Job 9 - Edo Bible (E Baibol Ẹdo) Version 1996

^1-2 Ẹn, I ka họn egbe ẹmwẹ vberriọ yi. Sokpan vbe ọmwa ra sẹtin gu Osanobua gui ẹzọ ne ọ rria asẹ hẹ yi?

³ Vbe ọmwa ra gu ẹe muan ẹmwẹ hẹ yi? Rẹn gha sẹtin nọ ọta arriaisẹn, ne a i miẹn ọmwa ne ọ gha sẹtin rhie ewanniẹn yọ.

⁴ Osanobua wan ẹsẹse, ọ vbe mwẹ ẹtin, ọmwa ne ọ gha sẹtin mu aro da ẹre irrọ.

⁵ Vbe ne a i na vbe ta ẹe ya, ọ ghi vbọlọ avbe oke, ohu gha muẹn, ọ ghi fuẹn ehia a.

⁶ Osanobua ghi giẹ igbohiotọ, ọ ghi mu otọ rueghe, ọ ghi mu avbe orrẹ ni da agbọn yi rueghe.

⁷ Ọ sẹtin da owẹn yi ne ọ ghẹ yan rre, kevbe ne avbe orhọnmwẹ ghẹ wan uwanmwẹ vbe asọn.

⁸ Ọmwa ne ọ gu Osanobua tan iso i rrọ, ra ne ọ ye owẹ rrilo ugbogiorinmwi ẹzẹ iyeke.

⁹ Osanobua viọ avbe orhọnmwẹ rrọ ye iso, avbe agukisinmwiogie, agho, kevbe iyọkhọkhọ kevbe avbe orhọnmwẹ odẹ ekẹn.

¹⁰ Ma i sẹtin rẹn otọ iwinna nekhua ne ọ winna, iwinna ọyunnuan ẹnrẹn i vbe mwẹ ọfo.

¹¹ Osanobua gberra khian, sokpan mẹ i sẹtin dẹghe ẹre.

¹² Ọ ghi gha rhie emwi ne ọ khọn rẹn, ọmwa ne ọ wẹ ẹre dobọyi i rrọọ. Ọmwa ne ohan giẹe nọ rẹn wẹ, “Vbe u a ru yi?” ẹ i rrọọ.

¹³ Ohu Osanobua i firaa, Ọ rẹnkhẹn avbe eghian rẹn hia a. Iran ni rhie obọ ye Rehab ne ugbogiorinmwi amẹ iyeke, gha gu ẹe suan.

¹⁴ De ẹmwẹ ne I gha miẹn, ya rhie ewanniẹn ne Osanobua khekherriọ?

¹⁵ A gha rhe miẹn wẹ I ma rẹn ọkpa I ma rẹn eva. Emwi ne I ra miẹn ru i rrọọ, gberra ne I rinmwian Osanobua ne ọ bu ohiẹn mwẹ, wẹ ne ọ tohan mwẹ.

¹⁶ Gie a kha wẹ ọ rhie ẹghẹ mẹ ne I ya zẹ ne unu mwẹ, mẹ ma yayi ighẹ ọ gha danmwehọ mwẹ.

¹⁷ Ọ giẹ okpẹhoho, ne ọ do si mwẹ bolua, vbe ne ẹ i na mwẹ otọ.

¹⁸ Ẹ i gunmwẹ gbe amẹ sa wọn. Ọ ye orriara vuọn ẹdẹ agbọn mwẹ hia.

¹⁹ Te imẹ ghẹ ghi ze vbe udu ra? Ne I ze vbe udu ma Osanobua? Te I gha mu ẹẹn ye iko ra? De ọmwa ne ọ ra si ẹe gha khian yi?

²⁰ I ma rẹn ọkpa, I ma rẹn eva, ekhọe mwẹ vbe dia. Sokpan, ẹmwẹ mwẹ ghi yevbe irri abe. Ẹmwẹ ne I ta hia ghi yevbe ne ọ bu abe gbe mwẹ.

^21-22 I ma rẹn ọkpa I ma rẹn eva, sokpan mẹ i ghi zẹ yọ nian. Agbọn khan mwẹ nẹ. Emwi rhọkpa i ghi rrọọ. U rri asẹ ra te u rri abe. Te Osanobua ye fuẹn ima hia a.

²³ Ọmwa ne ọ ma rukhọ gha wu udomwurri, Osanobua ghi giẹ.

²⁴ Osanobua mu agbọn na ne emwa dan, ọ rhu iran ni bu ohiẹn hia aro, a deghẹ ẹire Osa ọre ọ ru ẹe, de ọmwa ne ọ ghi khin?

²⁵ Ẹdẹ agbọn mwẹ rhulẹ gberra khian, ọkpa ne ọma i rrọọ.

²⁶ Agbọn mwẹ gberra, zẹ vbe okọ ne ọ rhulẹ, okhian wa kẹ ọre zẹ vbe oghohọn, ne ọ ra vin mu ofẹn.

^27-28 I gha mumu ogie ne I mianmian usẹ. Usẹ mwẹ hia ghi hihiẹ rre do gha runran mwẹ, I rẹnrẹn ighẹ Osanobua ka mwẹ ba ni rriabe nẹ.

²⁹ Deghẹ a ka mwẹ ba ne ọ rria abe nẹ, vbe i a ghi ye domian ba a?

³⁰ Evbakhuẹ ne ọ gha kpe orukhọ mwẹ i rrọ.

³¹ Osanobua fi mwẹ fi uye ni gbe iruẹn nẹ, uhin ighẹ te ekhue mwẹ ghi mu avbe ukpọn mwẹ.

³² Akpawẹ ọmwa kẹkan ọ re Osanobua khin, te I gha zẹ ẹmwẹ wanniẹn ọẹn, ma gha gba gha rrie iko ya gui ẹzọ ima.

³³ Sokpan, ọmwa ne ọ ra guan ye ẹmwẹ na ne ima ẹ i rrọọ. A i miẹn ọmwa ne ọ gha bu ohiẹn imẹ vbe Osanobua.

³⁴ Ghẹ ghi rriọ mwẹ oya Osanobua: Hẹ avbe emwi ohan ruẹn kpao hin emwa rre.

³⁵ Ohan i mu mwẹ I gha wa guan rhunmwuda, I gba ẹko mwẹ.