Job 20 - Edo Bible (E Baibol Ẹdo) Version 1996

^1-2 Ẹre Zofa ne ovbi e Naamat na wanniẹn wẹẹ, “E Job, u wa vulo mwẹ ẹko kpao. I i ghi zin egbe, I gha wa guan.

³ Ẹmwẹ ne u guanrẹn, ẹbọ ọre u tie re. Sokpan, I gha guara rhie ewanniẹn nuẹn.

⁴ Vbe ne a i na gbe awẹawẹ, wẹ rẹnrẹn wẹ ke ẹghẹ nẹdẹ gha dee, vbe ẹghẹ ne a na yi ọmwa ye agbọn na okao okao,

⁵ a ma he miẹn ọmwa dan ọkpa ne egbe rọkhọe kpee vbotọ.

⁶ Ọ sẹtin wan gbighidi, ọ ghi ya tan sẹ iso, ọ ghi kpọlọ sẹrriọ wẹ uhunmwu ẹnrẹn ghi gha dekan ikpakpa iso,

⁷ sokpan, a gha hoho ẹe kua vbe ebubẹ.

⁸ Te a ra ho ẹre bẹkun vbe imina zẹ vbe umian ne a miẹn vbe asọn. A i ghi dọlegbe miẹn ọẹn ọvbehe.

⁹ A ghi ho ẹre bẹkun vbe ehe ne ọ te ka ye;

¹⁰ ivbi ẹre ghi mu osa emwi ne o do hẹ hae vbe ọghe avbe ivbiogue.

¹¹ Te egbe ẹre te ye vbe ọ ghe ọvbokhan ọ keghi vbe wegbe. Sokpan ọ gha khian ebubẹ ban

^12-13 Ọkhọ rhiẹnrhiẹn ọẹn vbe unu sẹrriọ ne ọ na koko eso ye unu ne ọ gha winhin so ẹe.

¹⁴ Sokpan ọ ghi sẹ ẹko ọ keghi gha rriara zẹ vbene eruanikeruan ghẹ ghi sẹtin rriara sẹ.

¹⁵ Ọmwa dan ghi kpa ẹfe ne ọ do hẹ ladian Osanobua ghi rhie ẹre ke uwu ẹkpokhurhu ẹre ladian.

¹⁶ Emwi ne ọmwa dan mi re te ọ ye vbe eruan te ọ gbe ẹe rua zẹ vbene obi ẹyẹn dan sae.

¹⁷ Rẹn i ra gha rrọ ne ọ miẹn ẹzẹ ofigbọn oliv. Ra avbe ẹzẹ ne ọ lẹ owọn kevbe ewẹn ẹmila.

¹⁸ Te ọ ra sẹ emwi ne ọ miẹn ẹsọn yi hia rae; ẹ i ra miẹn otọ ya ye ẹfe ẹre ru,

¹⁹ rhunmwuda ne ọ na yan gbe iran ọ na vbe gha zẹ ivbiogue kpokpo ọ na ya iwegbe mu owa ne ọmwa ọvbehe bọe.

²⁰ Ẹko i vuọn ufifimwẹ ọnrẹn.

²¹ Ọ gha rri evbare, ẹ i vbe kẹrre, banbanna nian, ẹfe ẹre sẹ ufomwẹ nẹ.

²² Umamwẹ ọnrẹn ghẹ ghi sẹ ehe ne ọ gha sẹ ukhuamwẹ ọkhọ hia, ghi do rẹnkhẹn ọẹn ruan.

²³ A giee rri emwi ne ọ ho hia, Osanobua gha ya ohu kevbe okuosu rri ẹre oya.

²⁴ Ọ gha te wẹ ne irẹn lẹ fe umozo ematọn, uhanbọ oze ghi hae fua.

²⁵ Ifẹnmwẹ ha ikinnegbe ẹre ladian, esagiẹn ọnrẹn gha nọnọ kua vbe ukpe ọre ne ọ fi wainwain. Okpe udu ne ọ kpe ẹghele de gbe ẹre orhiọn.

²⁶ Emwi hia ne ọ he te khuan ye otọ fuan an; erhẹn ne obọ ọmwa nagbọn ma hie giẹn ọnrẹn giẹn ẹgbẹe ọre hia a.

²⁷ Ẹrinmwi vẹ ọre ua ighẹ orukhọ ọmwa na, agbọn keghi sẹ osẹe gbe ẹe.

²⁸ A gha fuẹn ẹfe ẹre hia a. Vbe uwu amẹ ne ọ lẹ ọghe ohu Osanobua.

²⁹ Erriọ ọre ẹmwẹ ẹdẹ agbọn emwa dan ye. Ẹmwẹ ẹdẹ agbọn ne Osanobua ghae khẹ iran.”