Jọsua 15 - Edo Bible (E Baibol Ẹdo) Version 1996

Otọe Ne A Mu Ne Juda

¹ Ehe ne a mu ne avbe ẹgbẹe Juda keghi re eso vbe ehe ne a ra gie na: nene otọ ke ya sẹ ehe ne Idọm lae vbe odẹ ekẹn, wa ya sẹ ato ọghe Zin vbe ehe ne ọ na dinmwi sẹẹ vbe odẹ ekẹn.

² Uwu ne ọ rre odẹ ekẹn na, odẹ ehe ne Okun Nọwu sẹe vbe odẹ ekẹn ọ re ọ ke kpao.

³ Ọ keghi vbe niẹn ghe odẹ ekẹn ke Akrabim Pas kpao wa ya sẹ Zin. Ọ na niẹn obọ ghe odẹ ekẹn gha rrie Kedẹs Bania, ọ keghi fian Hẹzrọn rra gha rrie Ada, ọ keghi vbokho ghe odẹ Kaka,

⁴ ọ na gha rrie Azmọn, ọ na wa lele ẹzẹ ne ọ rre ehe ne Igipt lae gha rrie Okun Meditẹrrenian. evba ọre ọ ghi sẹ. Ọnii keghi re ehe ne otọe Juda lae vbe odẹ ekẹn.

⁵ Vbe odẹ ahọ vbọ, ọ keghi la Okun Nọwu ghe odukhunmwu ya sẹ ehe ne Jọdan na lẹ la rọ. Evba nii i ọ re ehe ne ọ lae vbe odẹ okuọ na suẹn.

⁶ Ọ na ya niẹn obọ sẹ Bẹt Hogla, ọ na laghe odẹ okuọ ya sẹ ehe ne a ke ghe Iya Jọdan. Ọ na ke evba gha rrie Okuta ọghe Bohan (ovbi e Riubẹn ọ re Bohan gha khin),

⁷ ọ na vbe ke Iya Orueghe kpao gha rrie Debẹ, ọ na vbe laghe odẹ okuọ, ọ kevbe bi egbe ghe Gilgal ne ọ mu aro da Adumim Pas ne ọ rre Odẹ ekẹn ọghe Iya nii. Ọ na vbe ke evba gha rrie ẹzẹ Ẹnsiemẹs, ọ na vbe niẹn obọ ghe Ẹnrogẹl.

⁸ Ọ kevbe laghe odukhunmwu gha rrie iya ivbi e Hinọn ne ọ rre odẹ ekẹn ọghe ọgbagba oke ọghe Jebus ehe ne Jerusalẹm ye. Uwu ẹre keghi gha khian ya sẹ uhunmwu oke ne ọ mu aro da Iya Hinọn vbe odẹ orrie vbe odẹ okuọ ọghe ehe ne Iya Refeim na fo.

⁹ Ọ keghi vbe ke uhunmwu oke nii kpao gha rrie Ivbiẹzẹ Nẹftoa, ọ na vbe la ghe odẹ ẹvbo ni rre ọkpẹn Oke Efrọn. Evba ọ ghi vbe ke mukhiẹn ghe odẹ Baala (ra kirriat Giearim.)

¹⁰ Evba ọ ghi kevbe ya lẹga odẹ orrie ọghe Baala la ghe odẹ Oke Sẹa, ọ na vbe la odẹ okuọ ọghe oke Giearim (ra Kiesalon) vbe la ghe otọ gha rrie Bẹt Siemẹs gha khian ya gberra Timna.

¹¹ Uwu keghi vbe la ghe odẹ ehanhan oke vbe odẹ okuọ ọghe Ẹkrọn, ọ na vbe la ghe Sikẹrọn, ọ gberra Oke Baala gha khian ya sẹ Jabneel. Ehe ne ọ lae keghi ya mudia vbe Okun Meditẹrrenian.

¹² Ehe ne ọ lae vbe odẹ orrie ke gha re okhiẹ Okun Meditẹrrenian. Enena ọrọre ehe ne uwu lae ne ọ lẹga emwa avbe ẹgbẹe ni rre Juda.

E Keleb Khọn Hibron Ke Debe

¹³ E Jọsua keghi mu ihe eso vbe otọe emwa Juda ne Kelẹb ne ovbi Jefunẹ, zẹ vbene e Nọyaẹnmwa tama rẹn. Ọna kegha re Hibrọn ẹvbo Aba ne erha Anak.

¹⁴ E Kelẹb keghi khulo ivbi Anak ighẹ Siẹsiai, Ahima kevbe Talmi hin evba rre.

¹⁵ Evba ọ re ọ ke kpao ya dekun iran ni rre Debẹ (kirriat Sefẹ ọre a te ka tie ẹvbo na yi.)

¹⁶ E Kelẹb keghi kha wẹẹ, “I gha rhie ovbi mwẹ nokhuo ighẹ Aksa ne ọmwaikọmwa ne ọ gha sẹtin khọn kirriat Sefẹ rhie rọnmwẹ.”

¹⁷ Otniẹl ne ọtẹn Kelẹb ne ovbe re ovbi e Keniz keghi khọn ẹvbo nii. E Kelẹb keghi rhie Aksa ne ovbi ẹre ne okhuo ne ẹẹn rhie rọnmwẹ.

¹⁸ Vbe ẹdẹ irhiọha, ọ keghi ya tua Otniẹl ne ọ nọ erhae wẹ ne ọ mu otọ ne irẹn. Rẹn keghi bu e Kelẹb gha khian, rẹn ghi tuorre vbe ekẹtẹkẹtẹ ọre, e Kelẹb keghi nọ rẹn emwi ne ọ ho.

