Jọsua 6 - Edo Bible (E Baibol Ẹdo) Version 1996

Udemwẹ E Jẹriko

¹ A keghi wa kakabọ khui urho e Jẹriko a na vbe gha khẹ ọre ne ọ ghẹ gie ivbi Izrẹl lao. Ọmwa rhọkpa i sẹtin la uwu Jẹriko ra ne ọmwa rhọkpa vbe ladian vbọ.

² E Nọyaẹnmwa keghi tama e Jọsua wẹẹ, “Danmwehọ, te I ra mu e Jẹriko nuẹn ke ẹe kevbe ọba ẹre kevbe ivbiyokuo ẹre ni wegbe.

³ Ke uwẹ kevbe ivbiyokuo ruẹ, wa ya ikpẹdẹ ehan khian lẹga e Jẹriko uhukpa vbe ẹdẹ.

⁴ Avbe ohẹn ihinrọn ne ọkpọkpa vbọ mu orhu mwẹ obọ, ghi ke odaro ne Ẹkpẹti Ile ọghe Nọyaẹnmwa. Vbe ikpẹdẹ ne ogihinrọn ke uwa kevbe ivbiyokuo ruẹ ghi khian lẹga ẹvbo nii igba ihinrọn, avbe ohẹn ghi gha si orhu nii khian.

⁵ “Ẹghẹ nii, iran ghi si ẹe uhukpa ne ọ kpẹe vbe otọ. Wa gha wa họn ọnii, emwa nii hia ghi wa davan, ekẹn ne a gbe lẹga ẹvbo nii gha wa de wiẹghẹ ye otọ. Dọmwadẹ ọghọe ghi wa khian ghe odaro la ore ẹvbo nii.”

⁶ Ẹre Jọsua na tie avbe ohẹn, ọ keghi tama iran wẹẹ, “Wa mu Ẹkpẹti Ile nii, wa ihinrọn ke odaro ne ẹẹn wa ghi viọ orhu mwẹ. Avbe ivbiyokuo ghi ke odaro ne uwa.”

⁷ Ọ kevbe tama avbe emwa ni wẹẹ, “Wa si okhian. Wa khian lẹga ẹvbo nii vbene avbe ivbi iyokuo na ke odaro ne Ẹkpẹti Ile ọghe Nọyaẹnmwa.”

^8-9 Vbe ọwarọkpa vbe Jọsua ghi guan nẹ, avbe ohẹn ihinrọn ni keghi ke odaro ne Ẹkpẹti Ile ọghe Nọyaẹnmwa, iran na ghi si orhu nii. Avbe ivbiyokuo keghi ke odaro ne avbe ohẹn ni si orhu nii, iran ni ke odieke kegha lele enii dee. Orhu nii keghi wa gha tu yan egbe khian.

¹⁰ Sokpan, e Jọsua keghi tama emwa nii wẹ ne iran ghẹ kpe orhu rhọkpa, ne iran ghẹ talọ hiehiere, rhinrin rẹn te do tama iran.

¹¹ Ọ keghi gia avbe ohẹn ke Ẹkpẹti Ile ọghe Nọyaẹnmwa lẹga ẹvbo ni uhukpa. Iran keghi werriegbe gha die agọ iran na do gbe asọn nii vbe evba.

^12-13 Vbe ikpẹdẹ ne ọ lelẹe, e Jọsua keghi kpaegbe vbe owiẹ vbirrivbirri, avbe ohẹn kevbe tọn Ẹkpẹti Ile mu. Avbe ohẹn ni ihinrọn ni viọ orhu mwẹ keghi ke odaro, iran na gha si avbe orhu nii khian. Avbe ivbiyokuo ke odaro ne iran, vbene avbe abodẹ na ke odieke. Orhu ni kegha tu yan egbe khian.

¹⁴ Erriọ nọ zẹẹ, vbe ikpẹdẹ ne ogieva, iran keghi vbe khian lẹga ẹvbo nii uhukpa. Iran na dọlegbe gha die agọ. Iran keghi ru ọna la ikpẹdẹ ehan.

¹⁵ Vbe ikpẹdẹ ne ogihinrọn, iran keghi kpaegbe vbe ẹdẹ wa da gbe, iran keghi khian lẹga ẹvbo ni igba ihinrọn vbene iran ka ruẹe de yi ẹdẹrriọ ọkpa kẹkan ọ re iran khian lẹga ẹre igba ihinrọn.

