I Tẹsalonaika 4 - Edo Bible (E Baibol Ẹdo) Version 1996

Uyinmwẹ Ne Ọ Yẹ Osanobua

¹ Vbe okiekie ehia, etẹn mwẹ, wa ruẹ re vbe obọ ima vbene uwa gha ru emwi hẹ, ne uwa gha na yẹ Osanobua. A rẹnrẹn wẹ, erriọ wa wa yin ke ẹghẹ ni gha dee. Wanwanna nian, ma ye eni Nọyaẹnmwa Jesu rinmwian uwa, ma vbe tua ẹre mu unu ma uwa, ne uwa ru gberra vbene uwa ka ru de yi.

² Rhunmwuda, wa rẹn vbene ima tama uwa hẹ vbe ekpa asẹ ne ọ ke obọ Nọyaẹnmwa Jesu rre.

³ Emwi ne Osanobua mwamwa ẹn ne uwa ọna khin, ọ ho ne uwa gha re ne ọ huanrẹn kevbe ne ẹ i mwẹ obọ vbe emwi alama oghẹ hiehiere.

⁴ Dọmwadẹ ọghọe vbe uwu uwa ne ikpia, ghi ruẹ vbe ne a ya ọghọ vbe ute rhie okhuo rọnmwẹ hẹ.

⁵ Ẹ i re rhunmwuda orriarria, zẹ vbene avbe iran ni ga ẹbọ ni ma rẹn Osanobua ru.

⁶ Vbe uwu emwi na, ọ ma kei ne ọmwaikọmwa gha ho ọtẹn ọnrẹn ẹmwẹ, ra ne ọ gha gbe ẹe miẹn ẹre emwi ẹnrẹn. Ma ka ta ẹmwẹ na ma uwa yi, ma na kakabọ ta ẹe ma uwa nian, Nọyaẹnmwa gha rri iran ni ru emwi vberriọ oya.

⁷ Osanobua ma tie ima ne a do gha yin uyinmwẹ alama oghẹ, sokpan ne a do gha re ne ọ mwẹ uyinmwẹ ne ọ huanrẹn.

⁸ Rhunmwuda ọnii, ọmwaikọmwa ne ọ ma rhan obọ miẹn iruẹmwi na, ẹ i re ọmwa ne agbọn ọre ọ ma rhan obọ miẹn ighẹ Osanobua ne ọ rhie nene iruẹmwi rre nọ, ọmwa ne ọ rhie Orhiọn Ne Ọ Huanrẹn ọghọe ne uwa.

⁹ Ẹ i re eban a ghẹ ghi gha gbẹnnẹ ebe gie uwa vbe ekpa wẹ, ọ kere ne uwa gha ho ẹmwẹ ivbi iyayi ne iho uwa, rhunmwuda, Osanobua tobọ ẹre ma uwa ẹre nẹ vbene uwa gha ya gha ho ẹmwẹ egbe hẹ.

¹⁰ Erriọ zẹẹ ọre uwa vbe gha yin ghe etẹn hia ni rre Masidonia. Te ima ghi rinmwian uwa na etẹn, ne uwa ru ne ọ sẹ ọnii.

¹¹ Wa gie a miẹn wẹ te uwa mu aro yọ wẹ, uyinmwẹ ọmẹhẹ ọre uwa khian gha yin, ne uwa hẹko gha ru ọghe uwa, ne uwa gha tobọ uwa khuan igho evbare uwa, zẹ vbene ima ka tama uwa yo.

¹² Wa gha ru vberriọ, iran ni ma yayi ghi gha ghe uwa gẹdẹgbẹẹ, wa i ghi ra vbe ghe ọmwa rhọkpa obọ.

Urremwẹ Nọyaẹnmwa

¹³ Etẹn mwẹ, ma ho ne uwa rẹn ẹmwata ne ọ rre ẹmwẹ emwa ni wulo nẹ, ne uwa ghẹ gha mwẹ irhiaẹko zẹ vbe emwa ne ẹ i mwẹ idaehọ.

¹⁴ Ma yayi wẹ Jesu wu, ọ keghi vbe dọlegbe rhiọkpaegbe, rhunmwuda ọnii, ma yayi wẹ emwa ni ya Jesu yi vbe iran te wulo, Osanobua gha vbe dọlegbe viọ iran lele Jesu gha dee.

¹⁵ Rhunmwuda, emwi ne Nọyaẹnmwa ma emwa ẹre ọre ima tama uwa na, ma ni gha ye gha rre agbọn vbe ẹdẹ ne Nọyaẹnmwa gha rre, ma i khian ke odaro ne iran ni ka wulo nẹ.

¹⁶ A gha họn urhu ne ọ gha datu, urhu ne ọ gha ta emwi ne a gha ru, urhu olotu avbe odibosa, urhu okpe ọghe Osanobua ẹghẹ nii, e Nọyaẹnmwa tobọ ẹre ghi tuorre ke ẹrinmwi gha dee. Iran ni ya Kristi yi vbe ẹghẹ ne iran na wulo, a ghi ka huẹn iran kpaegbe nẹ,

¹⁷ vbe iyeke ọnii, ma ni gha a rre agbọn vbe ẹghẹ nii, a ghi si ima hia koko ba iran vbe ideghedeghe iso, ne a ya vba Nọyaẹnmwa vbe aro iso. Ẹghẹ nii, ma ghi gha gu Nọyaẹnmwa rrọọ ẹdẹdẹmwẹdẹ.

¹⁸ Rhunmwuda ọnii, wa ye avbe ẹmwẹ na gha fu egbe ẹko rre.