I Tẹsalonaika 3 - Edo Bible (E Baibol Ẹdo) Version 1996

¹ Vbe okiekie ehia, ma ma ghi sẹtin ziengbe ẹre. Ma keghi rhunmwuda ọnii wẹ ma ọkpa gha tota ye Atẹns.

² Ne ima gie Timoti bu uwa gha dee, ọtẹn mwa, ọmwa ne ọ gu ima winna ne Osanobua vbe ekpa ne ọ na kpe orhu nene Iyẹn Ne ọ maa ọghe Kristi. Ma gi ẹe bu uwa gha dee ne ọ do yi uwa obọ kevbe ne ọ vbe rhie iyobọ ne iyayi uwa.

³ Wẹ ne ọmwarhọkpa vbe uwu uwa ghẹ rhunmwuda a zẹ ọmwa kpokpo na tota ye owa. Wa tobọ uwa rẹnrẹn wẹ, egbe a zẹ ọmwa kpokpo vberriọ, usun emwi ne Osanobua mwamwa khẹ ima ọre nọ.

⁴ Rhunmwuda, ẹghẹ ne ima na gha rre ehe ne uwa ye, ma tama uwa ye otọ wẹ, a gha zẹ mwa kpokpo, zẹ vbe ne uwa ghi miẹn ọẹn na nian, ọnii ọrọre emwi ne ọ sunu zẹẹ.

⁵ Ọnii ọre ọ si ẹe ne I na gie Timoti, I ma ghi sẹtin zin ẹnrẹn, ọ re I na gi ẹe ne ọ do ghe vbene iyayi uwa ghi ye hẹ. Vbene aro na da ẹe, ẹ i sẹtin gha re wẹ, te Esu do danmwẹ uwa ghe, te ẹsọn ne ima miẹn hia wa la ọ rhiae rrie.

⁶ Banbanna nian, e Timoti ke ehe ne uwa ye rre do vba ima nẹ, ọ keghi vbe do na iyẹn esiesi ọghe iyayi kevbe aho ẹmwẹ ọmwa uwa. Ọ tama ima wẹ, ẹko ima wa ma uwa ẹghẹ hia, kevbe wẹ, vbene ima ho ne ima miẹn uwa, erriọ wa vbe ho ne uwa miẹn ima.

⁷ Rhunmwuda ọnii, etẹn mwa, vbe uwu ọlọghọmwa ne ima ye, kevbe oya ne ima re, a rhie ẹtin ye ima iwu vbekpa uwa. Iyayi uwa ọre ọ rhie ẹtin ye ima iwu.

⁸ Rhunmwuda, deghẹ wa gele mudia gbain vbe uwu iyayi uwa vbe uwu Nọyaẹnmwa, ẹghẹ nii ọre ima na rre agbọn ẹse.

⁹ Vbe ọghe banbanna, ma sẹtin kpọnmwẹ Osanobua ne uwa. Ma ghi kpọnmwẹ ọẹn ye ọyẹnmwẹ ne ọ sẹ mwa vbe odaro Osanobua mwa, rhunmwuda uwa.

¹⁰ Asọn vbe avan ọre ima ya ya ekhọe mwa hia rinmwian ẹn, ne ọ gie ima tobọ ima ye aro kan uwa aro, ne ima miẹn ehe na rhie emwi ne iyayi uwa i te mwẹ yọ.

¹¹ Te Osanobua ne Erha mwa tobọ ẹre kevbe Nọyaẹnmwa Jesu Kristi gha kie odẹ ye otọ ne ima la bu uwa gha dee.

¹² Osanobua ne ọ gie aho ẹmwẹ ọmwa ne uwa mwẹ ghe egbe kevbe emwa ọvbehe gha mu otọ yọ, ne ọ vbe gha kpọlọ zẹ vbe aho ẹmwẹ ọmwa ne ima mwẹ ghe uwa.

¹³ Vbenian ọre ọ ra na ye orhiọn uwa wo vbe egbe, wa ghi do gha re ne ọ gbae kevbe ne ọ huanrẹn vbe odaro Osanobua mwa kevbe Erha mwa, vbe ẹghẹ ne Jesu gha na rre, irẹn kevbe iran ni re ọghọe.