I Samuẹl 11 - Edo Bible (E Baibol Ẹdo) Version 1996

E Sọl Khọnmiotọ Ivbi Amọn

¹ Ọ ghi rre uki ọkpa, e Nahas ne ọba Amọn keghi mu okuo gie Jabẹs ne ọ rre otọ Giliad. Ivbiyokuo ẹre keghi lẹga ẹvbo nii, ọ re ivbi e Jabẹs na khama Nahas wẹẹ, “Gie ima do gba ta ẹe kugbe, ma gha kue ne u gha khaemwisẹ yan ima.”

² E Nahas keghi wanniẹn wẹẹ, “I gha gu uwa ta ẹe kugbe a deghẹ wa kue yọ vbenian: ne I wọlọ aro obọ erha ọmwa ọghe dọmwadẹ ọghe ọe kua ne I ya ọnii fa Izrẹl hia a.”

³ Avbe ọkaolotu e Jabẹs keghi kha wẹẹ, “Rhie ikpẹdẹ ihinrọn ne ima ya gie uhunmwu lele otọe Izrẹl hia. A deghẹ a ma ghi miẹn ne ọ yi ima obọ, ma zẹ egbe mwa obọ ne uẹn.”

⁴ Emwa ne a gie ẹre uhunmwu ni keghi do sẹ Gibea, ẹvbo ne Sọl ye, iran keghi na iyẹn ma iran, ehia keghi gha viẹ rhunmwuda afianma ne ọ fian iran.

⁵ Ẹghẹ na, e Sọl wa ke ugbo dee ke ẹe kevbe avbe ẹkhuia ẹmila ẹre, ọ keghi nọ wẹẹ, “De emwi ne ọ sunu yi? Vbọzẹ ne emwa hia na viẹ yi?” Iran keghi na iyẹn ma rẹn vbene emwa ni ke Jabẹs rre kha hẹ.

⁶ E Sọl ghi họn ẹmwẹ na, orhiọn Osanobua na hin yan rẹn, ohu nọkhua keghi mu ẹẹn.

⁷ Ọ na munọ ẹkhuia ẹmila eva, ọ keghi giagia iran ukhiọnmwẹ ukhiọnmwẹ, ọ na viọ ne emwa viọ la otọe Izrẹl hia khinkhian, ne iran vbe gha kha wẹẹ, “Ọmwaikọmwa ne ọ ma lele e Sọl kevbe Samuẹl ye okuo, vbenian ọ re a ra ru ẹmila ẹre!” Ohan emwi ne Nọyaẹnmwa gha ru kegha mu ivbi Izrẹl, ehia keghi wa vẹ ladian vbene ọkpa ma na vbe ke ẹe vbọ.

⁸ E Sọl keghi si ehia koko vbe Bẹzẹk, ehia kegha re arriaisẹn iyisẹn yan uri (300,000) ni ke Izrẹl rre, kevbe arriaisẹn ọgban (30,000) ni ke Juda rre.

⁹ Iran keghi khama emwa ne iran gie ke Jabẹs rre wẹẹ, “Tama emwa ruẹn wẹ ọ te sẹ ẹghẹ ogiavan akhuẹ, a gha miẹn iran fan.” Ẹko emwa Jabẹs keghi wa rhiẹnrhiẹn uan vbe a ta ẹmwẹ na ma iran.

¹⁰ Iran keghi tama e Nahas wẹẹ, “Ma gha kun bu ruẹ gha dee akhuẹ, u ghi ru ima emwi ne ọ ghi khọn ruẹn.”

¹¹ Vbe owiẹ ne ọ lele ẹe, e Sọl keghi ghae emwa rẹn ye otu eha, ẹdẹ ghi wa da wan, iran keghi vẹ la agọ ọghe eghian iran, iran na ya emwi yan iran ne emwa Amọn. Vbe ọ te sẹ ogiavan, iran gbele iran fo nẹ. Iran ni ghi dekẹe na zagha a, dọmwadẹ ọghe ọe na gha lẹ oghogho.

¹² Ẹre emwa Izrẹl na tama e Samuẹl wẹẹ, “De emwa ne ọ kha re yi wẹ ne e Sọl ghẹ rriọba yan ima, wa viọ iran ladian gie ima, ne ima gbele iran uan.”

¹³ Sokpan, e Sọl keghi kha wẹẹ, “A i gbe ọmwa rhọkpa a ẹrẹna rhunmwuda ẹdẹnẹrẹ ọ re Nọyaẹnmwa miẹn Izrẹl fan.”

¹⁴ Ẹre Samuẹl na tama iran wẹẹ, “Wa gie ima hia gha rrie Gilgal, ne a vbe dọlegbe ma e Sọl ọba mwa.”

¹⁵ Ẹre iran hia na gha rrie Gilgal, evba nii, vbe ehe ne ọ huanrẹn, iran keghi ma e Sọl ọba. Iran keghi si isara, e Sọl kevbe ivbi Izrẹl keghi ghọghọ ye emwi ne ọ sunu na.