I Tẹsalonaika 5 - Edo Bible (E Baibol Ẹdo) Version 1996

Wa Mu Egbe Ye Otọ Khẹ Urremwẹ Nọyaẹnmwa

¹ Etẹn mwẹ, ẹ i re ne I vbe dọlegbe gha gbẹnnẹ ebe gie uwa vbe ekpa ọghe ama, kevbe ẹghẹ ne avbe emwi na gha ya sunu.

² Rhunmwuda, wa tobọ uwa rẹnrẹn wẹ, zẹ vbene oyi rre vbe asọn ọre Ẹdẹ Nọyaẹnmwa khian rre.

³ Ẹghẹ, ne emwa gha na gha kha wẹẹ, “Ore wa ma nian, ẹbe i rre odẹ,” Orriọkhọ ghi de gbe iran vbe udomwurri. Ọkpa ne ọ ra miẹn uhunmwu ẹ i rrọọ, te ọ ra ye vbe obalọ okhuo ne emwi ubiẹmwẹ ru.

⁴ Sokpan, wa ne etẹn mwẹ, wa i rre uwu ebiebi, rhunmwuda, ọnii, ọ ma kei ne Ẹdẹ nii do do uwa mu zẹ vbe oyi.

⁵ Ivbi uwanmwẹ ọre uwa hia khin, ivbi uwanmwẹ ẹdẹ, ma i re ivbi asọn ra ivbi ebiebi.

⁶ Rhunmwuda ọnii, ọ ma kei ne ima gha vbiẹ zẹ vbe iran nekpa, ọ kere ne ima rhiọrre, ne aro gbannọ ima vbe uhunmwu.

⁷ Asọn ọre emwa ya vbiẹ, asọn ọre emwa ya da ayọn ghe egbe.

⁸ Sokpan ivbi uwanmwẹ ẹdẹ ma khin, ọ kere ne aro gbannọ ima vbe uhunmwu. Ọ kere ne ima gbalọ iyayi kevbe aho ẹmwẹ ọmwa ye egbe zẹ vbe uhanhan ẹwẹe, kevbe idaehọ ne ima mwẹ ye imiẹnfan, zẹ vbe ẹrhu ne uhunmwu.

⁹ Osanobua ma tie ima ne ima do rri oya vbe obọ okuosu ẹre, sokpan te ọ tie mwa, ne a do la ekpa Nọyaẹnmwa Jesu Kristi rhie imiẹnfan.

¹⁰ Ọmwa ne ọ wu ne ima, ne ima sẹtin deba irẹn gha rrọọ vbe ẹghẹ ne ọ gha na rre, te ima rre agbọn ra te a wulo.

¹¹ Rhunmwuda ọnọna, wa gha rhie ẹtin ye egbe iwu, wa gha ye egbe obọ zẹ vbene uwa wa ruẹe na.

Ibude Ne Okiekie Kevbe Igiotuẹ

¹² Ma rinmwian uwa etẹn mwẹ, wa gha ya ọghọ ne iran ẹsẹse ighẹ iran ni winna vbe uwu ẹbu uwa, iran ne Osanobua hannọ zẹ ne ọ do gha ma uwa odẹ, kevbe ne iran vbe gha ma uwa emwi.

¹³ Wa kakabọ gha ya ọghọ ne iran, deba aho ẹmwẹ ọmwa, rhunmwuda iwinna ne iran winna. Wa vbe gu egbe gha rrọọ vbe ọfumwegbe.

¹⁴ Ma kakabọ tua unu muẹn ma uwa etẹn mwẹ, wa gha ye obọ sa ekhae ne iran ni si oroho, wa gha rhie udinmwẹ ne iran ni ma din, wa gha ye iran ni ma wo vbe egbe obọ, wa gha mu ẹmwẹ emwa hia wo egbe.

¹⁵ Wa ghẹ ye ọkhọ ha osa ọkhọ, sokpan wa gha ru egbe emwi esi, wa ghi vbe gha ru emwa hia ẹse vbe ẹghẹ hia.

¹⁶ Wa gha sẹ ọyẹnmwẹ vbe ẹghẹ hia.

¹⁷ Wa gha na erhunmwu vbe ẹghẹ hia.

¹⁸ Gha kpọnmwẹ ye emwi ne ọ rhirhi sunu. Erriọ ọre Osanobua ho ne uwa gha ru vbe ẹdẹ agbọn uwa vbe uwu Kristi Jesu.

¹⁹ Wa ghẹ mu idobo ye orhiọn Ne ọ Huanrẹn iwinna.

²⁰ Wa ghẹ gha kpọzọ ẹe rua ighe ẹmwẹ ne a ye aguakpao orhiọn ta.

²¹ Wa gha danmwẹ emwi hia ghe, wa ghi gba enọma vbọ mwẹ obọ.

²² Wa gha lẹ ne emwi dan hia ne ọ rhirhi gha khin.

²³ Te Osanobua ne ọ rhie ọfumwegbe ne ima gha wa ye uwa khian ọghọe fo, ne ọ rhie emwi ne uwa khin hia, egbe, ekhọe kevbe orhiọn uwa mwẹ vbe ne a i na mwẹ abe vbe oghẹ urremwẹ Nọyaẹnmwa Jesu Kristi.

²⁴ Ọmwa ne ọ tie uwa gha ru ẹe rhunmwuda ọmwa ne ẹ i hiẹ ọmwa nọ.

²⁵ Etẹn mwa, wa vbe gha na erhunmwu ne ima.

²⁶ Wa ye isoso unu etẹn tuẹ avbe etẹn hia.

²⁷ I ye asẹ ọghe Nọyaẹnmwa yan ta ẹe ma uwa ne uwa tie ebe na ma avbe etẹn hia.

²⁸ Te ẹsọhẹ Nọyaẹnmwa Jesu Kristi gha gu uwa gha rrọọ.