I Samuẹl 4 - Edo Bible (E Baibol Ẹdo) Version 1996

Okuo Khọn Mu Ẹkpẹti Ile

¹ Ẹghẹ nii, ivbi e Filistin keghi mu okuo gie ivbi Izrẹl, ivbi Izrẹl keghi mu agọ ye Ebẹnẹza, ivbi e Filistin keghi bu agọ iran ye Afẹk.

² Ivbi e Filistin keghi wa mu egbe ne iran fi emwi, iyeke vbe iran ghi khọn okuo nọ wegbe nẹ, iran keghi khọn ivbi Izrẹl muotọ, iran keghi gbele omwa arhunmwu arriaisẹn enẹ vbe adesẹ okuo.

³ Iran ni miẹn uhunmwu vbọ ghi dọlegbe sẹ agọ nẹ, avbe ọkaolotu ivbi Izrẹl keghi kha wẹẹ, “Vbọzẹ ne e Nọyaẹnmwa na gie ivbi Filistin khọn ima miotọ ẹrẹna yi? Wa gie ima ya mu Ẹkpẹti Ile ọghe Nọyaẹnmwa ke Silo gha dee ne ọ miẹn ehe na lele ima gha khian, ne ọ ya miẹn ima fan vbe obọ avbe eghian mwa.”

⁴ Iran keghi rhunmwuda onii gie emwa gha rrie Silo, iran na ya mu Ẹkpẹti Ile ọghe Nọyaẹnmwa ne Oghodua, ne ọ tota yan ẹkete ẹre vbe adesẹneva emwi na yi ni mwẹ ifuẹn nii, ivbi Elai eveva Hofnai kevbe Finihaz keghi lele Ẹkpẹti Ile ni gha dee.

⁵ Ugbẹn vbe ẹkpẹti Ile nii ghi wa rre, ivbi Izrẹl keghi wa mu wee sẹrriọ wẹ otọe keghi mu rueghe.

⁶ Avbe Filistin ghi họn uwemwẹ nii, iran keghi kha wẹẹ, “Wa họn vbene ivbi e Hibru wee hẹ vbe agọ iran, vbọ ya de?” Iran ghi họn wẹ, Ẹkpẹti Ile ọghe Nọyaẹnmwa ọ re iran mu rrie agọ.

⁷ Ohan keghi mu iran, iran keghi kha wẹẹ, “Ẹbọ la agọ iran: Ma wiri! Emwi vbenian ma he sunu vbe egbe ima ẹdẹ!

⁸ Gha ọ gha fan ima vbe obọ avbe ẹbọ ni wegbe na? Avbe ẹbọ ni gbele ivbi Igipt ye uwu ato:

⁹ Wa wegbe ivbi Filistin: Wa gbinna zẹ vbe ikpia ne ima ghẹ ya khian eviẹn ne ivbi e Hibru zẹ vbene iran te ka re eviẹn ima. rhunmwuda ọnii, wa gbinna zẹ vbe ikpia!”

¹⁰ Ivbi e Filistin keghi wa kakabọ gbinna, a keghi khọn miẹn ivbi Izrẹl otọ, iran na lẹ gha rrie owa iran. Obọ wa da iran ẹsẹse, iran keghi gbele arhun arriaisẹn ọgban (30,000) vbe ivbi iyokuo Izrẹl,

¹¹ okuo keghi khọn mu Ẹkpẹti Ile ọghe Nọyaẹnmwa iran keghi gbele Hofnai ke Finihaz ne ivbi Elai eveva.

Uwu Elai

¹² Okpia ọkpa vbe uniẹn Bẹnjamin ke ghi lẹfua ke odaro okuo gha die Silo, ọ keghi vbe sẹ evba vbe ẹdẹ ne ẹdẹrriọ zẹẹ. Ọ keghi yanghan ukpọn ye ẹkun, ọ na vbe viọ iku ye uhunmwu zẹ vbe ama ne ọ ya rhie maa ighẹ te irẹn khiẹ.

¹³ Elai keghi tota ye ọkpẹn odẹ vbe ehe ne ọ wa tota yi, ọ na gha ghe umọdia. Afianma keghi wa gha fian ẹn ba ẹmwẹ Ẹkpẹti osẹe ọghe Nọyaẹnmwa. Okpia nii ghi sẹ adesẹneva ẹvbo, ọ keghi na iyẹn, emwa hia kegha tulo rhunmwuda ohan mu iran.

¹⁴ Elai ghi họn owogho na, ọ keghi nọọn wẹẹ, “Vbe avbe utumwẹ na hia ya de yi?” Okpia ni keghi rhulẹ bu Elai ne ọ ya na iyẹn ma rẹn.

¹⁵ (Ẹghẹ na, ukpo eva irrọvbiyisẹn ọ re Elai ghi ye, aro ẹre wa vbe rhu fo nẹ.)

¹⁶ Okpia ni keghi kha wẹẹ, “Odaro okuo ọ re I na lẹ fua, odẹ ni hia ọre I ke mu ulẹ do sẹ emwana ẹrẹna.” Elai keghi nọ rẹn wẹẹ, “Vbe ọ sunu ọmọ?”

¹⁷ Ọmwa ne a gie ẹre uhunmwu ni keghi kha wẹẹ, “Izrẹl lẹ ne ivbi e Filistin, ugbemwẹ oya ọre a gbe ima re! Yevbe sẹ ọnii, iran gbele ivbuẹ eveva a ighẹ Hofnai kevbe Finihaz, okuo kevbe khọn mu Ẹkpẹti Ile!”

¹⁸ Okpia nii ghi wa sunu ye Ẹkpẹti Ile, Elai keghi wa ke emwi ne ọ tota yi vbe ọkpẹn onurho nii werriẹ la odieke fua. Ọ khian ọmaẹn ẹsẹse, ọ keghi wa vbe kpolo, rhunmwuda ọnii, udemwẹ ne ọ de ni keghi bun ẹnrẹn eyaẹn, ọ na wu. Ukpo iyeva ọre ọ su Izrẹl la.

Uwu Okhuo Ne Finihaz Wu Sẹrae

¹⁹ Amwẹ ovbi Elai ighẹ Finihaz kegha hanmwa, uki wa vbe sẹ ọe fo nẹ. Ugbẹn vbe ọ ghi họn ighẹ okuo khọn mu Ẹkpẹti Ile ọghe Osanobua, kevbe wẹ, ke ọdọ ọre kevbe erha ọdọ ẹre wa vbe wulo, emwi ubiẹmwẹ ọbanban keghi wa suẹn ọnrẹn, ọ keghi biẹ.

²⁰ Rẹn keghi wa gha wu khian sokpan okhuo ne ọ mu ẹre emwi ubiẹmwẹ keghi tama rẹn, “Dọlọ aro yi ighẹ okpia ọre u biẹe!” Sokpan, rẹn ma ghi danmwehọ ra ne ọ rhie ewanniẹn ne ẹẹn.

²¹ Ọ keghi he ọmọ ni Ikabọd, ne ọ ya kha wẹẹ, “Uyi Osanobua kpa vbe Izrẹl rre nẹ,” rhunmwuda ne okuo na khọn mu Ẹkpẹti Ile, erha ọdọ ẹre wu, ọdọ ẹre kevbe wu.

²² Rẹn keghi kha wẹẹ, “Uyi Osanobua kpao vbe Izrẹl rre nẹ, rhunmwuda, okuo khọn mu Ẹkpẹti Ile ọghe Osanobua.”