Levitikọs 23 - Edo Bible (E Baibol Ẹdo) Version 1996

Avbe Emwiukpo Ugamwẹ

¹ E Nọyaẹnmwa keghi mu ẹn ye otọ ne Mosis,

² ighẹ avbe emwamwa na ọ ghe avbe emwiukpo ugamwẹ ne emwa Izrẹl hia gha na si koko ne iran ru ugamwẹ.

³ Ikpẹdẹ ehan ọre uwa mwẹ ne uwa gha ya gha winna iwinna uwa, sokpan wa ghi yerre wẹ ẹdẹ ne ogihinrọn, ẹdẹ ikẹtin nọ. Vbe ẹdẹ nẹdẹrriọ, wa ghẹ winna, sokpan wa ghi si koko ne uwa ru ugamwẹ, Nọyaẹnmwa ọ re ọ yan ẹdẹ ikẹtin, ehe ne u rhirhi gha ye.

⁴ Wa ghi ya avbe emwiukpo na wewe vbe ẹghẹ ne a rhie yọ.

Alagberra Ke Ebrẹd Ne Ọ Ma Hue

⁵ Ovẹn gha dero nẹ vbe ikpẹdẹ ne ogiwenẹ ọ ghe uki ne okaro, ọre a na ru emwiukpo Alagberra ne a ya gowan e Nọyaẹnmwa.

⁶ Vbe ikpẹdẹ ekesugie vbo, emwiukpo Alagberra ghi suẹn, vbe ikpẹdẹ ihinrọn, wa ghẹ rri ebrẹd ne a ya eyist ru.

⁷ Vbe ikpẹdẹ ne okaro, wa ghi si koko ne uwa ru ugamwẹ, wa ghẹ vbe winna vbe iwinna ẹdẹgbegbe ọghe uwa.

⁸ Wa ghi ya emwi izẹọhẹ evbare ọwua gie Nọyaẹnmwa la ikpẹdẹ ihinrọn, vbe ikpẹdẹ ne ogihinrọn, wa ghi dọlegbe si egbe koko ne uwa ru ugamwẹ, wa ghẹ winna iwinna ẹdẹ uwa rhọkpa.

^9-10 Wa gha sẹ otọ nii ne Nọyaẹnmwa ra mu ne uwa, wa na ghi rhọ ọka uwa, wa ghi mu ikun ne okaro gie ohẹn.

¹¹ Rẹn ghi mu ẹẹn gie Nọyaẹnmwa zẹ vbe ihako kpataki, ne a miẹn ehe na rhan obọ miẹn ruẹn. Ohẹn ghi ya ẹe zẹ ọhẹ vbe ẹdẹ nọ ọ lele ẹdẹ ikẹtin.

¹² Vbe ẹdẹ ne uwa gha ru izẹọhẹ ọka, wa ghi vbe gbe ogho ukpo ọkpa ne ẹ i mwẹ okan, zẹ vbe izọese nẹ a giẹn uan.

¹³ Wa ghi vbe viọ uwan enẹ ọghe irhuarhua ne a ya ofigbọn ọliv gbe gha de do ya ẹe zẹ ọhẹ evbare. Uwinhinmwẹ izẹọhẹ vberriọ wa yẹ e Nọyaẹnmwa. Wa ghi mu ọgọ ayọn ọkpa lele ẹe rre.

¹⁴ Wa ghẹ rri ọka orhọ nii ọghọgbọn, na tọẹn ra ne a ya ẹe ru ebrẹd vbe ẹ i re te uwa ka zẹ ọhẹ ọghe emwiokọ ọka ne okaro gie Osanobua nẹ. Wa ghi wẹ ne ivbi uwa gha ya emwamwa na ru emwi ẹdẹdẹmwẹdẹ.

Emwiorhọ

¹⁵ Wa ghi ka uzọla ihinrọn gbalaka ke ikpẹdẹ ne ọ lele Ẹdẹ ikẹtin ne uwa na viọ ikun ọka uwa gha de do ya zẹ ọhẹ ne Nọyaẹnmwa.

