Job 38 - Edo Bible (E Baibol Ẹdo) Version 1996

E Nọyaẹnmwa Wanniẹn E Job Ẹmwẹ

¹ Ẹre Nọyaẹnmwa na ke uwu O okpẹhoho zẹ ẹmwẹ wanniẹn e Job,

² ọ keghi kha wẹẹ, “Gha ọre uwẹ ne ọ gbikhaẹn ye ẹwaẹn mwẹ yi, vbene u na ya ẹmwẹ akpa ọghe ne ọ ma rẹn ne a ya ta ẹe?

³ Kpaegbe mudia nian, zẹ vbe okpia, ne u gha rhie ewanniẹn ye ọta ne I nọ ruẹn re.

⁴ Wẹ rre evba vbe I yi agbọn ra? Adeghẹ u gele rẹn emwi sẹ evba, ta ẹe ma mwẹ.

⁵ Gha ọ ta ẹe vbene ọ gha kpọlọ sẹ hẹ yi? De ọmwa ne ọ tan okun ya mwa rẹn? Wẹ rẹn ewanniẹn na hia ra?

⁶ De emwi ne ọ da orre ne a ya da agbọn yi mwẹ yi. Gha ọ gbe ẹyotọ agbọn na?

⁷ Ẹdẹ ne ẹdẹrriọ ghi gbe avbe orhọnmwẹ keghi koko so ihuan. Ighele ẹrinmwi hia keghi we ne oghọghọ.

⁸ “De ọmwa ne ọ khui urho ke okun yi vbe ẹghẹ ne ọ na vẹ ke uwu otọ ladian?

⁹ Mẹ ọ re ọ ye amẹ gue okun, I na ye ebiebi gbalọ ẹe.

¹⁰ I vin uwu ye otọ ne okun, I na ya asigbe khui urho kẹe yi.

¹¹ I keghi tama rẹn wẹẹ, ‘Emwa u ra sẹ, ghẹ gberra evba! Emwana ọ re uhumwẹ amẹ ruẹn gha na dobọyi.’

¹² E Job, vbe ẹdẹ agbọn ruẹn na, wẹ he vbe wẹ ẹdẹ gbe ẹdẹ ra?

¹³ U he tama uwanmwẹ ẹdẹ ne ọ siẹnrhu agbọn ra, ne ọ silo emwa, dan ke ehe ne iran lẹre yi ladian?

¹⁴ Uwanmwẹ ẹdẹ ọ re ọ giẹ a rẹn ehe ne oke kevbe iya ye. Zẹ vbe ehe ne ukpọn na munọ yan egbe, ọ ghi rhie egbe ma zẹ vbene ama ne a yi ye obuẹ ye.

¹⁵ Awanwan uwanmwẹ ẹdẹ wegbe ne ọmwa dan gbe, ọ ghi gha da iran obọ emwi ika ne a ru yi.

¹⁶ Wẹ he sẹ ehe ne amẹ ke kpe ladian vbe ototọ okun ra? We he ye owẹ khian vbe otọ okun nọkhua ra?

¹⁷ Iran he vbe ma ruẹn ẹkhu ne ọ khui urho odẹ ne ọ rrie ẹvbo ebiebi iran ni wulo nẹ ra?

¹⁸ We gha sẹtin mu idandan ọghe vbene agbọn na kpọlọ sẹ hẹ ra? Rhie ewanniẹn mẹ deghẹ u rẹn ọnrẹn.

¹⁹ “U rẹn ehe ne uwanmwẹ ke rre ra? Ra ẹzi ehe ne ebiebi ke rre?

²⁰ U gha sẹtin ma iran ehe ne iran gha sẹ ra? Ra ne u khulo iran werriegbe?

²¹ Mẹ yayi wẹ u gha wa sẹtin, rhunmwuda ẹ i ghi re eban u rrie agbọn. U rre evba vbe a yi agbọn na.

²² “Wẹ he sẹ avbe aza ne I viọ esia kevbe amẹ ne ọ zeze yi ra?

²³ I viọ iran ye otọ khẹ ẹghẹ asobọyegbe, ẹdẹ igbinna kevbe okuo.

²⁴ Wẹ he sẹ ehe ne ovẹn ke yan rre ra, ra ehe ne ẹhoho odẹ ahọ ke hoho re?

²⁵ “Gha ọ halọ uvun ne amẹ na rhọ rre yi? Ọ na wan odẹ ne avan nukhunmwu?

²⁶ Gha ọ wẹ ne amẹ gha rhọ ye ehe ne emwa ma yin yi?

²⁷ Gha ọ gbe amẹ khakha otọ ne ọ kae kevbe ne ohanmwẹ amẹ gbe, ne emwi okọ na zọ vbọ?

²⁸ Ke amẹ, kevbe evbu de ne ọ mwẹ erha vbọ yi?

²⁹ De ọmwa ne ọ re iye esia kevbe amẹ ne ọ zeze?

³⁰ Gha ọ fi amẹ werriẹ khian okuta, ne ọ na vbe ya odukhunmwu okun khian ne ọ zeze?

³¹ “U gha gbalọ avbe orhọnmwẹ ne a tie ẹre iyọkhọkhọ kugbe ra, ra ne u rhan irri ne ọ gba agho kugbe?

³² U gha sẹtin ma avbe orhọnmwẹ odẹ ra vbe dọmwadẹ ẹghẹ ne ukpo ya fiwerriẹ, ra ne u dia agukisinmwiogie Nokhuo kevbe Nekherhe ye odẹ?

³³ U rẹn uhi ne a lo vbe iso ra, ra ne u wẹ ne avbe gha lo uhi nii vbe otọe vbe agbọn?

³⁴ “U gha sẹtin van okan mu ikpakpa iso ra ne u wẹ ne iran rhọ amẹ kuọ ruẹ?

³⁵ U gha tama avan nukhunmwu wẹ ne ọ van, ọ gha rre do khama ruẹ wẹẹ, ‘Obọ kẹ ne?’

³⁶ De ọmwa ne ọ tama ovbi ahianmwẹ ẹghẹ ne e Naẹl gha ya ro, ra de ọmwa ne ọ tama ọkhọkhọ ọkporhu wẹ amẹ ra rhọ?

³⁷ De ọmwa ne ẹwaẹn gba na sẹrriọ yi ne ọ ka amẹ ikpakpa iso ne ọ vbe biẹe gọ ne amẹ rhọ,

³⁸ amẹ ne ọ do gha ye ebubẹ mannọ kugbe?

³⁹ “Wẹ ọ re ọ gualọ evbare ne avbe oduma re ra, ne u vbe giẹ ẹko vuọn ivbi oduma ne ohanmwẹ gbe

⁴⁰ vbe ẹghẹ ne iran na lẹre ye uwu uvun okuta iran, ra vbe iran a rhuẹ ye uvun oduma iran?

⁴¹ Gha ọ koko avbe ivbianumẹ yi vbe iran a gha hẹ yo hẹ rre vbe ohanmwẹ, vbe ẹghẹ ne ivbi iran na viẹ ma mwẹ wẹ ne I rhie evbare ne iran?