Jerimaia 15 - Edo Bible (E Baibol Ẹdo) Version 1996

Ọwiri Ọghe Ivbi E Juda

¹ Ẹre Nọyaẹnmwa na tama mwẹ wẹẹ, “Ọ gha khọnrẹn ne a miẹn wẹ e Mosis kevbe Samuẹl ọ re ọ mudia vbe emwa na gha rinmwian mwẹ, I i sẹtin tohan emwa na hiehiere. Wẹ ne iran ladian, wẹ ne iran kpao hin odaro mwẹ rre.

² Iran gha nọ ruẹn wẹ de ehe ne iran ra gha rrie, tama iran wẹ I khare re wẹẹ: “Eso rrọ ne emianmwẹ ra gbele ehe ne iran ra gha rrie ọre ọnii khin! Eso rrọ ni gha wulo vbe okuo ehe ne iran ra gha rrie ọre ọnii khin! Eso rrọ ne ohanmwẹ gha gbele ua ehe ne iran ra gha rrie ọ re ọnii khin! Eso rrọ ne a gha viọ ẹre oghunmwu gha rrie. Ehe ne iran ra gha rrie ọre ọnii khin.

³ “Mẹ ne Nọyaẹnmwa ta ẹe nẹ wẹ emwi ohan enẹ ọ re ọ ra rruan iran; a gha gbele iran vbe okuo, ekita gha silo ikun iran gha rrie, ahianmwẹ gha rri iran, aranmwẹ oha ghi rhie ni ghi kẹe.

⁴ I gha ru ẹe ne ohan gbe ku emwa ni rre agbọn, rhunmwuda iran rhunmwuda emwi ne Hẹzekaia ne ovbi e Manasẹ ru vbe Jerusalẹm ẹghẹ re ọna gha ne ọba e Juda.”

⁵ E Nọyaẹnmwa khare wẹẹ, “De ọmwa ne ọ gha tohan uwa ivbi e Jerusalẹm, de ọmwa ne ọ gha vbe khiẹ uwa? De ọmwa ne ọ gha mudia kpee sẹ ne ọ gha na nọ uwa wẹ vbe ọ ye hẹ?

⁶ Wa he mwẹ nẹ, wa keghi vbe fi iyeke gbe mwẹ, rhunmwuda ọnii, ọ re I na niẹn obọ ya rẹnkhẹn uwa a. Rhunmwuda, I ma ghi sẹtin ziengbe ohu ne ọ mu mwẹ.

⁷ I filo uwa ku ẹhoho zẹ vbe ebe ne ọ kakae vbe ẹvbo ni rre otọe na hia. I fuẹn uwa a, wa ne emwa mwẹ, I gbele ivbi uwa, rhunmwuda, wa ma dobọ emwi dan ne uwa ru yi.

⁸ Ikhuo ni dẹgbẹ ni rre otọe uwa, bun sẹ ekhae ni rre ọkpẹn okun. I gbele avbe igbama uwa ye isẹrre I keghi ru ẹe ne usẹ gha sẹ iye iran, I ye akhiẹ nọkhua kevbe ohan fi iran emwi vbe udomwurri.

⁹ Iyọmọ ne emọ ihinrọn wulo, sahẹ, ọ kegha si ọghọnrọn. Ebi avan ro ẹe. A fa ẹre ua, ọ khuọnmwi emianmwẹ udu I gha gie avbe eghian uwa gbele avbe uwa ni ghi ye rre agbọn vbọ. Mẹ ne Nọyaẹnmwa ta ẹe ne.”

E Jerimaia Gui Ma E Nọyaẹnmwa

¹⁰ U miẹn agbọn ne I ye, vbọzẹ ne iye mwẹ na biẹ mwẹ ye agbọn na? Te I ghi gu emwa hia ni rre otọe na gui, I ghi gha gu iran gbe agbanmwẹ I ma rhie igho ne ọmwa mọmọ, I ma mọmọ ọmwa rhọkpa ẹre, sevba emwa hia gha rhovbiẹ mwẹ.

