I Ọba 8 - Edo Bible (E Baibol Ẹdo) Version 1996

A Mu Ẹkpẹti Ile Gha die Ọgua Osa

¹ E Solomọn ne ọba keghi gie ne a tie avbe ọkaolotu Izrẹl, ọka ẹgbẹe avbe uniẹn kevbe ẹwae, ne iran bu irẹn gha die Jerusalẹm, ne iran do ya mu Ẹkpẹti Ile e Nọyaẹnmwa ke Zaiọn ne ẹvbo e Devid gha die Ọgua Osa.

² Ehia kegha de vbe uki Etanim ne ọ re ẹghẹ emwiukpo Irhu ne a bọlọ vbe uki Etanim.

³ Avbe ọkaolotu ni hia ghi si egbe koko nẹ, avbe ohẹn keghi mu Ẹkpẹti Ile nii.

⁴ Avbe Livai keghi ru iyobọ ne iran, iran na dada ẹe ke ẹe kevbe owa ukpọn rẹn, ke ẹe kevbe emwi ne a ya te ẹre hia gha rrie Ọgua Osa.

⁵ E Solomọn ne ọba kevbe ivbi Izrẹl hia keghi do si egbe koko ye odaro Ẹkpẹti Ile nii, iran na ya ohuan ni bun kevbe ẹmila ne a i sẹtin ka zọ ese.

⁶ Avbe ohẹn keghi mu Ẹkpẹti Ile nii, iran na ya mu ẹẹn ye Ehe Ne ọ Huan Sẹẹ Ehia vbe Ọgua Osa, vbe ototọ ifuẹn avbe aranmwẹ ni zẹ ifuẹn.

⁷ Ifuẹn iran keghi rhan ladian gue ẹkpẹti ile nii, ọ keghi gue ọkpọ ne a ya mu ẹẹn.

⁸ (Avbe ọkpọ nii, ye rre evba do sẹ wanwan na.)

⁹ Te a wa ke ehe ne a mudia yi vbe ugha nọkhua bẹghe ẹre vbe odaro Ehe Ne ọ Huan Sẹẹ Ehia sokpan, a i ke ore bẹghe ẹre. Emwi ọvbehe i rre Ẹkpẹti Ile nii gberra uhanhan okuta ne a gbẹn eveva ne Mosis viọ yọ vbe Oke Sainai, ehe ne Nọyaẹnmwa na gu ivbi Izrẹl ta ile vbe iran ke Igipt dee.

¹⁰ Avbe ohẹn ghi wa ladian vbe Ọgua Osa nii, okuku keghi wa gba ẹre.

¹¹ Iran ma ghi sẹtin werriegbe la rọ ya winna iwinna iran rhunmwuda uyi e Nọyaẹnmwa vuọn Ọgua Osa.

¹² Ẹre Solomọn na na erhunmwu wẹẹ, “E Nọyaẹnmwa, wẹ ọ re ọ dunmwu owẹn ye iso, sevba, u keghi kha wẹ uwu okuku kevbe ebiebi u ra dia.

¹³ Banbanna nian, I bọ Ọgua Osa ẹrẹkhẹrẹ ne uẹn nẹ ehe ne u gha sẹtin gha ye ẹdẹdẹmwẹdẹ.”

Ẹmwẹ Ne Solomọn Gu Emwa Nii Guan

¹⁴ Emwa nii hia ghi wa mudia ye evba, e Solomọn keghi fi egbe werriẹ mu aro da iran, ọ na ya erhunmwu nọ afiangbe Osanobua ne iran.

¹⁵ Ọ keghi kha wẹẹ, “Wa rho e Nọyaẹnmwa Osanobua Izrẹl! Ọ mu eyan ne ọ yan ma e Devid ne erha mwẹ sẹ, ẹkpo ne ọ na tama rẹn wẹẹ,

¹⁶ ‘Ke ẹghẹ ne I ya viọ emwa mwẹ ke Igipt ladian gha dee, I ma he zẹ ẹvbo ọkpa vbe otọ Izrẹl hia wẹ emwana ọ re a gha bọ Ọgua Osa ne a gha na gha ga mwẹ yi, sokpan I keghi zẹ uwẹ ne Devid ne ọ gha khaemwisẹ yan emwa mwẹ.’ ”

¹⁷ E Solomọn keghi ye gha guan khian, ọ wẹẹ, “E Devid ne erha mwẹ te ho ne ọ bọ Ọgua Osa ne a na gha ga e Nọyaẹnmwa ne Osanobua Izrẹl.

¹⁸ Sokpan e Nọyaẹnmwa tama e Devid wẹẹ, ‘Iro ne ọ zẹe wa rhiẹnrhiẹn irẹn.

¹⁹ Sokpan wẹ ẹ i khian gha re Devid ọ gha bọ Ọgua Osa nii, i ghẹ ovbi ẹre nọ!’

²⁰ Banbanna nian, e Nọyaẹnmwa mu eyan ne ọ yan rẹn. sẹ. Mẹ lele Devid ne erha mwẹ nẹ zẹ vbe ọba Izrẹl, I vbe bọ Ọgua Osa nẹ ne a na gha ga e Nọyaẹnmwa ne Osanobua Izrẹl.

²¹ I vbe rhie ehe ne Ẹkpẹti Ile gha dia ye nene Ọgua Osa. Ẹkpẹti Ile nii ne uhanhan igbẹnbe okuta ọghe ile ne Nọyaẹnmwa gu avbe erha mwa odede ta vbe ẹghẹ ne ọ na viọ iran ke Igipt ladian.”

