Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

I Ọba 9 - Edo Bible (E Baibol Ẹdo) Version 1996


Osanobua Dọlọ Rhie Egbe Maa E Solomọn
( II Krọnikol 7:11-22 )

1 E Solomọn ne ọba ghi bọ Ọgua Osa fo nẹ ke ẹe kevbe ẹguae kevbe emwi ọvbehe ne ọ ho ne ọ bọlọ hia,

2 e Nọyaẹnmwa keghi dọlọ rhie egbe maa rẹn zẹ vbene ọ ru vbe Gibiọn.

3 E Nọyaẹnmwa keghi tama rẹn wẹẹ, “I họn erhunmwu ruẹn ne, I ya Ọgua Osa ne u bọ ẹe khian ne ọ huanrẹn zẹ vbe ehe ne a gha na gha ga mwẹ rhinrin ẹdẹ. I gha gbe aro ghe ẹre, I gha vbe degue ẹre rhinrin ẹdẹ.

4 Banbanna nian, a deghẹ u gha ga mwẹ zẹ vbene Devid ne erhaa ru vbe ekhọe ne ọ huanrẹn kevbe ne ẹ i mwẹ ikhan, u wa gha ru emwi ne I tama ruẹn hia, u na vbe ya uhi mwẹ ru emwi,

5 I gha mu eyan nii sẹ, ne I ru ma e Devid ne erhaa vbe I tama rẹn wẹ uniẹn ivbi ẹre ọre ọ gha rriọba vbe Izrẹl ẹdẹ.

6 Sokpan, a deghẹ wẹ ra avbe ivbi uẹ ma ghi lele mwẹ, wa na he uhi kevbe ilele mwẹ ne I rhie ne uwa ye otọ, wa na ya gha ga, wa na vbe gha ya uhunmwu rhanmwẹ otọe ne ẹbọ ọvbehe,

7 ẹghẹ nii I ghi viọ ivbi Izrẹl ne emwa mwẹ hin otọe ne I mu ne iran rre. I ghi fi iyeke gbe Ọgua Osa na ne I ya khian ne ọ huanrẹn ne a ya gha ga mwẹ, emwa hia ghi gha giẹ Izrẹl vbe ehe hia, iran ghi vbe gha yagha ẹe.

8 Ọgua Osa na ghi do khian otiku ọrhiae, ọ ghi gha yan emwa hia ni la evba gberra unu an, ọ ghi gbe orrirri ku iran, iran ghi kha wẹẹ, ‘Vbọzẹ ne Nọyaẹnmwa na ru otọ na kevbe emwa na vbenian yi?’

9 Emwa ọvbehe ghi wanniẹn wẹẹ, ‘Rhunmwuda, emwa nii fi iyeke gbe e Nọyaẹnmwa Osanobua iran ne ọ viọ avbe erha iran odede ke Igipt ladian gha dee. Iran na kpe iku gie ẹbọ ọvbehe, iran na gha ga iran, iran na gha ya uhunmwu rhanmwẹ otọe ne iran. Ọnii ọ sii ẹe ne Nọyaẹnmwa na zẹ ọkhọ rruan iran vbe nian.’ ”


Ẹmwẹ Ne Solomọn Gu E Hiram Yobọyi
( II Krọnikol 8:1-2 )

10 Ukpo ugie ọre Solomọn ya bọ Ọgua Osa kevbe ẹguae ẹre.

11 E Hiram ne Ọba e Taia ọ re ọ viọ erhan sida hia ke ọwegbe kevbe igoru ne ọ ya winna iwinna nii gie ẹe. A ghi bọ ẹe fo nẹ, e Solomọn ne ọba keghi viọ okpẹvbo ugie ne Hiram vbe otọ e Galili.

12 E Hiram keghi ya ghe ẹre ghe, sokpan ọ ma yẹ ọre.

13 Ọ keghi tama e Solomọn wẹẹ, “Ọtẹn mwẹ, ii, enena ọrọre ẹvbo ne uwẹ viọ mẹ!” Ọnii ọ sii ẹe ne a na tie ẹre Kabul do sẹ ẹdẹnẹrẹ na.