¹¹ E Nọyaẹnmwa, adeghẹ ma ma ga uwẹ ẹse, gie ihẹn ne iran tie sẹ mwẹ egbe. I ma he do rinmwian an ne avbe eghian mwẹ ẹdẹ vbe iran rre uwu ibaro kevbe akhiẹ.

¹² (A i miẹn ọmwa ne ọ gha sẹtin bun ematọn, ibiba ematọn ne a ye oze gua ne ọ ke odẹ okuọ rre.)

¹³ E Nọyaẹnmwa keghi tama mwẹ wẹẹ, “I gha gie avbe eghian rre ne iran do viọ ẹfe kevbe emwi ewe ọghe avbe emwa mwẹ, ne a miẹn ehe na rri iran oya ye orukhọ ne iran hẹẹ gba otọe na hia.

¹⁴ I gha gie iran ya ga avbe eghian iran vbe otọe ne iran ma rẹn emwirhọkpa vbe ekpa ẹre, rhunmwuda, ohu mwẹ yevbe erhẹn, te ọ ra vbe gha yọn rhinrin ẹdẹdẹmwẹdẹ.”

¹⁵ Ẹghẹ nii ọ re imẹ na kha wẹẹ, “E Nọyaẹnmwa, wẹ rẹn vbene emwi yẹ hẹ. Ye mwẹ rre ne u yọmwẹ obọ. Gun mwẹ sẹtin rria iran ni zẹ mwẹ kpokpo ikhi. Ghẹ ziengbe ne obọ iran gba mwẹ ya rhie gbe ua yerre wẹ rhunmwuda ruẹ ọ re a na rhovbiẹ mwẹ.

¹⁶ Wẹ gunmwẹ guan, I keghi rhie ehọ ye ẹmwẹ hia. Ọwuẹ ọ re imẹ khin Nọyaẹnmwa, Osanobua ne Oghodua, rhunmwuda ọnii ẹmwẹ ruẹn keghi ya oghọghọ kevbe ọyẹnmwẹ vuọn ekhọe mwẹ.

¹⁷ I ma lo ẹghẹ mwẹ ya tota ke emwa ọvbehe, ne a gba gha giẹ ra ne avbe gha zọmọ. Zẹ vbene u tama mwẹ, I keghi hẹko tota, mẹ ọkpa vbe ẹhi mwẹ, ohu keghi gba mwẹ ẹko.

¹⁸ De emwi ne I rrioya khian ba? Vbọzẹ ne ẹwẹn mwẹ i na mwẹ ukhunmwu? Vbọzẹ ne iran i na rrie? Te uwẹ ho ne u hiẹ mwẹ ra zẹ vbe ẹzẹ ne ọ kae vbe ẹghẹ uyunmwu?”

¹⁹ Ẹre Nọyaẹnmwa na rhie ewanniẹn ye ọna wẹẹ, “U gha dọlegbe rre, I gha dọlegbe rhan obọ miẹn ruẹn, u ghi dọlegbe gha re ọguọmwadia mwẹ. A deghẹ u mu etalọ oya fua, u na gha ta uhunmwu ne a gie ne ọ mwẹ esa, u gha dọlegbe gha re akhasẹ mwẹ. Emwa ni gha dọlegbe bu ruẹ rre, ẹghẹ i rrọ ne a gha ya miẹn wẹ wẹ ọ re ọ ghi bu iran gha khian.

²⁰ Zẹ vbe ọghe ne ọ kan uwẹ kan iran, I gha ru ẹe ne u gha yevbe ekẹn ne ọ wegbe ne a ye oze gbe. Iran gha guẹ gbinna, sokpan, obọ iran i ra gba ruẹ. I gha mudia ke uẹ ne I degue ruẹ, ne emwi rhọkpa ghẹ ru uẹ.

²¹ I gha miẹn ruẹn fan vbe obọ ẹtin emwa dan kevbe emwa ọkhọ. Mẹ ne Nọyaẹnmwa ta ẹe nẹ.”