Job 28 - Edo Bible (E Baibol Ẹdo) Version 1996

Utianmwẹ Ẹwaẹn

¹ “A miẹn uvun ne a kẹ zẹlẹ esiliva ladian vbe uwu otọ; a miẹn ehe ne a na ya erhẹn kpe igoru huan.

² Uwu otọ ọ re emwa ke tọnnọ ematọn ladian, o ghi vbe ranran oze ke uwu okuta ladian.

³ Emwa ye gualotọ ehe ne ọ dinmwi vbe uwu otọ. Iran ghi gualotọ ehe ne ọ dinmwi vbe uwu otọ. Iran ghi gha tọnnọ gualọ okuta nekhua khian vbe ebiebi.

⁴ Ehe ne ọ wa rrei ne ọmwa iye, Ra wẹ ne owẹ ọmwa ma he rhanmwẹ ọẹn ẹdẹ. Emwa ghi tọnnọ uvun ne a ke zẹlẹ emwi ighobioye ladian, iran ghi sikan mu irri vbe uwu uvun nii.

⁵ Uwu otọ ọ re evbare ke zọ ladian, Sokpan, vbe ototọ ẹre ighẹ nene otọe na, a yanghan emwi hia a, a kevbe rẹnkhẹn ehia a.

⁶ E safaya rre uwu okuta ni rre otọ, igoru vbe rre ebubẹ ni rrọọ.

⁷ Ahua i miẹn ehe ne a la la uvun emwi ighobioye vbe uwu otọ, ugu i vbe tin la uhunmwu iran gberra.

⁸ Oduma ra aranmwẹ dan ọvbehe, ne ọ la odẹ ne ọ de ivbiẹ ni i rrọọ.

⁹ “Emwa ye tọnnọ uwu okuta ne ọ wegbe sẹẹ, iran tọnnọ oke nekhua la ẹzi hẹ kua.

¹⁰ Ehe ne iran na tọnnọ uvun zẹ odẹ la uwu okuta gberra ni, iran ghi gha miẹn avbe okuta ighobioye.

¹¹ Iran tọnnọ uvun ya sẹ ehe ne ẹzẹ na suẹn. Iran wọlọ otọ emwi ni rhie egbe lẹre ladian.

¹² “Sokpan de ehe ne a gha na miẹn ẹwaẹn? De ehe ne a gha na ruẹ vbene a ya miẹn ẹwaẹn?

¹³ A i miẹn ewaẹn vbe uwu ẹbu emwa, ọmwa ne ọ mobọ rẹn igho ẹre ẹ i rrọ.

¹⁴ Odin avbe okun kevbe ẹzẹ nekhua, ta ẹe wẹ a i ra miẹn ẹwaẹn vbe evba.

¹⁵ A i sẹtin ya esiliva ra igoru dẹ ọẹ,

¹⁶ Igoru ne ọ ghi maa sẹẹ, ra ikpẹrọnmwọ ighobioye. I sẹtin vba igho ẹre.

¹⁷ Igho ẹre sẹẹ ọghe igoru, sẹ ovbiukpu itegbe ra ukpu ne ọ ghi mose sẹẹ ehia.

¹⁸ Igho ẹwaẹn kpọlọ sẹ, igho ivie ra ekristal ra e rupi.

¹⁹ Etopas ne ọ mose sẹ kevbe igoru ne ọ huan sẹẹ ehia, i zẹdẹ re ne a ya giẹ ive ẹwaẹn.

²⁰ “De ehe ne ẹwaẹn ghi ke rre yi khekherriọ? De ehe ne ima gha na ya ruẹ vbene a ya rẹn otọ emwi hẹ?

²¹ Emwi ne a yi ọkpa ne ọ gha sẹtin bẹghe ẹre i rrọọ. Ya sẹ egbe ahianmwẹ ne ọ tin khian.

²² Uwu kevbe ọfuan tobọ iran miẹnkue wẹẹ, ‘Awẹawẹ ọ re iran he họn vbe ekpa ẹre.’

²³ “Osanobua ọkpa ọ re ọ rẹn nene odẹ. Ọ rẹn ehe ne a gha na miẹn ẹwaẹn.

²⁴ Rhunmwuda, te irẹn bẹghe ehe ne agbọn sẹe. Ọ bẹghe emwi hia, ni rre ototọ iso.

²⁵ Ẹghẹ ne Osanobua na rhie ẹtin ẹhoho ne ẹẹn, ne ọ na vbe mwa vbene okun gha kpọlọ sẹ hẹ.

²⁶ Ẹghẹ ne Osanobua na ta ehe ne amẹ gha gha rhọ yi, kevbe odẹ ne avan nukhunmwu gha khian la.

²⁷ Ẹghẹ nii ọ re irẹn na miẹn Ẹwaẹn, ọ na mwa inu igho ẹre ghe — rẹn keghi ya obọ yọ vberriọ.

²⁸ Osanobua keghi tama emwa nagbọn wẹẹ, ‘Deghẹ wa ho ne uwa gha wan, wa ghi gha ya ọghọ ne Nọyaẹnmwa. Ne uwa miẹn ehe na rẹn otọ emwi, te uwa gha fiwerriẹ hin ọkhọ rre.’ ”