Jọsua 18 - Edo Bible (E Baibol Ẹdo) Version 1996

Ughaemwẹ Otọe Ni Ghi Dekẹe

¹ Iran ghi khọn otọe ni nẹ, ivbi Izrẹl hia ke do si koko vbe Siailo, iran na mu Owa Ukpọn e Nọyaẹnmwa ye evba.

² Ọ keghi ye ke ẹe ẹwae ihinrọn ne a ma he mu otọe na vbe ivbi Izrẹl.

³ Ẹre Jọsua na tama ivbi Izrẹl wẹẹ, “Vbe uwa khian kpẹe sẹ hẹ yi wa ke ya mu otọe ne Nọyaẹnmwa ne Osanobua erha uwa odede mu ne uwa?

⁴ Wa zẹ arhin eha ke ẹwae ọkpọkpa gun mwẹ. I gha wẹ ne iran ya lele otọe ni hia gaa ne iran vbe gbẹnnẹ ebe ya gie ẹre ighẹ egbe emwi ne iran gha ho ne iran gha mwẹ vbe ọghe iran, ne iran bu mwẹ gha dee.

⁵ “Iran ghi ghae otọe nii ye ihe ihinrọn, e Juda ghi gha rre otọe ẹre vbe odẹ ekẹn, e Josẹf ghi vbe gha rre otọ ẹre vbe odẹ okuọ.

⁶ Wa ghi gbẹnnẹ ebe ya gie vbene otọe ihinrọn nii ye hẹ ne uwa mu bu mwẹ gha dee. I gha do yan uta nọ e Nọyaẹnmwa Osanobua uwa ne uwa.

⁷ Avbe e Livai i ra gu uwa nekpa gha otọe, rhunmwuda ne ọ kan iran ọrọre ne iran gha ga zẹ vbe avbe ohẹn ọghe Nọyaẹnmwa. Avbe ẹwae ọghe Gad, Riubẹn kevbe obọkpa vbe ẹwae Manasẹ mu otọ ọghe iran nẹ vbe odẹ ahọ ọghe Jọdan, otọe nii ne Mosis ne ọguọmwadia e Nọyaẹnmwa mu ne iran.”

⁸ E Jọsua ghi ru igiodẹ ne iran nẹ vbenian wẹẹ, “Wa lele otọe ni hia gaa, ne uwa gbẹnnẹ ebe ya gie ẹre, ne uwa dọlegbe bu mwẹ gha dee, I gha ya uta nọ e Nọyaẹnmwa ne uwa vbe Siailo vbe emwa na.” Emwa ni kegha khian ya gbẹnnẹ ebe ya gie vbene otọe nii ye hẹ.

⁹ Emwa nii ke lele otọe nii hia, iran gbẹnnẹ ebe ya gie ẹre vbene ọ ye hẹ. Iran keghi ghae otọe nii ye ihe ihinrọn, iran keghi vbe gbẹnnẹ eni ẹvbo ni rrọọ ladian. Iran keghi dọlegbe bu e Jọsua gha rrie agọ vbe Siailo.

¹⁰ E Jọsua keghi yan uta nọ e Nọyaẹnmwa ne iran, ọ na mu ihe eso vbe otọe nii ne dọmwadẹ ọghọe vbe ivbi Izrẹl.

Otọe Ne A Mu Ne Bẹnjamin

¹¹ Avbe ẹgbẹe ọghe ẹwae Bẹnjamin ọ re a ka gha mu otọe na, a keghi mu otọe ne iran vbe ẹkpo avbe ẹwae ọghe Juda kevbe Jọsua.

¹² Ehe ne otọe iran lae vbe odẹ okuọ kegha re Jọdan, ọ keghi laghe odukhunmwu vbe iya odẹ okuọ ọghe Jẹriko, odẹ orrie, ọ keghi la ghe ẹvbo oke ni ya sẹ ato ọghe Betavin.

¹³ Ehe ne ọ lae kevbe laghe odẹ ekẹn ghe ẹvbo Luz, ghe iya Luz (ne avbe tie ẹre Bẹtẹl) ọ na ghi vbe la ghe ototọ ya sẹ Atarọt Ada ne ọ rre uhunmwu oke vbe odẹ ekẹn ọghe Bẹt-horọn ne ọ ke ototọ.

¹⁴ Ọ kevbe ya la ehe ọvbehe, ọ na laghe odẹ ekẹn kevbe odẹ orrie ọghe oke na, kpao vbe odẹ ekẹn ọghe Bẹt-horọn, ọ na vbe laghe odẹ ẹvbo kirriat Bal (ra kirriat Jearim) ne ọ re ọghe ẹwae Juda ehe ne ọ lae vbe odẹ orrie ọ re ọnii khin.

¹⁵ Ehe ne ọ lae vbe odẹ ekẹn keghi suẹn vbe kirriat Jearim, ọ na ke evba gha rrie Ovbi Ẹzẹ Nẹftoa.

¹⁶ Ọ na ghi ke evba gha rrie ọkpẹn oke ne a ke ghe Iya e Hinọm vbe odẹ ufomwẹ ne ọ muda okuọ ọghe iya Refeim. Ọ keghi lele Iya Hinọm la gha odẹ ekẹn, vbe odẹ ekẹn ọghe iya Jebus vbe odẹ Ẹnrogẹl.

¹⁷ Ọ keghi vbe la ghe odẹ ekẹn ghe Ẹnsiemẹs, vbe la ghe Gelilot ne ọ mu aro da Adumim Pas. Uwu keghi la odẹ Okuta Bohan (Bohan ogha re ovbi Riubẹn).

¹⁸ Ọ keghi ya la odẹ okuọ ọghe Iya Jọdan, ọ na ghi gha rrie uwu iya.

¹⁹ Ọ keghi ya la odẹ okuọ ọghe iya Bẹt Hogla, ọ na ya khui uhunmwu ye ovbi ẹzẹ ne ọ lẹ la Okun Nọwu vbe odẹ okuọ vbe ehe ne Jọdan la lẹ larọ vbe obọ ekẹn. Ọnii ọ ghi re ehe ne uwu lae vbe odẹ ekẹn.

²⁰ E Jọdan ọ re ọ gha re uwu vbe odẹ ahọ. Ena ọ re ọ gha re uwu ne ọ sẹ avbe ẹgbẹe ni rre ẹwae Bẹnjamin obọ ne ọ gha re ọghe iran.

²¹ Avbe okpẹvbo ni gha re ọghe avbe ẹgbẹe ni rre ẹwae Bẹnjamin ke gha re Jẹriko Bẹt Hogla, Emẹk Keziz,

²² Bẹt Araba, Zemareim, Bẹtẹl,

²³ Avim, Para, Ọfra,

²⁴ Kiefaramoni, Ofni, kevbe Geba, okpẹvbo iweva deba avbe ẹvbo ni kọnkọn ni rrọọ.

²⁵ Ena ke ye vbe rrọọ, Gibiọn, Rama, Biẹrot,

²⁶ Mispa, Kiefira, Moza,

²⁷ Rekẹm, Iapil, Tarala.

²⁸ Zẹla, Haelẹf, Jebus (ra Jerusalẹm) Gibea, kevbe kirriat Jearim; okpẹvbo iwenẹ deba ẹvbo ni kọnkọn ni rrọọ. Ena ọrọre otọ ni sẹ ẹgbẹe ni rre ẹwae Bẹnjamin obọ ne ọ gha re ọghe iran.