Jọsua 4 - Edo Bible (E Baibol Ẹdo) Version 1996

A Mwamwa Okuta Ayere Ye Evba

¹ Emwa nii hia ghi la Jọdan gberra nẹ, e Nọyaẹnmwa keghi tama Jọsua wẹẹ,

² “Zẹ ikpia iweva, orhiọn ọkpọkpa vbe dọmwadẹ ẹwae ne,

³ u ghi tama iran wẹẹ wa viọ okuta iweva ke adesẹneva Jọdan ladian, vbe ehe ne avbe ohẹn mudia yi dandaandan, wa viọ iran mwẹ obọ gha khian, ne uwa viọ iran ye otọ vbe ehe ne uwa gha bu agọ yi asọn nẹrẹ.”

⁴ Ẹre Jọsua na tie ikpia iweva ne ọ zẹe.

⁵ Ọ keghi tama iran wẹẹ, “Wa la uwu Jọdan, ke odaro ne Ẹkpẹti Ile ọghe Nọyaẹnmwa Osanobua rua, ọkpọkpa vbe uwu uwa ghi mu okuta yan izabọ ọkpọkpa ọghe ẹwae iweva ni rre Izrẹl.

⁶ Avbe okuta na ọ re ọ gha ye avbe emwa nii emwi ne Nọyaẹnmwa ru rre. Avbe ivbi uwa gha nọ vbe ẹghẹ ne ọ dee, emwi ne a ya avbe okuta na kha.

⁷ Wa ghi tama iran wẹ ẹghẹ ne Ẹkpẹti Ile ọghe Nọyaẹnmwa na fian Ẹzẹ Jọdan rra, amẹ ọnrẹn keghi dobọ ulẹmwẹ yi. Avbe okuta na ghi gha re ama ayere ne ivbi Izrẹl ẹdẹdẹmwẹdẹ.”

⁸ Emwa nii keghi ru vbene Jọsua khare. Iran keghi viọ okuta iweva vbe adesẹ Jọdan zẹ vbene Nọyaẹnmwa tama iran, ọkpọkpa ne ẹwae ọkpọkpa vbe Izrẹl, iran keghi viọ iran gha rrie ehe ne iran bu agọ yi vbe oke, iran na viọ iran ye otọ vbe evba.

⁹ E Jọsua kevbe mwamwa okuta iweva ye adesẹ Jọdan ehe ne avbe ohẹn ni mu Ẹkpẹti Ile Nọyaẹnmwa mudia yi (avbe okuta na ye rre evba.)

¹⁰ Avbe ohẹn keghi mudia ye adesẹneva Jọdan a te do miẹn wẹ a ru emwi hia ne Nọyaẹnmwa tama e Jọsua wẹ ne ọ tama iran ne iran ru. Erriọ e Mosis tae. Emwa nii ke zẹgiẹgiẹ fian e Jọdan rra.

¹¹ Ugbẹn vbe iran ghi fian ẹẹn rra nẹ, Ẹkpẹti Ile Nọyaẹnmwa kevbe avbe ohẹn keghi ke odaro ne emwa nii.

¹² Emwa ẹwae Riubẹn kevbe Gad kevbe a gha wa ẹwae Manasẹ ye ihe eva, keghi mu egbe ne a gha ya khọn okuo zẹ vbene Mosis tama iran.

¹³ Vbene e Nọyaẹnmwa na gha ghe iran, arhunmwu arriaisẹn iyeva (40,000) ni mu egbe okuo, keghi fian ẹẹn gberra la otọe ne ọ rriẹe vbe ọkpẹn Jẹriko.

¹⁴ Emwi ne Nọyaẹnmwa ru ẹdẹrriọ keghi ya ivbi Izrẹl gha rhie ọghọ ne Jọsua zẹ vbe okpọmwa. Iran kegha ya ọghọ ne ẹẹn vbe ẹdẹ agbọn rẹn hia, zẹ vbene iran vbe gha ya ọghọ ne Mosis.

¹⁵ Ẹre Nọyaẹnmwa na tama e Jọsua wẹẹ,

¹⁶ “Tama avbe ohẹn ni mu Ẹkpẹti He ne iran lahin uwu Jọdan rre.”

¹⁷ E Jọsua keghi ru vberriọ.

¹⁸ Ugbẹn vbe avbe ohẹn ghi sẹ otọe Kenan nẹ, ẹzẹ nii ke dọlegbe gha lẹẹ, ọ keghi dọlegbe ro sẹ oke ẹre.

¹⁹ Ikpẹdẹ ne ogigbe vbe uki ne ogienẹ, ne ọ re uki ne okaro, ọre emwa ni na fian Jọdan rra, iran keghi gbe agọ ye Gilgal vbe olarre owẹn Jẹriko.

²⁰ Evba nii ọ re Jọsua mwamwa okuta iweva ne iran viọ vbe Jọdan yi.

²¹ Rẹn keghi tama ivbi Izrẹl wẹẹ, “Emọ gha nọ evbibiẹ iran ẹdẹ ne ọ dee wẹẹ vbe ena khin okuta yi?

²² Wa ghi ma iran ẹre wẹ te ivbi Izrẹl ya owẹ fian ẹzẹ Jọdan rra vbe otọ ne ọ kae.

²³ “E Nọyaẹnmwa Osanobua uwa keghi si amẹ Jọdan ka ne uwa rhinrin wa te do fian ẹẹn rra, zẹ vbene ọ vbe si amẹ Okun Nọ Baa ka ne ima vbe ima te fian ẹẹn rra.

²⁴ Rhunmwuda ọnọna, emwa hia ni rre agbọn na gha rẹn ẹtin ọghe Nọyaẹnmwa, wa ghi vbe gha ya ọghọ ne Nọyaẹnmwa Osanobua uwa ẹdẹdẹmwẹdẹ.”