Job 27 - Edo Bible (E Baibol Ẹdo) Version 1996

^1-2 E Job keghi dọlegbe suẹn gha guan ọ wẹẹ, “I ya ẹe vin ihẹn ighẹ Osanobua ne Udazi ne ọ rrọọ, ne ọ ma giẹ a bu asẹ mẹ. Ọ na ya ẹdẹ agbọn mwẹ khian nọ rriara wẹ,

³ vbe uwu ẹghẹ ne Osanobua gha rhie mẹ ya hiọnrọn sẹ,

⁴ akhuarhamwunu mwẹ i ra ta ẹmwẹ dan, aranmwẹ mwẹ i ra ta ohoghe.

⁵ I i ra ta ẹe ẹdẹ ighẹ ẹmwata ọ re uwa na ta; te I ra mu ẹẹn gba ye unu gha ta wẹ I ma rriabe, ọ te do sẹ ẹdẹ ne I ra wu.

⁶ “Te I ra gha ta ẹe khian ighẹ I ma rukhọ; ekhọe mwẹ ma bu abe gbe mwẹ.

⁷ “Iran hia ni mu aro da mwẹ gha gunmwẹ gbinna, te a gha rri iran oya zẹvbe emwa dan ni i ru emwi esi.

⁸ De idaehọ ne emwa dan mwẹ yi, vbe ẹghẹ ne Osanobua gha na nọ orhiọn iran vbe obọ iran.

⁹ Ukpokpo gha rre, Osanobua gha họn utumwẹ iran ra?

¹⁰ Oghogho ne ọ rhie rre gha te gha yẹ iran. Te iran gha na erhunmwu gha ere vbe ẹghẹ hia.

¹¹ “Gunmwẹ ma ruẹn vbene orhiọn Osanobua kpọlọ hẹ, ne I vbe rhan otọ emwi ne Osa ne Udazi mwamwa ye otọ.

¹² Ẹn o, a rhe ta ẹẹ na, wa tobọ uwa ya aro uwa miẹn ọẹn nẹ; vbe uwa a ghi na guan ẹmwẹ oya vberriọ hẹ yi?

¹³ “Vbe nian zẹẹ ọre Osanobua ya rria iran ikhi ighẹ emwa dan ne isamwisan.

¹⁴ Iran sẹtin gha mwẹ emọ ikpia nibun sokpan, okuo ọre iran gha na gbele ehia a. Ivbi iran ma he miẹn evbare re ne ẹko vuọn ẹdẹ.

¹⁵ Iran ni vbe miẹn uhunmwu vbọ, emianmwẹ ọ ra gbele iran. A mwẹ iran ni de ẹgbẹe i ra vbe khiẹ iran.

¹⁶ Ọmwadan sẹtin gha mwẹ esiliva ne ẹ i sẹtin ka, kevbe avbe ukpon ni bun sẹẹ ne ọmwaikọmwa gha sẹtin lo.

¹⁷ Sokpan emwa esi esi ọre ọ ra do rhuan ukpọn ni, kevbe emwa ekhọe esi eso ọre ọ ra viọ esiliva ni.

¹⁸ Ọmwa dan ghi bọlọ owa zẹ vbe ido akpakpa, ra zẹ vbe irhu ọviẹn ne ọ khẹ ugbo,

¹⁹ Uhukpa, ẹdẹ ọkpa, iran ya lovbiẹ zẹ vbe ọmwa ẹfe, iran ghẹ ghi rhiọrre, iran ghi ho ẹfe iran bẹkun.

²⁰ Orrirri gha gbe ku iran zẹ vbe okpamẹ udomwurri; efi ne ọ lae vbe asọn ghi kpolo iran gha rrie,

²¹ ẹhoho odẹ ahọ ghi kpolo iran hin owa iran rre;

²² ọ gha hoho yan iran vbe ne ẹ i na mwẹ itohan. Vbe iran gha te gha ziga ne iran lẹkua.

²³ Ẹhoho ghi gha so yan iran vbene iran ya rhulẹ khian ni, Ọ ghi gha ye ẹtin ọfuan runran iran.”