Job 30 - Edo Bible (E Baibol Ẹdo) Version 1996

¹ Sokpan, emwa ni ma sẹ ihua mwẹ gha ya mwẹ gbe ogie nian. Emwa ne erha iran ma sẹ ọmwa ne I gha giẹ lele ekita mwẹ, ne iran ya gha gbe aro ghe ohuan mwẹ.

² Emwa ne esagiẹn ọnrẹn wọn ẹvbi nẹ, ne obọ ẹre ighi guọ emwi rhọkpa ya ru mẹ.

³ Obọ gbe iran sẹ vberriọ, wẹ rhunmwuda ohanmwẹ dan ne o gbe iran, iran ghi gha lue inian erhan ni kaka nẹ; vbe asọn kevbe ehe ne ọ de ivbiẹ.

⁴ Iran vbọlọ ivbi erhan ato gha re, uhin ya sẹ egbe erhan owẹ ne ẹ i mwẹ omiẹnmiẹn,

⁵ Te emwa hia kpe khulo iran ladian, vbene a miẹn wẹ oyi ọ re iran go yan.

⁶ Iran na ya gha di uvun okuta ya, avbe uvun ne a tọnnọ ye ototọ oke.

⁷ Iran ghi gha go vbe oha zẹ vbe atita, iran ghi ma yan egbe vbe ototọ erhan.

⁸ Ẹwobi emwa ni ku ogboi nẹ, a keghi khulo iran hin ẹvbo rre.

⁹ “Eban nian, mẹ iran ghi do gha giẹ, emwi igbogiẹ ọ re I ghi khin ne iran.

¹⁰ Te iran ghi sọnnọ mwẹ, iran wẹ iran maa sẹ mwẹ gbe, iran gha bẹghe mwẹ, iran ghi gha tulo asẹn yọ mwẹ aro.

¹¹ Rhunmwuda ne Osanobua na ya mwẹ khian ne ọ mitan ne ẹ i miẹn emwi ru. Te iran ghi wa ye ẹtin iran hia ye ọkpankpan yọ mwẹ egbe.

¹² Otu igbinna ẹrhia na keghi wa kugbe dekun mwẹ, iran zẹ mwẹ khu; iran mu egbe igbinna ọnaghinọ.

¹³ Iran khui ehe ne I gha la lẹfua, iran na wẹ ne iran wa fuẹn mwẹ uan; a i miẹn ọmwa ne ọ wẹ iran dobọyi.

¹⁴ Iran ya uhunmwu ha ehe ne I ya khẹ egbe, iran sannọ yan mwẹ ke odukhunmwu rre,

¹⁵ afianma gbe mwẹ fi otọ; uyi mwẹ hoho ua zẹ vbe ẹhoho ne ọ vẹ kua. Kevbe emwi ẹfe mwẹ zẹ vbe okuku amẹ.

¹⁶ “Odẹ ẹrinmwi ọre I ghi gbẹn na; oya ne I re i mwẹ erọkhọrọkhọ.

¹⁷ Asọn gha rre, ugboloko hia ghi gha kpe mwẹ; obalọ ne ọ rriọmwẹ uan i dobọyi.

¹⁸ Osanobua dobọ mu mwẹ urhu nẹ, ọ keghi khiẹn ukpọn yọ mwẹ ẹkun.

¹⁹ Ọ rhie mwẹ fianmwẹ otọ vbe uwu ọrho; mẹ ma ghi ma sẹ iruẹn tobọ ọre.

²⁰ “I tu tie ruẹ Osanobua, sokpan u ma khuẹnniẹn mwẹ, I vbe na erhunmwu, u ma zẹ yọ mwẹ ẹre.

²¹ Obọ dan ọ re uwa ya mu mwẹ na, u wa ya ẹtin ruẹn hia gha khu mwẹ khian.

²² U giẹ ẹhoho hoho mwẹ gha rrie, u kegha fi mwẹ yo fi mwẹ rre, vbe uwu okpẹhoho amẹ ne ọ gbinna.

²³ I rẹnrẹn ighẹ uwu ọ re u rhie mwẹ rrie na, ẹmwẹ agbọn ne a mwamwa khẹ emwa hia.

²⁴ Vbu a na gu ọmwa ne ẹki agbọn gbe nẹ gbinna hẹ yi? Ọmwa ne ẹ i ra miẹn emwi ru gberra, ne ọ diguẹ nọ itohan.

²⁵ Mẹ ma gu enọmiẹn ibaro viẹ ra? Ọma vbe danmwẹ ne iran ne ẹ i mwẹ.

²⁶ Ọyẹnmwẹ kevbe uwanmwẹ ọre I te rhie aro yi, sokpan ibaro kevbe ebiebi ọ re I ghi miẹn.

²⁷ Ohawa kevbe obalọ yanghan mwẹ uan, oya ke ẹdẹ dinna ẹdẹ ọ re I re.

²⁸ Ekhọe akhiẹ ọ re I dada khian, vbene uwanmwẹ ọviẹn i na vbe rrọ. I kpaegbe vbe aro agbọn hia rinmwian iyobọ.

²⁹ Urhu mwẹ keghi vuọn ne akhiẹ kevbe ohioro, ọ yevbe utumwẹ akuaghagha ra ugomugo.

³⁰ Ikpakpa egbe mwẹ keghi khian enekhui, egbe mwẹ tọn rhunmwuda ọnii.

³¹ Ehe ne I na te họn emwi ne a kpe ne ọ rhiẹnrhiẹn yi, ẹzọ uwunu kevbe eve ọ re I ghi họn vbọ.”