Job 29 - Edo Bible (E Baibol Ẹdo) Version 1996

Ẹzọ Okiekie Ne Job Gui

¹ E Job keghi dọlegbe suẹn gha guan, ọ wẹẹ,

² “Akpawẹ ẹdagbọn mwẹ gha ye sẹtin do dọlegbe gha ye vbene ọ te ye ẹkpo ne Osanobua na gha wan lẹga mwẹ nian.

³ Ẹghẹ nii, te Osanobua wa gha gun mwẹ rrọ vbe ẹghẹ hia. Ọ na gha rhie uwanmwẹ mẹ vbe I a gha khian vbe ebiebi.

⁴ Ẹghẹ nii, agbọn keghi wa gha ma mwẹ. A gu Osanobua ru ẹse kevbe tan ifuẹn gue owa mwẹ.

⁵ Ẹghẹ nii, Osanobua ne Udazi gunmwẹ rrọ, avbe ivbi mwẹ hia keghi yọyọ lẹga mwẹ.

⁶ Ewẹn ẹmila kevbe ọghe ẹwe mwẹ, keghi gha la ẹsẹse, erhan oliv mwẹ kegha wan vbe otọ ne okuta ghi na bun sẹ.

⁷ Ediọn ẹvbo gha ko, I na tota ba iran,

⁸ ibiẹka gha bẹghe mwẹ, iran ghi hẹko biegbe, eniwanrẹn ghi gha kpaegbe ya ọghọ mẹ.

⁹ Avbe ọkaolotu emwa ghi dobọ ẹmwẹ ne a guan yi,

¹⁰ avbe emwa ni hin ukhuan sẹẹ ghi gbẹdọ.

¹¹ “Ọmwa ne ọ rhirhi miẹn mwẹ, ra ni rẹn mwẹ, gha miẹn emwi ọkpa ne ọ maa ta vbe ekpa mwẹ wẹ ghe emwi ne I ru.

¹² Avbe ivbiogue gha tu ladian, I ghi yi iran obọ. I kegha ru iyohọ ne avbe emọ ne ẹ i mwẹ erha, ni ma miẹn emwa tu ma.

¹³ Emwa ne ẹmwẹ agbọn hie ẹre uke kegha tian mwẹ, I keghi yi avbe ẹgbẹ obọ ne ẹkun sẹ iran otọ.

¹⁴ Uhẹn uhẹn ọ re I hẹko gha ru emwi re.

¹⁵ I kegha re aro ne arhuaro, kevbe owẹ ne uke.

¹⁶ I keghi mudia ye ihe erha ne ivbiogue, I na gha mu ẹzọ orhunmwuyẹn ne ẹ i mwẹ evbare gui.

¹⁷ I fuẹn ẹtin emwa dan an, I na miẹn avbe oghunmwu iran fan.

¹⁸ “Te I wa rhie aro ye utọmwẹ vbe ẹghẹ hia, kevbe ne I wu vbe ọfumwegbe ye owa.

¹⁹ I keghi ye vbe erhan ne inian rẹn miẹn amẹ vbe ẹghẹ hia kevbe ne evbu tuo ye avbe abọ ẹre.

²⁰ Te emwa hia wa gha tian mwẹ khian, orhiọn mwẹ ma vbe hiẹ mwẹ ghe ẹdẹ ọkpa.

²¹ I gha bu emwa ude, iran ghi hunwan. Iran ghi kakabọ danmwehọ ẹmwẹ ne I ta;

²² iran i vbe miẹn ẹmwẹ rhie ba ẹre vbe I a guan fo nẹ. Ẹmwẹ ghi la ekhọe zẹ vbe ikpamẹ,

²³ emwa hia ọ re iran wa maa na, zẹ vbene amẹ maa ne ọwẹe vbe uyunmwu.

²⁴ I ghi mumu ogiẹ yan iran vbe ẹtin a te fo iran nẹ, aro ne rọkhọ mwẹ ghi rhie igiọdu ne iran.

²⁵ I ghi mu unu gha ta emwi ne a gha ru, I ghi ke odaro ne iran zẹ vbene ọba ke odaro ne ivbiyokuo irẹn. I ghi fu iran ẹko rre vbe egbe a ghi wọ iran ye otọ nẹ.”