14 Ọ sẹ omwa etọni igoru isẹn ne Hiram viọ gie Solomọn.


Iwinna Ọvbehe Ne Solomọn Winnaẹn

15 Iwinna ne a ya ẹtin mu ọmwa winna ọ re Solomọn ya bọ Ọgua Osa kevbe ẹguae, ẹre ọ vbe ya zẹ ekẹn ran odẹ ahọ ẹvbo nii, kevbe ne ọ ya gbe ekẹn lẹga ẹvbo nii. Erriọ ọ re ọ vbe ya bọ ẹvbo Hazọ, Mẹgido kevbe Gẹzẹ.

16 (Ọba Igipt keghi mu okuo gha rrie Gẹzẹ, ọ na dunmwu ẹn ruan, ọ keghi gbele emwa ni rrọọ, ọ na rhu erhẹn ye ẹvbo nii. Ovbi ẹre ghi rọnmwẹ e Solomọn, ọ keghi ya ẹvbo nii khuẹ ọre gha rrie orọnmwẹ.

17 Ọre Solomọn ghi na dọlegbe bọ ẹe.) Iwinna ne a ye ẹtin mu ọmwa winna nii ọre Solomọn vbe ya bọ Bẹt-horọn ne ọ kotọ,

18 e Balat, e Tama, vbe otọe oha e Juda.

19 Avbe ẹvbo ne a viọ emwi ne a hẹ gie ẹe yi, avbe ehe ne a viọ ẹsin ẹnrẹn yi kevbe ikẹkẹ okuo, kevbe emwi ọvbehe hia ne ọ ho ne irẹn bọ ye Jerusalẹm, e Lebanọn kevbe ehe ọvbehe vbe otọ arriọba ẹre.

20-21 Emwa ne Solomọn gha ya ẹtin mu winna kegha re ivbi uniẹn emwa Kenan ne ivbi Izrẹl ma gbele ua ẹghẹ ne iran na khọn mu otọ iran. Ne usun ọ re iran ye ighẹ Amọri, Hiti, e Pẹriz, e Hivi kevbe Jebus ne ivbi iran gha re eviẹn rhinrin do sẹ ẹdẹnẹrẹ na.

22 E Solomọn ma ya ivbi Izrẹl ru eviẹn, sokpan, iran ọ re ọ gha re ivbi iyokuo ẹre, ewọe ẹre, ọkaokuo ẹre, iran ni fi ikẹkẹ okuo ẹre, kevbe ni hin ẹsin.

23 Avbe ọkaolotu ni gbearoghe emwa ọvbehe ni rrọọ kegha re ekigbe siyeha irrọ vbe uri eha (550) iran ọre ọ ru ẹmwẹ iwinna ne a ya ẹtin mu emwa winna, ne a ya winna iwinna ughughan ne Solomọn rhie obọ yi.

24 E Solomọn keghi ya emwa vuọn otọe nii ne ọ rre odẹ ahọ ẹvbo nii iyeke vbe amwẹ ọnrẹn ne ovbi ọba Igipt ghi kpao vbe ẹvbo e Devid rre gha rrie ẹguae ne Solomọn bọ ne ẹẹn.

25 Igba eha vbe ukpo Ọ re Solomọn ya si isara vbe Ogiukpo ne ọ bọ ne Nọyaẹnmwa, ọ kevbe gha giẹn eturari gie Nọyaẹnmwa. Erriọ o na do bọ Ọgua Osa fo.

26 E Solomọn keghi vbe bọ ọgbagba okọ vbe Eziọngeba ne ọ rre ọkpẹn Ẹlat ne ọ rre eghute Oke Ẹzẹ Akaba, vbe otọ Idọm.

27 E Hiram ne ọba keghi gie emwa ni fuẹro vbe ẹmwẹ okun eso kevbe ọgbagba okọ ọghe ọe ne iran ya gu emwa e Solomọn gha winna.

28 Iran keghi gua okọ ye otọ Ọfii, iran keghi viọ igoru ne ọ se etọni enẹ irrọ vbugie gie Solomọn.

@ The Bible Society of Nigeria, 1996

United Bible Societies
ကြှနျုပျတို့နောကျလိုကျပါ:



ကြော်ငြာတွေ