¹⁹ Okhuo nii wanniẹn wẹẹ, “Emwi ihaoko, vbene u ghi na rhie mwẹ ye otọ nọkae ne amẹ i ye, viọ uvun amẹ mẹ.” Ọ re Kelẹb na mu ẹzẹ ne ọ ke odukhunmwu ke ne ọ ke otọ ne ẹẹn.

Avbe Okpẹvbo Ni Rre Juda

²⁰ Avbe otọe ni sẹ avbe ẹgbẹe ni rre Juda obọ ena khin.

²¹ Avbe ẹvbo ni ghi sikẹ odẹ ekẹn sẹẹ ni gha re ọghe iran, ne a miẹn wẹ ọ sikẹ uwu ọghe iran vbe Idọm kegha re Kebzil, Ẹdẹ, Jagọ,

²² E Kina, Dimọna, Adada,

²³ Kedẹs, e Hazọ Itnan,

²⁴ Zif, Tẹlẹm, Bialot,

²⁵ Hazọ Hadata, Keriọt Hẹzrọn (ra Hazọ),

²⁶ Amam, Siẹma, Molada,

²⁷ Haza Gada, Hẹsmọn, Bẹtpẹlẹt,

²⁸ Haza Siual, Biẹsiẹba, Bizotaia,

²⁹ Baala, Iim, Ezẹm,

³⁰ Eltolad, Siẹsil, Họma,

³¹ Ziklag, Madmana Sansanna,

³² Lebaot, Silhim, Ain kevbe Rimọn, ehia kegha re okpẹvbo ọkpa irrọ vbe ọgban deba avbe ẹvbo ni lẹga iran.

³³ Avbe ẹvbo ni rre ototọ oke kegha re. Estao, Zora, Asna,

³⁴ Zanoa, Ẹnganim, Tapua, Enam,

³⁵ Jamut, Adulam, Soko, Azẹka,

³⁶ Siareim, Aditem, Gẹdẹra kevbe Gẹderoteim — ehia kegha re ẹvbo iwenẹ do deba ẹvbo ni lẹga iran.

³⁷ Avbe ẹvbo na kevbe gha rrọọ Zenan, Hadasia, Migdagad.

³⁸ E Dilian, Mispa, Joktil,

³⁹ Lakis, Bozkat, Ẹgiọn,

⁴⁰ Kabọn, Laman, Kitlis,

⁴¹ Gẹdẹrọt, Betdagọn, Naama, kevbe Makẹda, ehia kegha re ẹvbo enẹirrọ vbe ugie do deba avbe okpẹvbo ni lẹga iran.

⁴² Avbe iran na kevbe gha rrọọ Libna Etẹ, Asian,

⁴³ Ifta, Asna, Nezib,

⁴⁴ Keila, Akzib kevbe Maresia, ẹvbo ihinrin do deba avbe okpẹvbo ni lẹga iran.

⁴⁵ Ẹkrọn kevbe rrọọ ke ẹe kevbe avbe okpẹvbo kevbe igue ni rrọọ.

⁴⁶ Do deba avbe agbọn ẹvbo kevbe okpẹvbo ni rre ọkpẹn Asdọd, ke Ẹkrọn ya sẹ Okun e Meditẹrrenian.

⁴⁷ Asdọd kevbe Gaza keghi vbe rre evba do deba avbe okpẹvbo kevbe igue ni rrọọ ya sẹ ẹzẹ ne ọ rre uwu ọghe Igipt kevbe ọkpẹn Okun e Meditẹrrenian.

⁴⁸ Avbe ẹvbo ni rre uhunmwu oke, iran ni rrọọ keghi re Siamẹ, Jatẹ, Soko,

⁴⁹ Danna, Kirriat Sefẹ (ra Debẹ),

⁵⁰ Anab, Ẹstemoa, Anim,

⁵¹ Gosiẹn, Holọn kevbe Gilo: ẹvbo owọrọ deba ẹvbo ni lẹga iran.

⁵² Iran na keghi vbe rrọọ ighẹ Arab, Duma Esian,

⁵³ Janim, Bẹt Tapua, Afẹka,

⁵⁴ Humta, Hibrọn kevbe Ziọ: ẹvbo ihinrin deba avbe ẹvbo ni lẹga iran.

⁵⁵ Avbe ẹvbo na keghi vbe rrọọ Maọn, e Kamẹl e Zif, Juta.

⁵⁶ Jezrẹl Joke-deam, e Zenoa,

⁵⁷ Kain, e Giben kevbe Timua, ẹvbo igbe deba ẹvbo ni lẹga iran.

⁵⁸ Avbe Hahul kevbe rre evba, ke Bẹtzọ, Gẹdọ,

⁵⁹ Marat, Bẹtanot, ke Eltakọn: okpẹvbo ehan do deba ẹvbo ni lẹga iran.

⁶⁰ Avbe kirriat Bal kevbe rrọọ (ra kirriat Jearim) deba ẹvbo eva deba ẹvbo ni lẹga iran.

⁶¹ Ẹvbo ni ghaa rre ato ọrọre Bẹt Araba, Midin, Sekaka,

⁶² Nibsian ne ẹvbo Umwẹ, kevbe Ẹngẹdi: agbọn ẹvbo ehan deba okpẹvbo ni lẹga iran.

⁶³ Sokpan emwa Juda ma sẹtin khulo ivbi e Jebus ni rre Jerusalẹm ladian. Ivbi e Jebus ye deba ivbi Juda gha rre Jerusalẹm.