a ma dẹ ọe werriegbe, a sẹtin khiẹn ọre igho ne a mwa yọ ne ọmwa ọvbehe.)

²⁸ Ọmwa rhọkpa ghẹ de emwi ne ọ ya fi ohan fo fẹẹrẹ ne Nọyaẹnmwa werriegbe, ọre ọmwa nọ ra aranmwẹ ra otọ. Ọghe Nọyaẹnmwa nọ ẹdẹdẹmwẹdẹ.

²⁹ A gha rhe wẹ ọmwa ne agbọn nọ, a na ya fi ohan fẹẹrẹ ne Nọyaẹnmwa, a i ghi dẹ ọe werriegbe, ta a gbe ẹe rua.

³⁰ A ghae ye ihe igbe ọghe emwi okọ hia, ọghe Nọyaẹnmwa nọ, ọ re ọka nọ ra avbe ọmọ erhan.

³¹ Ọmwa gha wẹ rẹn ra dẹ werriegbe vbọ, ọ ghi hae igho ne a tie yọ ba a ghae ye ihe isẹn.

³² Vbe uwu avbe emwirri igbe, ọkpa vbọ ghi gha re ọghe Nọyaẹnmwa. A gha ka avbe emwirri, ogigbe vbọ, ọghe Nọyaẹnmwa nọ.

³³ Tama ne ọ yan avbe emwirri nii ne ọ ghẹ mwamwaẹn vbene a gha na miẹn ighẹ ne ẹ i maa ne ọ rrọ ọre ọ ya gha do yọ, wẹ ne ọ ghẹ vbe ya ẹe rọ. A deghẹ ọ ye emwirri ọkpa rọ ọvbehe, Nọyaẹnmwa ọre ọ ghi yan eveva, a i dẹ ọe werriegbe.

³⁴ Ena ọrọre uhi ne Nọyaẹnmwa viọ ne Mosis vbe oke Sainai ne ọ viọ ne ivbi Izrẹl.