Job 31 - Edo Bible (E Baibol Ẹdo) Version 1996

¹ “Te I wa mobọ yan rẹn, ne I ghẹ ghe ọmọ okhuo ne a ro mwẹ viẹn yọ.

² Vbe Osanobua ne Udazi ru ima hẹ yi? Vbe ọ ya ha osa ye uyinmwẹ emwa nagbọn hẹ?

³ Ọ ghi mu ọfuan kevbe ọrhiae, giẹ avbe emwa ni ru emwi dan.

⁴ Osanobua rẹn emwi ne I ru hia, ọ rẹn dọmwadẹ owẹ nẹ I zẹ vbe otọ.

⁵ “I ma he yin uyinmwẹ ika ẹdẹ, I ma he hia ne I rẹrẹ ọmwa ọvbehe,

⁶ Wẹ ne Osanobua ya omwa ẹmwata mwa mwẹ, ọ gha miẹn wẹ I ma rẹn ọkpa I ma rẹn eva.

⁷ Adeghẹ I biegbe lahin odẹ ẹmwata rre, ra ne emwi viẹn yọ mwẹ aro ghe ọkhọ, adeghẹ orukhọ ya iruẹn yọ mwẹ obọ,

⁸ giẹ emwi fuẹn emwi okọ mwẹ hia a, ra ne emwa ọvbehe rri emwi okọ ne I kọe.

⁹ “Adeghẹ amwẹ ogieva mwẹ viẹn yọ mwẹ aro, I na ghi ya mudia lẹre ye ọkpẹn ẹkhu ẹre vbe ore,

¹⁰ ẹghẹ nii, giẹ ọvbokhan mwẹ le evbare okpia ọvbehe. Ne ọ vbe ya gha vbiẹ ukpo okpia ọvbehe.

¹¹ Uwu ọ re ọ kere ne a ya gha rria ikhi emwi dan vberriọ.

¹² Te ọ gha yevbe erhẹn omurhia ẹrinmwi erhẹn, ne ọ wa giẹn emwi hia ni mwẹ uan.

¹³ “Ọkpa vbe uwu eguọmwadia mwẹ gha talọ ẹmwẹ mwẹ ma ọmwa, te I ye danmwehọ, I gha ye obọ ne ọ kere mu ẹẹn.

¹⁴ A deghẹ I ma ru vberriọ, vbe i a gha ya sẹtin mudia ye odaro Osanobua hẹ? Osanobua gha do bu ohiẹn mwẹ vbe i a ra miẹn ta?

¹⁵ Osanobua ọkpa nii ne ọ yi imẹ ọ re ọ vbe yi avbe eguọmwadia mwẹ.

¹⁶ “I ma he he ẹdẹ ne I ru iyobọ ne ovbiogue, I ma he giẹ agbọn khan avbe ẹgbẹ ẹdẹ,

¹⁷ ra ne I giẹ ohanmwẹ gbe emọ ne ẹ i mwẹ erha, vbe imẹ a gha rri evbare.

¹⁸ Vbe ẹdẹ agbọn mwẹ hia, te I gha gbe aro ghe iran,

¹⁹ I gha miẹn ọmwa ne ọ vbabọ emwi, ne ẹ i mwẹ igho ne ọ gha ya de ukpọn,

²⁰ I ghi viọ ukpọn ne a ya eto do ne ẹẹn, eto ne ọ ke oghẹn ohuan mwẹ rre, ẹghẹ nii, ọ ghi ya ekhọe ẹre hia tian mwẹ.

²¹ “Adeghẹ I he mu ọmọ ne ẹ i mwẹ erha ru ẹdẹ, rhunmwuda ighẹ I rẹnrẹn ighẹ, I gha rria asẹ ẹre vbe iko,

²² te ekuabọ mwẹ gha vbiolo ua, te a gha yannọ iran hin izabọ mwẹ rre.

²³ Rhunmwuda ighẹ ohan irria ikhi Osanobua mu mwẹ, ohan i gunmwẹ danmwẹ emwi vberriọ ghe.

²⁴ “I ma he mu ẹtin yan ẹfe ẹdẹ,

²⁵ ra ne I ya ẹfe mwẹ gha hio.

²⁶ I ma he gọn ugie ovẹn ne ọ yunmwu ẹdẹ, ra uki vbe uwu ọse ẹre hia.

²⁷ A ma he bibi mwẹ odẹ ya ọghọ ne iran ẹdẹ ne I hiẹnhiẹn atataobọ mwẹ ya ya ọghọ ne iran.

²⁸ Uwu ọ re ọ kere ne a ya rria ikhi egbe orukhọ vberriọ, te ọ siẹn Osanobua ne Udazi.

²⁹ “I ma he ghọghọ vbe oghian mwẹ a gha rri oya ẹdẹ, ra ne I sẹ ọyẹnmwẹ vbe ẹbe a rruan iran,

³⁰ I ma he rukhọ ne I na erhunmwu wẹ ne iran wulo ẹdẹ.

³¹ Emwa hia ni winna mẹ rẹnrẹn, wẹ te I wa rhan obọ miẹn erhunmwuyẹn.

³² Te I tie ekhẹn la owa mwẹ, I i vbe giẹ iran vbiẹ ughe.

³³ “Emwa ọvbehe ho ne iran gha gbe gue orukhọ iran, sokpan ima he gbegue ọghomwẹ ẹdẹ?

³⁴ Ohan ẹmwẹ ne emwa gha ta ma he mu mwẹ ẹdẹ, I ma he hunwan ẹdẹ ra ne I khui egbe ye owa, rhunmwuda ighẹ ohan ogie iran mu mwẹ.

³⁵ “A i miẹn ne ọ gha danmwehọ ẹmwẹ ne I guan ra? I vẹn ihẹn adeghẹ ẹ i re ẹmwata ehia khin. Gie Osanobua ne Udazi zẹ ẹmwẹ wanniẹn mwẹ. “Akpawẹ te a gbẹnnẹ ehia ye otọ nian, ighẹ ifi ẹzọ ne iran ni gunmwẹ gui ba mwẹ re, ne I miẹn ehe na gha bẹghe iran,

³⁶ I gha muẹn yan izabọ ya gha hio, I gha muẹn rhuẹ ye uhunmwu zẹ vbe ẹde.

³⁷ I gha talọ emwi ne I he ru hia ma Osanobua, egbe ghẹ gha mu mwẹ wẹsẹwẹsẹ vbe odaro ẹre.

³⁸ “A deghẹ te I dẹ otọ ne ugbo mwẹ mu, a na gbe emwa ne ọ wa yan rẹn miẹn iran ẹre —

³⁹ a deghẹ I re vbe evbare ne ọ zọ vba, a na giẹ ohanmwẹ gha gbe avbe ọwẹe ni gbe ẹe —

⁴⁰ ẹghẹ nii, ne ọka ẹsin kevbe ọka irhuarhua gha na te zọ vbọ, ogigban kevbe ọkọsọ ọ re ọ gha zọ ladian.” Ẹmwẹ ne Job talọe fo nẹ.