Job 36 - Edo Bible (E Baibol Ẹdo) Version 1996

^1-2 Elihu keghi rhie te ẹe wẹẹ, “Zin egbe, ne u ye danmwehọ ẹmwẹ ne I guan ne Osanobua.

³ Iruẹmwi mwẹ vẹwae, I gha lo emwi ne I rẹnrẹn ya rhie ma wẹ Osanobua ne Ayi ne ọ yi mwẹ rria asẹ.

⁴ Ẹmwẹ ne I gha ta vbe odaro ruẹ, ọkpa ne ọ re ohoghe I rrọ, ọmwa ne ọ gele wan ọ re ọ mudia ye odaro ruẹ na.

⁵ “U miẹn vbe Osanobua wegbe hẹ! Ẹ i ye aro gbe ọmwa rhọkpa re. Emwi ọkpa ne ọ ma rẹn otọ ẹre, ẹ i rrọ.

⁶ Ẹ i giẹ emwa orukhọ wa gha rrọ khian, ohiẹn ẹmwata ọre ọ bu ne ivbiogue.

⁷ Ọ degue iran ni re ẹmwata ọ ghi vbe giẹ iran gha khaemwisẹ vbe ọba. Ọ ghi vbe giẹ a gha ya ọghọ ne iran ẹdẹdẹmwẹdẹ.

⁸ Sokpan, a deghẹ a ye ọgiọrọ rrọ emwa, iran na gha rri oya ye ọkhọ ne iran ru,

⁹ te Osanobua rhie orukhọ kevbe itengbemu iran ma iran.

¹⁰ Te ọ wẹ ne iran danmwehọ obọ ne ọ ya sekhae ne iran; ne iran lahin emwi dan rre.

¹¹ Iran gha họn urhu Osanobua, iran na gha ga ẹe, iran ghi gha rrọ vbe ọfumwegbe, agbọn ghi vbe maa iran.

¹² Sokpan, a deghẹ ẹ i re vberriọ, uwu a ma rẹn ọ re iran ra wulo yi; iran ghi fian ẹzẹ rra gha rrie ehe ne iran ni wulo nẹ ye.

¹³ “Ohu ohu ọ re iran ne emwa dan mu, a gha kue vbe rri iran oya, iran i tu nọ iyobọ.

¹⁴ Iran ghi wulo, ye isẹrre, agbọn efaa ghi wiẹn iran an.

¹⁵ Sokpan, te Osanobua ye oya ne a re ma emwa emwi ọ ghi vbe ye usẹ rhan iran aro.

¹⁶ “Osanobua rhie ruẹ ke uwu ibaro ladian, ọ na giẹ ẹkun suẹ otọ; a na silo evbare gbo ye eteburu ruẹ.

¹⁷ Banbanna nian, te a ghi rriọ oya zẹ vbene ọ kei ne uẹn.

¹⁸ Mwẹ ẹwaẹn, ne igho odieke ghẹ ya rẹrẹ ọ ra ne ẹfe ghẹ ya bibi uwẹ odẹ.

¹⁹ Ugha tu nọ iyobọ ẹghẹ nii, ẹ i ghi zẹdẹ mwẹ esa. Ẹtin ruẹn hia i ghi mwẹ iyobọ ne ọ gha ru ne uẹn nian.

²⁰ Ghẹ gha rhie aro ye odẹ wẹ ne asọn rre, ẹghẹ ne okpẹvbo hia gha na fuan.

²¹ Mwẹ ẹwaẹn ne u ghẹ ya biegbe la emwi dan. Te a giẹ usẹ na guẹ ne ọ siọ ladian vbọ.

²² U ghi yerre vbene ẹtin Osanobua kpọlọ hẹ. Rẹn ọrọre ọmamwaemwi ne ọ kpọlọ sẹẹ vbe ehia.

²³ Orhiọnkpa i sẹtin tama Osanobua wẹ ghe emwi ne Ọ gha ru, ra ne ọ ba ẹre ifi ẹzọ wẹ Ọ ru emwi dan.

²⁴ Urhomwẹ ọ re a rhie ne ẹẹn ẹdẹdẹmwẹdẹ ye emwi ne ọ ru, ọ kere ne uwẹ vbe rho ẹre.

²⁵ Aro emwa hia sẹ emwi ne ọ ru nẹ, urria ọkpa ma sẹtin mudia yi gha ghe ẹre.

²⁶ Ma i sẹtin wa rẹn ukpọlọmwẹ ọnrẹn fo, ra ne a ka inu ukpo ne ọ ye.

²⁷ Osanobua ọ re ọ rhie amẹ vbe otọe ọ ghi fi ẹe werriẹ ghe ikpẹ amẹ ne ọ rhọ.

²⁸ Ọ ghi giẹ amẹ gha rhọ ke ikpakpa iso rre, ne ọ da ne emwa nagbọn hia.

²⁹ Ọmwa ne ọ rẹn vbene ikpakpa iso ya khian hẹ i rrọ. Ra vbene avan nukhunmwu ya van la iso ne Osanobua ye gberra hẹ.

³⁰ Ọ ghi giẹ ayan la iso khinkhian, sokpan, ebiebi ghi so vbe odin amẹ okun.

³¹ Erriọ ọ re ọ ya koko avbe emwa, ọ ghi vbe viọ evbare ọrhẹnrhẹn rre.

³² Ọ ghi ye obọ ẹre guara ayan rhie, ọ ghi tama rẹn wẹ ghe ehe ne ọ gha de yi.

³³ Avan nukhunmwu ọ re ọ kha ighẹ okpẹhoho dee, oghẹn ẹmila vbe rẹn wẹ, ọ dee.