Job 3 - Edo Bible (E Baibol Ẹdo) Version 1996

E Job Gui Ma Osanobua

¹ Vbe okiekie, e Job keghi rhan unu ẹnrẹn, ọ na guan, ọ keghi ya amẹ unu ne ẹdẹ ne a biẹ ọe. E Job keghi kha wẹẹ,

^2-3 “Osanobua, fi ẹde ne a biẹ mwẹ unu. Fi ẹre unu ighẹ asọn ne a hanmwa mwẹ.

⁴ Osanobua fi ẹdẹ nẹdẹrriọ werriẹ khian ebiebi. Ghẹ dọlegbe ye ẹdẹ nẹdẹrriọ rre. Ghẹ giẹ uwanmwẹ dọlegbe wan yọ.

⁵ Gi ẹe khian ẹdẹ akhiẹ kevbe ebiebi ne ọ mwẹ imi, ye okuku amẹ gue ẹre, ne u khiẹn owẹn fua vbọ.

⁶ Khiẹn ẹdẹ nẹdẹrriọ hin ukpo rre, ghẹ giẹ a ghi ka ẹe ba ẹre ọvbehe.

⁷ Ya ẹe khian asọn ọ dihoi rua ne ọyẹnmwẹ i ye.

⁸ Tama avbe oso ya amẹ unu ne ẹdẹ nẹdẹrriọ, iran ni mwẹ asẹ vbe uhunmwu avbe Ugbogiorinmwi amẹ.

⁹ Ghẹ giẹ orhọnmwẹ owiẹ wan uwanmwẹ yọ, rhie idaehọ ẹdẹgbegbe hin asọn nii rre.

¹⁰ Fi asọn nii unu, ne ọ na giẹ a biẹ mwẹ, ne a na do rhie mwẹ uhunmwu da oya vbe usẹ.

¹¹ “Vbọ rrọọ akpawẹ uwu ẹko iye mwẹ ọre, I wu yi, ra ne I lahin rre vbe a wa da biẹ mwẹ.

¹² Vbọzẹ ne iye mwẹ na mu mwẹ yan iguẹ? Vbọzẹ ne ọ na vbe gha ya mẹ wẹn.

¹³ Akpawẹ te I wu, uwu ikẹtin ọ re I ghẹ gha ye nian,

¹⁴ I ghẹ ghi gha vbiẹ zẹ vbe avbe ọba kevbe irriegie, ni dọlọ ẹguae ẹghẹ nẹdẹ bọ,

¹⁵ I ghẹ ghi gha vbiẹ zẹ vbe ivbiọba, ni ya igoru kevbe esiliva vuọn owa iran.

¹⁶ Ra ne I gha vbiẹ vbe ọmọ ne ọkpa ma gbe ifuẹn na,

¹⁷ Uwu idin ọ re emwa dan na dobọ iba yi. Iran ne iwinna wọ ẹre egbe ghi miẹn ehe na hẹwẹ.

¹⁸ Ọfumwegbe ghi sẹ avbe oleghan obọ, iran fe vbe obọ uvannọmwẹ kevbe uhunmwu ọkpannike.

¹⁹ Agbọn hia rre evba, iran ni hin usi kevbe ne a ma rẹn, avbe eviẹn ghi do khian ni yan egbe iran.

²⁰ “Vbọzẹ ne a na giẹ emwa gha tọ ye usẹ yi? Ne a na vbe rhie uwanmwẹ ne nọ khiẹ?

²¹ Iran gha khẹ uwu sokpan iran i miẹn. Idin ọ re ọ ghi yẹ iran sẹ emwi ighobioye hia.

²² Iran imwẹ ẹko nọ rhiẹnrhiẹn vbe ẹ i re te iran wu nẹ ne a re iran.

²³ Osanobua mu aro ye ẹmwẹ ẹdẹnakhuẹ iran. ọ na gba ogba ga iran egbe hia.

²⁴ Evbare I gha te re, sokpan I gha khiẹ, mẹ i sẹtin dobọ ikhiẹkhiegbe yi.

²⁵ Emwi hia ne ohan rẹn mu mwẹ, kevbe ne afianma rẹn fian mwẹ hia do sunu.

²⁶ Ọfumwegbe i rrọ, ikẹtin irrọ mẹ. Ọlọghọmwa mwẹ i vbe mwẹ ufomwẹ.”