Job 37 - Edo Bible (E Baibol Ẹdo) Version 1996

¹ “Nene okpẹhoho ye udu mwẹ fi kpikpikpi.

² Wa hia, wa danmwehọ urhu Osanobua, avan ne ọ ke unu ẹnrẹn ladian.

³ Ọ giẹ ayan ne ọ gbe iso dunmwu ke okhiẹ agbọn ọkpa sẹ nọkpa.

⁴ Ẹghẹ nii, a keghi họn uvannọmwẹ urhu ẹre, ulamwẹ nọkhua ọghe avan nukhunmwu, ayan nii keghi wa gha yan khian vbe otọ,

⁵ emwi ọyunnuan ni bun kegha sunu vbe Osanobua giẹ vberriọ. Emwi ọyunnuan ne ima isẹtin rẹn otọ ẹre.

⁶ Ọ giẹ wẹ ne esia dele ye otọ, ọ kevbe giẹ orogho amẹ ne ọ ro gue emwi hia.

⁷ Ọ keghi dobọ iwinna emwa nagbọn yi, ọ giẹ iran rẹn wẹ te iran wa winna.

⁸ Avbe aranmwẹ oha la uvun iran,

⁹ okpẹhoho nekhua ke odẹ ekẹn rre, ọnii ne ọ zeze ọmwa keghi ke odẹ okuọ rre.

¹⁰ Uhiọnrọnmwẹ Osanobua ye amẹ zeze, ọ keghi ye ehia khian esia ne ọ wegbe.

¹¹ Ayan ke uwu ikpakpa iso yan ladian,

¹² vbe ehe ne iran na khian vbene Osanobua ho. Iran ru emwi hia ne Osanobua giẹ.

¹³ Osanobua giẹ amẹ ne ọ do gbe khakha otọ, ọ sẹtin giee ne ọ do rri emwa oya, ra ne ọ do ru iran ẹse.

¹⁴ E Job, dobọyi kherhe ne u danmwehọ, roro ẹmwẹ emwi ọyunnuan hia, ne Osanobua ru.

¹⁵ U rẹn vbene Osanobua ya ta ẹe hẹ ra, ne ọ na giẹ ayan gha yan, ladian vbe ikpakpa iso?

¹⁶ Wẹ rẹn vbene amẹ ne ọ bi ya werriẹ khian hẹ vbe ikpakpa iso ra? Iwinna iguona ọyunnuan ọghe Osanobua?

¹⁷ Ẹn o, sokpan obọ owowo ẹre ma gha daa, vbe ẹhoho odẹ ekẹn a gha sẹ otọ nii usẹ.

¹⁸ U gha sẹtin gu Osanobua tan iso ra? Ne u vbe ya ẹe wegbe zẹ vbe ematọn ne a fiọnghae yi.

¹⁹ Ma ima ẹmwẹ ne a gha tama Osanobua ẹwaẹn wi ima nẹ, ma i ghi miẹn ẹmwẹ ta.

²⁰ Mẹ i ra nọ wẹ ne a rhie otọ mẹ ya gu Osanobua guan. Vbọzẹ ne I gha na giee miẹn otọ na do fuẹn mwẹ uan?

²¹ “Banbanna nian, awanwan ne ọ rre iso gbe ebiebi ye ọmwa aro, ọ fi wainwain gbe, ẹ i giẹ ima ghe ẹhoho wa vbe kpolo iso huan.

²² A bẹghe erhẹn ne ọ baa ọghe igoru vbe odẹ okuọ, uyi ọghe Osanobua ke ye ohan mu mwa.

²³ Ẹtin Osanobua kpọlọ sẹ vberriọ wẹ, ma i sẹtin sikẹ ọre, odẹ ẹmwata kevbe uhunmwu ẹmwẹ, ọre ọ ya gu emwa lo.

²⁴ Ẹkhabe ne ohan rẹn na mu emwa hia, ne ẹ i na vbe zẹ ye iran ẹre ighẹ iran ni wẹ iran wan.”