Job 4 - Edo Bible (E Baibol Ẹdo) Version 1996

Imuaẹmwe Nokaro

^1-2 Ẹre Ẹlifaz ne ovbi ẹvbo ne a tie ẹre Tẹman na wanniẹn, ọ wẹẹ, “E Job ohu gha muẹn ra adeghẹ I guan yọ? Mẹ i ghi sẹtin hunwan sẹ ọna.

³ Emwa ni bun ọ re uwẹ he ma ẹre emwi, u keghi vbe rhie ẹtin ye obọ ne ọ luẹluẹe iwu.

⁴ Ọmwa gha ye mitanmitan, egbe na wọ ẹre, ọ na de, ẹmwẹ unu ruẹn ọ re ọ rhie ẹtin ne ẹẹn ne ọ guakpao vbe otọ.

⁵ Eban nian, ọlọghọmwa nii, sẹ uwẹ egbe. Egbe ẹre kan an sẹrriọ wẹ u i ho ne u ziengbe ẹre.

⁶ U ga Osanobua, uyinmwẹ ruẹn ma vbe gha mwẹ okan. Rhunmwuda ọnii, ọ kere ne u gha mwẹ ekhọe ne ọ sotọ kevbe idaehọ.

⁷ Ya ekhọe gua sẹ ọe ghe, sunu ye igiemwi ọkpa, ọghe ọmwa esi ne ọkhọ rruan rẹn.

⁸ Mẹ miẹn emwa ni gua ugbo ọkhọ nẹ, iran na kọ uyinmwẹ ika zẹ vbe emwi okọ, eban nian, emwi ne iran rhọ ọrọre ọkhọ kevbe emwi dan.

⁹ Osanobua keghi ya ohu ẹre fuẹn iran an zẹ vbe okpẹhoho.

¹⁰ Emwa dan gha vannọ, iran gbọọ zẹvbe oduma, sokpan Osanobua gue unu iran, ọ kevbe kpannọ iran akọn kua.

¹¹ Zẹ vbe oduma ne ọ ma miẹn emwi gbe ne ọ re, iran wulo, ivbi iran keghi zagha kua.

¹² “Ẹghẹ ọkpa, a keghi giẹ uhunmwu urhu nekhuẹrhẹ rre. Ọ khuẹrhẹ sẹrriọ wẹ I ma te ra họn ẹẹn.

¹³ Ọ yevbe imina dan, ọ ma gunmwẹ ghi miẹn ovbe.

¹⁴ I kegha guọ, I na ki rre. Egbe mwẹ hia kegha mian kpẹkpẹkpẹ rhunmwuda ohan.

¹⁵ Ẹhoho ne wẹlẹ hoho yọ mwẹ aro. Ohan keghi ye egbe rrirri mwẹ.

¹⁶ I bẹghe vbe emwi ọkpa mudia vbe evba, I ziẹn aro yọ, sokpan I ma rẹn emwi ne ọ khin, I keghi họn urhu ọkpa ke uwu e hii nii rre.

¹⁷ ‘Ọmwa gha sẹtin gha re ọmwata vbe odaro Osanobua ra? Ra ne ẹ i mwẹ iruẹn vbe odaro Ayi ne ọ yi ẹe?

¹⁸ Osanobua i mu ẹtin yan avbe ewọe ẹrinmwi ẹnrẹn, uhin ighẹ ọ yevbe miẹn abakuru vbe obọ avbe odibo ẹre.

¹⁹ Wẹ yayi ighẹ ọ gha mu ẹtin yan emwi ne a ye obuẹ ma? Emwi ne a ye ebubẹ ru, ne ọ giẹ a lọkọ ua zẹ vbe arriukpa?

²⁰ Ọmwa sẹtin gha rre agbọn vbe owiẹ, vbe ọ te sẹ ota, ọ ghi wu vbe ne ọmwa rhọkpa i na rẹn

²¹ A ghi miẹn ẹre emwi hia ne ọ te mwẹ; ọ wu vbe ne ẹ i na ye mwẹ ẹwaẹn.’ ”