¹⁶ Vbe ikpẹdẹ ne ọ re ne ukpogie ekigbe siyeha, ẹdẹ ne ọ lele Ẹdẹ ikẹtin nogihinrọn, wa ghi dọlegbe ya ọka zẹ ọhẹ gie Nọyaẹnmwa.

¹⁷ Dọmwadẹ ẹgbẹe ghi viọ ebrẹd eva rre, a ghi viọ ne Nọyaẹnmwa zẹ vbe izẹọhẹ kpataki ebrẹd ọkpọkpa ghi gha re ne a ya uwan enẹ ọghe ọka irhuarhua kevbe eyist ru a ghi vbe mu ẹẹn gie Nọyaẹnmwa zẹ vbe ihaoko ọghe akọrhọre ne okaro.

¹⁸ Emwa nii ghi viọ ogho ihinrọn ni he rre ukpo ọkpa kevbe ẹkhuia ẹmila kevbe ẹwe eva, ehia ghi gha re ne ẹ i mwẹ okan, a ghi viọ ẹre lele ebrẹd nii gha dee. A ghi ya ẹe zẹ ọhẹ ese na giẹn uan gie Nọyaẹnmwa kevbe izẹọhẹ ọghe ọka ọghe ayọn. Uwinhinmwẹ izẹọhẹ na wa yẹ e Nọyaẹnmwa.

¹⁹ Wa ghi ya ovbukhọ ọkpa zọ ese orukhọ kevbe ogho ukpo eva, wa ghi vbe sisara.

²⁰ Ohẹn ghi viọ ivbiohuan eva nii, kevbe ebrẹd nii, gie Nọyaẹnmwa ne avbe ohẹn zẹ vbe emwi izẹọhẹ kpataki. Emwi izẹọhẹ na, ni huanrẹn nọ.

²¹ Vbe ẹdẹ ne ẹdẹrriọ wa ghẹ winna iwinna obọ rua rhọkpa, sokpan wa ghi si koko ne uwa ru ugamwẹ. Ivbi uniẹn ruan ghi gha lele ilele na ẹdẹdẹmwẹdẹ vbe ehe ne iran a rhirhi gha ye.

²² Wa gha rhọ emwi okọ ne ugbo rua, wa ghẹ wa rhọ ẹre sẹ ọkhioha, ra ne uwa vbe werriegbe ya gbe ẹre ọrriẹ, wa sẹ enii rae ne ivbiogue kevbe avbe orhunmwuyẹn. E Nọyaẹnmwa ọrọre Osanobua rua.

Emwiukpo Ukpo Ọgbọn

^23-24 Vbe ikpẹdẹ ne okaro ọghe uki nogihinrọn, wa ghi zọe kọ, zẹ vbe ẹdẹ ikẹtin kpataki. Wa ghi si koko ye ugamwẹ vbe a ghi kpe ẹkperẹ nẹ.

²⁵ Wa ghẹ winna iwinna obọ uwa, wa ghi zẹ ọhẹ evbare gie Nọyaẹnmwa.

Ẹdẹ Akpehuan

^26-27 Ikpẹdẹ ne ogigbe ọghe uki nogihinrọn ọrọre ẹdẹ ne a ya zọ ese ne a ya kpe orukhọ emwa hia huan. Vbe ẹdẹ ne ẹdẹrriọ, wa ghẹ rri evbare rhọkpa, wa ghi si koko ye ugamwẹ, ne uwa vbe zẹ ọhẹ evbare gie Nọyaẹnmwa.

²⁸ Wa ghẹ winna ẹdẹ nẹdẹrriọ, rhunmwuda ẹdẹ nẹdẹrriọ ọre a ru iruemwi ne a ya kpe orukhọ hin rre.

²⁹ Ọmwaikọmwa ne ọ rrie evbare ẹdẹ nẹdẹrriọ, a i ghi ka ẹe ba emwa Nọyaẹnmwa ọvbehe.

³⁰ Ọmwaikọmwa gha winna ẹdẹ nẹdẹrriọ, Nọyaẹnmwa tobọ ẹre ọ re ọ ra gbe ẹe rua.

