Job 17 - Edo Bible (E Baibol Ẹdo) Version 1996

¹ “Ufomwẹ ẹdẹ agbọn mwẹ rre nẹ. Egbe iregbe ne I ghi ya sẹtin hiọnrọn; emwi ne ọ ghi kẹe mẹ i ghi rrọ gberra idin.

² I miẹn vbene emwa hia yan giẹ mwẹ hẹ.

³ Emwata ọ re I ta na, Osanobua, miẹn mwẹ ẹmwẹ na vbe obọ. Ọmwa ọvbehe I ghi rrọ ne ọ gha ya egbe ba mwẹ vbe ẹmwẹ ne I guan.

⁴ U gbin iran ekhọe ẹwaẹn nẹ. Ghẹ giẹ obọ iran ke okhunmwu mẹ nian.

⁵ Vbene a ta ẹe nẹdẹ wẹ ọmwa rhunmwuda igho ye ọse ẹre ne a vbokho, ẹvbo ẹre ghi rri oya yọ.

⁶ Eban nian, te emwa ghi kpa itan na mẹ. Iran ghi do gha tulo asẹn yọ mwẹ aro.

⁷ Te akhiẹ ghi ra rhu mwẹ aro, te obọ kevbe owẹ mwẹ ghi ye mighan mighan vbe aghọnghọn.

⁸ Izegbe zẹ iran ni wẹ iran ta ẹmwata, ehia keghi kha wẹ ọmwa dan ọre I khin.

⁹ Iran ni khare wẹ adazẹ iran khin, wa dọlegbe rhie ye ekhọe wẹ iran rri asẹ.

¹⁰ Sokpan, iran gha do tẹn yọ mwẹ odaro, I i ra miẹn ọkpa kẹkan ne ọ wan vbọ.

¹¹ Ẹghẹ mwẹ gberra nẹ; iro ekhọe mwẹ hia rriọkua; idaehọ mwẹ wirua.

¹² Sokpan, avbe ẹse mwẹ wẹ asọn ighẹ avan nọ, iran wẹ uwanmwẹ sikẹ emwa na, sokpan mẹ rẹnrẹn ighẹ uwu ebiebi ọre I ye.

¹³ Idaehọ ọkpa ne I mwẹ ọrọre ehe ne iran ni wulo nẹ ye. Ehe ne I gha na lovbiẹ gha vbiẹ vbe uwu ebiebi.

¹⁴ I ghi tie idin wẹ erha mwẹ nọ avbe ọkhọe ni rriọ mwẹ, I ghi tie iran wẹ iye mwẹ kevbe etẹn mwẹ nikhuo ọre iran khin.

¹⁵ De ehe ne idaehọ ghi ye ye mwẹ re yi? Gha ọ yaro kọ ọkpa?

¹⁶ Idaehọ i ra lele mwẹ gha khian, vbe i a gha rrie ehe ne iran ni wulo nẹ ye.”