Job 39 - Edo Bible (E Baibol Ẹdo) Version 1996

¹ “Wẹ rẹn ẹghẹ ne a na biẹ ẹwe oke ra?

² U vbe rẹn inu ẹghẹ ne iran mu ovbi iran la ra? U vbe rẹn ẹghẹ ne iran ya biẹ ra?

³ U rẹn ẹghẹ ne iran gha ya rhuẹ ye otọ ra. Ne iran biẹ ovbi iran ye agbọn?

⁴ Ivbi iran ghi wan, iran ghi wegbe vbe uwu oha, iran ghi kpao vbe ne iran ighi na vbe dọlegbe rre.

⁵ “Gha ọ rhie ayan egbe ọmwa ne ekẹtẹkẹtẹ oha yi? Gha ọ rhan iran kua ne iran ya gha hẹ yo hẹ rre?

⁶ Mẹ rhie ato ne iran ne ọ gha re owa iran, I na wẹ ne iran vbe gha rre otọ ne ọ rriẹe ọghe umwẹ.

⁷ Iran ghi wa gban egbe ne ore ẹvbo ni vuọn ne owogho, a i miẹn ọmwa ne ọ gha sẹtin rri iran, ne ọ ya iran gha winna.

⁸ Avbe oke nekhua ọrọre otọ ne iran na rria, ehe ne iran na gualọ emwi ne ọ rhirhi bi nunuunu ne iran gha re.

⁹ “Ede gha winna ne uwẹ ra? Ọ he rre ne ọ do gbe asọn ọkpa vbe aza emwirri ruẹ ra?

¹⁰ U gha sẹtin ya irri de ọkpa vbọ ra? Ne uwẹ ne ọ do gha vulo otọ?

¹¹ U gha sẹtin mu ẹtin yan ẹtin ẹnrẹn nọkhua ra, ne u gha khẹ ọre ne ọ do winna iwinna ruẹn ne ọ lọghọ?

¹² Te u khẹ ọre ne ọ do viọ emwi orhọ ruẹ gha die owa ra, ra ne ọ do viọ ọka ruẹ hin ehe ne u na wiẹn ọka rre?

¹³ “Vbe okhian a kẹ ifuẹn ugomugo sẹ hẹ yi! Sokpan ugomugo i tin utinmwẹ ahua.

¹⁴ Te ugomugo sẹ ekẹn ọnrẹn rae ye otọ ne otọe ne ọ mwẹ ọghae gha mwẹ ọghae muẹn.

¹⁵ Ọ ma rẹn wẹ, a sẹtin ya owẹ guọghọe rua ra ne aranmwẹ oha guọghọ iran an.

¹⁶ Ọ ghi gha ru vbene a miẹn wẹ ẹ i re irẹn ọ re ọ yan ekẹn nii, a ma wẹ te ọ ra zẹyọ wẹ te a mu irẹn ẹghẹ rhia.

¹⁷ Mẹ ọ re ọ ru ẹe ne ọ kọn, ne I ma na vbe rhie ẹwaẹn ne ẹẹn.

¹⁸ Sokpan, ọ gha suẹn gha rhulẹ nẹ, te ọ ye ẹsin ke ne ọ hin ẹnrẹn gbe ogiẹ.

¹⁹ “E Job, wẹ ọ ru ẹe ne avbe ẹsin na wegbe sẹrriọ ra u na vbe viọ eto ẹyaẹn iran ne yọyọyọ ne iran?

²⁰ Wẹ ọ ru ẹe ne iran gha san vbe irhiso ra ne iran na vbe tin ihin ya runran emwa?

²¹ Te ọ bọbọ ẹre egbe vbe ọ gha hin oke ra iya ẹtin ẹnrẹn hia ọ re ọ ya khọn la uwu okuo.

²² Iran ma rẹn emwi ne a ye ohan kha, umozo ọkpa i rrọ ne ọ gha khu iran werriegbe.

²³ Emwi igbinna ne ne ọ hin iran mu mwẹ, ghi gha gui ẹzọ ọ ghi gha kpannọ erhẹn kua vbe ovẹn.

²⁴ Vbe ne ọ na guọ kpakpakpa, rhunmwuda ighẹ ọ mu ẹre egbe, ẹsin ghi vin ghe odaro; okpe gha tu nẹ, iran ighi sẹtin mudia ye ihe ọkpa ne iran hunwan.

²⁵ Ẹghẹ ne okpe a rhirhi ya davan, iran ghi tin ihin; iran i he sẹ ehe ne okuo ye, ọ kegha wia so iran, iran vbe họn ẹmwẹ ne ọkaokuo vannọ ya dia igbinna.

²⁶ “We ọ re ọ ma ahua vbene a ya tin hẹ ra vbe ọ gha rhan ifuẹn ọnrẹn uan ghe odẹ ekẹn?

²⁷ Te oghohọn vbe mudia ne a tama rẹn nẹ ra Ọ ke ya bọ oko ye uhunmwu oke ne ọ yo gelete?

²⁸ Oke okuta ne ọ yo sẹ, ọ re ọ bọ owa ẹre yi. Ọ ghi ya ukpe ọ re ne hiain hiain gba ogba ga egbe.

²⁹ Evba ọ re ọ ke ghe urria ke ehe ne ọ sikẹ ọ re ne ọ na gualọ emwi ne ọ ra gbe re.

³⁰ Avbe oghohọn ghi do lẹga ikun emwi ne ọ wu, ivbi oghohọn ni rrọ ghi gha wọn esagiẹn ọnrẹn.”