Job 14 - Edo Bible (E Baibol Ẹdo) Version 19961 “A biẹlẹ ima hia ne ẹ i mwẹ ẹtin kevbe ne ẹ i sẹtin ye egbe ẹre obọ. Agbọn orhikhan ne a i na tọ ọ re ima hia ye. 2 Ma ghi zẹgiẹgiẹ wan, a ghi vbe zẹgiẹ luẹluẹ kua zẹ vbe obobo a ghi ho ima bẹkun zẹ vbe obobo. 3 Wẹ gha zẹdẹ tọn aro mu ghe imẹ hiehiere ra Osanobua? Ra ne u tie mwẹ ye erhan ẹzọ ne u bu ohiẹn mwẹ? 4 Emwi ọkpa ne ọ huanrẹn, ne ọ gha sẹtin ke uwu emwi ne ọ gbe iruẹn zẹ vbene ọmwa nagbọn ye rre, ẹ i rrọọ. 5 A ta ẹe ye otọ nẹ vbene ọ gha tọ sẹ hẹ. Inu uki ne ọ gha ya vbe agbọn. U ta ẹe mu olọ yan rẹn nẹ, ẹ i ghi giẹ a fiwerriẹ. 6 Rhie aro hin ẹre egbe rre ne u sẹ ọe rae, ne u giẹ ẹe vbe zọmọ vbe agbọn usẹ ne ọ ye, a deghẹ ọ gha sẹtin. 7 “Idaehọ ye rrọọ ne erhan ne a tọn gbotọ nẹ. Ọ sẹtin ye vbe fe, ọ ghi zọọ. 8 A gha rhe miẹn ighẹ inian rẹn khian ọmaẹn ighẹ ut ukhunmwu ẹnrẹn wu ye uwu otọ. 9 Vbene amẹ na rrọọ, ọ gha zọ vbe ovbi erhan. 10 Sokpan, ọmwa gha wu, ọghọe wa fo ye evba. Ọ wu nẹ, rẹn ghi ye vbọ nian? 11 “Zẹ vbe ẹzẹ ne amẹ i ghi na lẹ, kevbe avbe odighi ni kae, 12 emwa ghi wulo, iran i ghi rhiọrre ọvbehe, iran i ra rueghe egbe vbe ovbe ne iran ye. 13 “Akpawẹ u gha ya rhie mwẹ lẹre ye ehe ne iran ni wulo nẹ ye nian, ne a rhie mwẹ lẹre ohu ruẹ te do fo, ne u vbe rhie ẹghẹ ne u gha na ye mwẹ rre ye otọ. 14 Ọmwa gha wu nẹ, ọ gha ye rhiọrre do gha rrọọ ra? Sokpan, mẹ gha diakhẹ ẹghẹ ne ọ maa sẹẹ. 15 Ẹghẹ nii u ghi tie, mẹ ghi vbe khuẹnniẹn. Ẹko ruẹ ghi do rhiẹnrhiẹn ghe imẹ ne emwi ne uwẹ yi. 16 Ẹghẹ nii, u ghi gha baba owẹ ne I rhirhi a zẹ, sokpan, u i ghi ra zọ uhio orukhọ mwẹ. 17 U gha yabọ iran, u ghi viọ iran kua, u ghi khiẹn emwi ne I baku ru hia kua. 18 “Ẹghẹ dee ne avbe oke nekhua gha na dele. A ghi vbe bilo avbe oke ne gelete kua. 19 Amẹ ghi gha wiẹn okuta kua, amẹ ne ọ dae ghi kpọlọ ekẹn otọ gha rrie. Ẹghẹ nii, wẹ fuẹn idaehọ a rrọọ ne ọmwa mwẹ kua. 20 Obọ ruẹ ghi gba ọmwa, u ghi rhie ẹre kpao ẹdẹdẹmwẹdẹ. Ọ gha wu, ugbaro ẹre ghi mu khiẹn. 21 Avbe ivbi ẹre gha hin usi sokpan rẹn ighi rẹn, a i vbe tama rẹn vbe a gha fa iran an. 22 Obalọ ne ọ rrọ ẹre egbe ọkpa ọ re ọ rẹnrẹn. Kevbe akhiẹ ne ọ rre ọ re ekhọe.” |
@ The Bible Society of Nigeria, 1996
United Bible Societies