¹⁶ Iran ghi khian lẹga vbe ne ukpo-gihinrọn, avbe ohẹn ghi si orhu ni nẹ, e Jọsua keghi tama emwa ni wẹẹ, “Wa davan, e Nọyaẹnmwa mu ẹvbo na ne uwa nẹ.

¹⁷ Ẹvbo na kevbe emwi hia ni rre uwu ẹre, a yae fi ohan nẹ ne a fuẹn ọnrẹn uan zẹ vbe emwi ne a ya zọ ese ghe Nọyaẹnmwa. E Rehab ne ebabotu kevbe emwa owa ẹre ọkpa, ọre a ra sẹrae rhunmwuda, ọ keghi viọ emwa ne ima gie ẹre uhunmwu lẹre.

¹⁸ Sokpan zẹ vbene ọ de kan uwa na, wa ghi gban egbe ne avbe emwi ne a fuẹn uan, wa gha rhie vbe emwi ne a ta nẹ wẹ ne a fuẹn uan, te uwa ra mu ọlọghọmwa kevbe ọfuan la agọ ivbi Izrẹl.

¹⁹ Sokpan avbe emwikemwi ne a ya esiliva ra igoru ra oze ra ematọn ru, te a ra viọ iran ye efẹn ọkpa ne Nọyaẹnmwa. Te a ra viọ iran ye uwu aza e Nọyaẹnmwa.”

²⁰ Ẹre avbe ohẹn na si orhu, ọwarọkpa vbe avbe emwa nii ghi wa họn ẹẹn, iran keghi kakabọ davan, ekẹn keghi de wiẹghẹ ua. Avbe emwa nii keghi wa rhulẹ la ore ẹvbo nii, iran na khọn rẹn muotọ.

²¹ Iran keghi ya umozo iran gbele emwa hia ni rre ẹvbo nii uan ikpia kevbe ikhuo, ọmaẹn kevbe ẹghele. Iran keghi vbe gbele avbe ẹmila, avbe ohuan kevbe avbe ekẹtẹkẹtẹ.

²² E Jọsua keghi tama avbe ikpia eva ni ya ru ọrhẹ nii wẹẹ, “Wa gha rrie owa ebabotu nii, wa ya viọ irẹn kevbe emwa owa ẹre ladian, zẹ vbene uwa yan ma rẹn.”

²³ Ẹre iran na gha khian ya rhie Rehab ladian, kevbe erhae, iye ẹe, etiọnrẹn ne ikpia kevbe emwa ẹgbẹe ọre ni dekẹe. Iran keghi viọ iran kevbe avbe eviẹn iran, ye vbe a gha lahin agọ ivbi Izrẹl rre nẹ.

²⁴ Iyeke ọnii, iran na mu erhẹn ye ẹvbo nii, iran keghi giẹn ọnrẹn uan ke ẹe kevbe emwi ni rrọọ hia sokpan amawẹ avbe emwi nii ne a ya igoru, esiliva, oze kevbe ematọn ru, iran na viọ enii ya hẹ ye uwu aza e Nọyaẹnmwa.

²⁵ Sokpan e Jọsua keghi sẹ Rehab rae ke ẹe kevbe etiọnrẹn hia rhunmwuda rẹn ọ re ọ viọ avbe emwa ne a gie ẹre uhunmwu ya baba otọ Jẹriko ghe lẹre. (Ivbi iran ye rre Izrẹl do sẹ ẹdẹnẹrẹ na.)

²⁶ Vbe ẹghẹ na, e Jọsua keghi wa yan tama iran wẹẹ: “Ọmwaikọmwa ne ọ gha ye wẹ ne irẹn dọlegbe họ ẹvbo na, ihẹn ọghe Nọyaẹnmwa gha rre ọre uhunmwu. “Ọmwa ne ọ gbe ẹyotọ ẹre, ovbi ẹre ne okpia ne ọdiọn gha wu ẹe ọmwa ne ọ bọ onurho ẹre, ovbi ẹre ne okpia ne ọ kotọ gha wu ẹe.”

²⁷ Erriọ, e Nọyaẹnmwa na yaba e Jọsua, otiti ẹre keghi gba ẹvbo nii hia.