Jọsua 5 - Edo Bible (E Baibol Ẹdo) Version 1996

¹ Avbe ọba Amọri hia ni rre ọlarrie owẹn Jọdan kevbe avbe ọba Kenan ni lele ọkpẹn Okun Meditẹrrenian hia keghi họn wẹ te Nọyaẹnmwa si amẹ Jọdan ka ne ivbi Izrẹl la gberra. Ohan keghi mu iran, egbe na wọ iran rhunmwuda ivbi Izrẹl.

Arhuẹ Vbe Giliad

² Ẹre Nọyaẹnmwa na tama e Jọsua wẹẹ, “Ya okuta nọ wegbe ru abẹe ne u ya rhuẹ ivbi Izrẹl.”

³ Ẹre Jọsua na gele ru abẹe, ọ na rhuẹ iran vbe Oke Arhuẹ.

⁴ Emwi ne ọ yae ru ọna ọrọre wẹ avbe emwa hia ni sẹe ni yo okuo vbe iran kpao vbe Igipt wulo fo nẹ vbe uwu ato vbe odẹ.

⁵ A gha rhe miẹn wẹ te a rhuẹ ikpia hia ni kpao vbe Igipt rre, emwa hia ne a biẹlẹe vbe ẹghẹ ne a na gha fian ato rra, ne a rhuẹre ẹ i rrọọ.

⁶ Ukpo iyeva ọre ivbi Izrẹl ya gha fian ato rra. Vbe ẹghẹ na, avbe ikpia ni sẹe ni yo okuo, ni kpao vbe Igipt rre, wulo nẹ rhunmwuda, iran ma họn ẹmwẹ e Nọyaẹnmwa. Ọ keghi tama iran wẹ rẹn i gie iran sẹ otọe esiesi ne ọ maa emwiokọ nii ne irẹn ve avbe erha iran odede re wẹ rẹn gha mu ne ima.

⁷ Sokpan ivbi iran ne ikpia ni rhie ihe iran, a ma he rhuẹ iran vbe ẹghẹ ne iran na gha la ato khian. Orre ọgbọn na ọ re Jọsua rhuẹre.

⁸ Iran ghi rhuẹ iran fo nẹ, agbọn ẹvbo ni hia kegha rre agọ rhinrin ewẹn ọnrẹn te do rrie.

⁹ Ẹre Nọyaẹnmwa na tama Jọsua wẹẹ, “Vbe ẹdẹnẹrẹ na. ukpọn efaa ọghe ne uwa na gha re eviẹn vbe Igipt, I ban ẹn uwa ẹre mu fua nẹ.” Ọnii ọ si ẹe ne a na gha tie evba nii Gilgal zẹ vbene a ye tie ẹre ẹdẹnẹrẹ na.

¹⁰ Ẹghẹ ne ivbi Izrẹl na gha rre agọ vbe Gilgal, vbe otọe ne ọ rriẹe ne ọ rre ọkpẹn e Jẹriko, iran keghi ru emwiukpo Alagberra vbe ota ọghe ikpẹdẹ ne ogiwenẹ ọghe uki nii.

¹¹ Vbe ikpẹdẹ ne ọ wa lelẹe dandaandan, iran keghi rri evbare ne a rhọ re vbe otọe Kenan, ọka ne a tọẹn kevbe ebrẹd ne a le vbe ne a ma na rhie eyist yọọ.

¹² Vbe iyeke ọnii, emana keghi dobọyi, ọ ma ghi dele rre. ivbi Izrẹl ma ghi vbe miẹn. Iran keghi suẹn vbe ukpo nii gha rri evbare ne a rhọre vbe otọe Kenan.

E Jọsua Ke Okpia Ne Ọ Mu Umozo Mwẹ

¹³ E Jọsua ghi rre ọkpẹn Jẹriko, vbe udomwurri, ọ keghi bẹghe okpia ọkpa ne ọ mu umozo mwẹ vbe ọ mudia ye odaro irẹn. E Jọsua keghi bu ẹre gha khian, ọ nọ rẹn wẹẹ, “Ọkpa vbe uwu ivbiyokuo ọghe ima ọ re uwẹ khin ra oghian?”

¹⁴ Okpia ni keghi wanniẹn wẹẹ, “Ẹ i mwẹ ne I khin vbọ. Te ima rre emwa na zẹ vbe ọkaokuo ivbiyokuo e Nọyaẹnmwa.” E Jọsua keghi ghughẹrre ya ọghọ ne ẹẹn, ọ keghi kha wẹẹ, “Te imẹ rre emwa ne u gha gie mwẹ uhunmwu enọwanrẹn, de emwi ne u ho ne I ru?”

¹⁵ Ọ re ọkaokuo ivbiyokuo e Nọyaẹnmwa nii na tama rẹn wẹẹ, “Viọ ibata ruẹ hin owẹ rre ighẹ otọe ne ọ huanrẹn ọ re u mudia yan na.” E Jọsua keghi ru vbene a tama rẹn.