Job 7 - Edo Bible (E Baibol Ẹdo) Version 1996

¹ “Ẹdagbọn ọmwa nagbọn, te ọ ye vbe okuo ne a ya ẹtin mu ọmwa gha rrie.

² Ọ yevbe ọviẹn ne ọ gualọ irhu ne ọ gha lẹre yi. Zẹ vbe ọmwa iwinna ne ọ diakhẹ ne a ha irẹn osa.

³ Ke uki ya dinna uki, mẹ i miẹn emwi ne I rre agbọn ba. Asọn dinna asọn, akhiẹ ehia viọ bu mwẹ rre.

⁴ I gha lovbiẹ wẹ ne I vbiẹ, ẹghẹ ghi tan lọghọọ. I ghi gha werriẹ yo werriẹ rre, khẹ ẹghẹ ne ẹdẹ gha ya gbe.

⁵ Ọ khọe gba mwẹ egbe hia, te ehia ghi bannọ gheghe, ẹtẹ mwẹ hia gha ro kua.

⁶ Ẹdẹ mwẹ hia rrie vbe ne idaehọ ina rrọọ, okhian kẹ ọre sẹ ọkpido ọdukpọn.

⁷ “Osanobua, yerre wẹ, uhiọnrọnmwẹ ọkpa kẹkan ọ re ẹdagbọn mwẹ khin, oghọghọ ne I mwẹ fo nẹ.

⁸ U miẹn mwẹ nian, sokpan ọfo ye evba nẹ, u gha gualọ mwẹ, I kpa a nẹ.

^9-10 Zẹ vbe amẹ ne ọ bi ne ọ hoho ua, ọmwa gha wu, ẹ i ghi dọlegbe dee. Iran ni rẹn ọnrẹn ghi mianmian ẹẹn.

¹¹ Ẹn o, vbe i a ghi hunwan hẹ yi! Ohu mu mwẹ, ẹko rriara mwẹ, te I gha guan.

¹² “Vbe u a ghi na baba mwẹ hẹ yi? Te uwẹ ro wẹ Ugbogiorinmwi ẹzẹ I khin ra?

¹³ I lovbiẹ, I keghi hia ne I hẹwẹ, I te ho ne obalọ mwẹ vbe sẹ mwẹ rae.

¹⁴ Sokpan wẹ keghi ye imina gha runran mwẹ, u kegha giẹ umian kevbe imina dan gunmwẹ,

¹⁵ a te do miẹn wẹ a niẹn mwẹ rhie fua, ọre ọ fu mwẹ egbe sẹẹ nẹ I ye gha mu egbe usẹ na khian.

¹⁶ I zobọ vbọ, agbọn khan mwẹ nẹ, wa hẹko sẹ mwẹ rae; I i ghi mwẹ esa ni gu agbọn ye.

¹⁷ Vbọzẹ ne ọmwa na ye gẹdẹgbẹ vbe aro ruẹ yi? Vbe u a na vbe zẹ ye emwi ne ọ ru hẹ yi?

¹⁸ Owiẹ owiẹ u ya rhuan ẹnrẹn ghe, u ghi vbe gha danmwẹ ọẹn kugbakẹghẹrẹ.

¹⁹ Wẹ i ghi vbe fi aro a kpee kherhe? Ne I miẹn ehe na miẹn asẹn re?

²⁰ Orukhọ mwẹ emwi ne ọ si ye uẹ egbe ra, wẹ ne eseghan? Vbe u a ghi na ya mwẹ ru emwi ne a kọn fi hẹ yi? Erriọ ihẹ mwẹ wa khua ruẹ ra?

²¹ Wẹ i ya orukhọ mwẹ bọ mwẹ ẹdẹ ra? Wẹ i ye abakuru mwẹ bọ mwẹ? Ẹ i ghi kpee wan, I ghi la idin mwẹ. u gha gualọ mwẹ, sokpan, mẹ kpao nẹ.”