³¹ Emwamwa na, te ọ wa dekan uniẹn ivbi uwa hia, ehe ne ọ khọn ọnrẹn ne iran gha ye.

³² Ke ẹghẹ ne ovẹn ya dero vbe ikpẹdẹ ne ogihinrin yasẹ ẹghẹ ne ọ ya dero vbe ikpẹdẹ ne ogigbe wa ghi da ẹdẹ nii yi zẹ vbe ẹdẹ kpataki ne a ya kẹtin, vbe ẹghẹ na, wa ghẹ rri evbare rhọkpa.

Emwiukpo Irhu

^33-34 Emwiukpo Irhu ghi suẹn vbe ikpẹdẹ ekesugie ọghe uki nogihinrọn, ọ ghi ya ikpẹdẹ ihinrọn vbe otọ,

³⁵ vbe ikpẹdẹ ne okaro, wa ghi si koko ne uwa ru ugamwẹ, wa ghẹ winna iwinna ẹdẹ rua rhọkpa.

³⁶ Ẹdẹgbegbe vbe uwu ikpẹdẹ ihinrọn nii wa ghi ru izẹọhẹ evbare. Vbe ikpẹdẹ ne ogierẹnrẹn, wa ghi vbe dọlegbe si egbe koko ne uwa ru ugamwẹ, wa ghi vbe ru izẹ ọhẹ evbare. Ẹdẹ ugamwẹ nọ, wa ghẹ winna iwinna rhọkpa.

³⁷ (Ena ọrọre emwiukpo ugamwẹ ne uwa gha ya gha rhie ọghọ ne Nọyaẹnmwa vbe ne uwa gha na gha si koko vbe ugamwẹ kevbe ne uwa vbe gha zẹ ọhẹ evbare, ese na giẹn uan izẹọhẹ ọka, ese na zọ kevbe izẹọhẹ ọghe ayọn, zẹ vbe ne a ho ẹre yi ke ẹdẹ dina ẹdẹ.

³⁸ Avbe emwiukpo, te avbe viọre ba ọghe Ẹdẹ ikẹtin, avbe izẹọhẹ keghi vbe re ne a viọ ba izẹ ọhẹ uwa ne a ka ru dee yi, izẹọhẹ ne uwa ya mu eyan sẹ, kevbe izẹ ọhẹ ne ọ ke ekhọe rre ne uwa rhie gie Nọyaẹnmwa.)

³⁹ Vbe ikpẹdẹ ekesugie ọghe uki nogihinrọn, vbe uwa a ghi rhọ emwiokọ ugbo rua nẹ, wa ghi ru emwiukpo na la ikpẹdẹ ihinrọn. Ikpẹdẹ ne okaro ghi gha re ne a ya hẹwẹ kpataki.

⁴⁰ Vbe ẹdẹ nẹdẹrriọ, wa ghi hannọ emwi okọ ne ọ maa sẹ vbe ọmọ erhan uwa, wa ghi viọ ewanmwẹ kevbe abọ erhan ni mwẹ ebe ẹsẹse, na uwa suẹn ugamwẹ emwi okọ ne uwa ya ya ọghọ ne Nọyaẹnmwa Osanobua rua.

⁴¹ Wa ghi titi ẹe la ikpẹdẹ ihinrọn. Wa ghi tama avbe ivbi uwa ne iran gha ru emwiukpo na rhinrin ẹdẹdẹmwẹdẹ.

⁴² Ivbi Izrẹl hia ghi di uwu irhu ne a gbe ya la ikpẹdẹ ihinrọn.

⁴³ Ne avbe ivbi uwa miẹn ehe na rẹn wẹẹ Nọyaẹnmwa ya ivbi Izrẹl di irhu ne a gbe ya vbe ẹghẹ ne ọ na viọ iran ke otọ Igipt ladian. Rẹn ọrọre Nọyaẹnmwa Osanobua rua.

⁴⁴ Ọ re a na miẹn wẹẹ odẹ vbe nian ọre Mosis ya ma ivbi Izrẹl ilele ọghe vbene a gha ya gha ru ugamwẹ emwiukpo ne a ya ya ọghọ ne Nọyaẹnmwa.