Job 24 - Edo Bible (E Baibol Ẹdo) Version 1996

¹ “Vbọzẹ ne Osanobua na ma rhie ẹghẹ ibuohiẹn ye otọ yi. Ẹdẹ ohiẹn ata ne iran ni ga ẹe?

² “Emwa ghi gha silo irri ne a ya fian uwu, ne iran miẹn ehe na mu otọ ba otọ. Iran gha du ohuan mu, iran ghi ya mu ba oghẹn ohuan iran.

³ Iran ghi mu ekẹtẹkẹtẹ ọghe emọ ne ẹ i mwẹ erha, iran ghi da ẹkhuia ẹmila ẹgbẹ yi ọ te do ha iran osa ne ọ re vbe obọ iran.

⁴ Iran i giẹ emwi ne ọ khẹ ke ovbiogue sẹ ọre obọ. Iran ghi khu e ne ẹ i mwẹ ne ọ ya lẹre.

⁵ “Rhunmwuda ọnii, avbe ivbiogue ghi gha gualọ evbare, vbe ẹgbo ne ọ kae, zẹ vbe ekẹtẹkẹtẹ oha. Ehe ọvbehe i ghi rrọ ne iran na miẹn evbare rhie ne emọ.

⁶ Iran imwẹ ugbo ne a na rhọ emwi okọ, iran ghi ya gha rhọ ni kharha kua vbe ugbo emwa dan.

⁷ Asọn gha rre, iran ghi lovbiẹ vbe ne a i na ye ukpọn hin egbe. Emwi ne iran ya gbe oni i rrọ.

⁸ Amẹ ni rhọ vbe uhunmwu oke ghi gbe iran. Iran ghi ya si mama ye ọkpẹn okuta nekhua ne ọ degue iran.

⁹ “Emwa dan ghi gha ya emobọ ne ẹ i mwẹ erha ru eviẹn, ọ ghi viọ ivbi ovbiogue ya ha osa.

¹⁰ Sokpan, te ivbiogue gha ya irhunmwirhun ladian. Ohanmwẹ ghi gha gbe iran vbe iran a gha fian ọka.

¹¹ Iran ghi gha minọ ẹvbi oliv ladian, iran ghi vbe minọ ayọn alimo ladian, sokpan, ovbamẹ amẹ ghi gha gbe iran tobọ iran.

¹² Iran ne a kuanrẹn kevbe ni wulo khian, gha tulo vbe avbe ore nekhua, sokpan, Osanobua i zẹ ye erhunmwu iran.

¹³ “Emwa eso rrọ ni he uwanmwẹ ye otọ. Iran ma rẹn otọ ẹre ra ne iran la ehe ne ọ viọ iran la.

¹⁴ Ẹdẹ gha da gbe, izigha ghi kpaegbe, ọ ghi ladian ya gbe ovbiogue ua, asọn gha rre, ọ ghi gha rha.

¹⁵ Ọmwa ne ọ miẹn amwẹ ẹrrẹe ghi gha khẹ ne ẹdẹ gha gue, ọ ghi mu emwi gue aro ne ọmwarhọkpa ghẹ bẹghe irẹn.

¹⁶ Asọn gha rre, oyi ghi gbe urho la owa, sokpan, ọ gha sẹ avan, iran ghi lẹre, iran ghi gha lẹ ne uwanmwẹ.

¹⁷ Ohan uwanmwẹ vbe mu iran, sokpan asọn i mwẹ orrirri vbe obọ iran.

¹⁸ “Orogho ghi lẹ emwa dan kua Osanobua fi otọ ẹre unu. Ẹ i ghi yo ya winna vbe ogba azara ẹre.

¹⁹ Zẹ vbe ne esia khian ne ahobẹkun vbe owowo kevbe uyunmwu, erriọ ọ re a ho ọmwa dan bẹkun vbe otọe emwa ni ma he wulo.

²⁰ Uhin ighẹ iye ẹe ma ghi ye ẹre rre nian, ọkhọe rriọ rua, ọ kẹkẹ ua vbe erhan ne ọ de.

²¹ Emwi vberriọ mian rẹn rhunmwuda obọ dan ne ọ ya mu avbe ẹgbẹ, ọ ma vbe tohan avbe agan.

²² Osanobua ya ẹtin ẹnrẹn fuẹn iran ni wegbe ua. Osanobua ru emwi, ọmworukhọ wu fua.

²³ Osanobua sẹtin giee gha rrọọ vbe a i mwẹ ẹbe, sokpan ọ wa baba ẹe vbe ẹghẹ hia.

²⁴ Agbọn ghi gha maa ọmwa dan vbe ovbi ẹghẹ kherhe, sokpan, banbanna, ọ ghi luẹluẹ ua vbe irunmwu. Zẹ vbe ukhu emwi okọ ne a fian gbotọ.

²⁵ De ọmwa ne ọ gha sẹtin kha yi ighe ẹ i re erriọ ọ na gele ye? Ọmwa rhọkpa gha sẹtin rhie maa ra wẹ, ẹmwẹ ne I ta ẹe i re ẹmwata?”