Erhunmwu Ne Solomọn Naẹn

²² Ẹghẹ nii ọre Solomọn na ya mudia ye odaro Ogiukpo e Nọyaẹnmwa vbe ehe ne emwa hia ye. Ọ keghi viọ obọ da odukhunmwu.

²³ Ọ na na erhunmwu wẹẹ, “E Nọyaẹnmwa, Osanobua Izrẹl, ọba ọkpa ne ọ yevbe ruẹ i rrọ vbe odukhunmwu vbe ẹrinmwi ra agbọn vbe ototọ! Te u ru vbene ile ne u ta ẹe khare, u ghi vbe gha mwẹ itohan ne ẹ i fiwerriẹ ghe emwa ruẹn ni ye ekhọe hia mu ẹmwẹ ruẹn sẹ.

²⁴ U mu eyan ne u yan ma e Devid ne erha mwẹ ne ọguọmwadia ruẹ sẹ, ẹdẹ nẹrẹ na nian, u ru zẹ vbene u yan rẹn.

²⁵ Banbanna nian, e Nọyaẹnmwa Osanobua Izrẹl, I rinmwian wẹ ne u vbe mu eyan nọkpa sẹ, ne u yan ma erha mwẹ ighẹ Devid ẹkpo ne u na kha ma rẹn wẹẹ, ‘I gha rhie ne uẹn rhinrin ẹdẹ ọmọ ne ọ gha rhie ihe ruẹ zẹ vbe ọba Izrẹl adeghẹ avbe ivbi uẹ họn ẹmwẹ mẹ zẹ vbene u wẹ gha ru.’

²⁶ Rhunmwuda onii nian, I rinmwian, Osanobua Izrẹl wẹ ne u mu eyan ne u yan ma e Devid ne erha mwẹ ne ọguọmwadia ruẹ sẹ.

²⁷ “Sokpan, Osanobua gha gele sẹtin yin agbọn na ra? Vbene ẹrinmwi hia sẹe nii, ẹ i gua a, vbe Ọgua Osa ne imẹ bọe ghi ra gua a hẹ?

²⁸ Sevba họn erhunmwu mwẹ kevbe erinmwian mwẹ, e Nọyaẹnmwa Osanobua mwẹ, họn eve mwẹ kevbe erhunmwu ne I na ghe ruẹ.

²⁹ Gie aro ruẹ gha ghe Ọgua Osa na asọn kevbe avan, emwana ne u wẹ zẹe wẹ ne a gha ga a vbọ. Họn ọghomwẹ, vbene I na erhunmwu vbe uwu Ọgua Osa na.

³⁰ Rhie ehọ ye erhunmwu mwẹ kevbe erhunmwu emwa ruẹn vbe iran a do na erhunmwu vbe emwa na. U ghi họn urhu mwa vbe owa ruẹ vbe ẹrinmwi ne u yabọ mwa.

³¹ “A gha kha wẹ orhunmwu ọkpa ru ọmwa ọvbehe khọ a na mu ẹẹn gha die Ogiukpo vbe Ọgua Osa na ne ọ do vẹn ihẹn wẹ rẹn ma rẹn ọkpa ọ ma rẹn eva.

³² E Nọyaẹnmwa, u ghi họn vbe ẹrinmwi ne u bu ohiẹn eguọmwadia ruẹ. Rri e nọ rria abe oya zẹ vbene ọ ma ẹẹn, ne u vbe zẹ orhue ne nọ ma rukhọ gbe.

³³ “A deghẹ eghian ghi khọn emwa ruẹn Izrẹl miotọ rhunmwuda ne iran na rukhọ ghe ruẹ iran na werriegbe bu ruẹ gha dee ne iran do rho ruẹ kevbe ne iran vbe na erhunmwu ghe ruẹ vbe Ọgua Osa na, wẹ ne a yabọ iran,

³⁴ u ghi danmwehọ iran vbe ẹrinmwi, ya orukhọ emwa ruẹn bọ iran, ne u vbe viọ iran werriegbe gha die otọ ne u mu ne erha iran odede.

³⁵ A deghẹ emwa ruẹn rra iyi ruẹ u na rri iran oya vbene u ma na ghi gie amẹ rhọ ne iran, iran na fiwerriẹ, iran mu aro da Ọgua Osa na, iran na na erhunmwu, iran na rho ruẹ,

³⁶ u ghi danmwehọ iran vbe ẹrinmwi, u ghi ya orukhọ ọba kevbe ọghe ivbi Izrẹl bọ iran. Ma iran vbene a yin ẹse hẹ, ne u gie amẹ rhọ ye otọ ruẹ, ne u mu ne emwa ruẹn ne ọ gha re ọghe iran ẹdẹdẹmwẹdẹ.

³⁷ “A deghẹ ukhunmwu ghi fi vbe otọe nii, ra te okpemianmwẹ ghi rrọọ, ra te okpe ẹhoho ghi dunmwu emwiokọ rua, ra deghẹ te eghian iran ghi zagha avbe emwa ruẹn kua, ra deghẹ te emianmwẹ ra ohuẹhuẹ la uwu iran,

³⁸ u ghi danmwehọ erhunmwu iran. A deghẹ ọmwaikọmwa vbe uwu ivbi Izrẹl ne emwa ruẹn ighẹ emwi na ba so ẹe vbe ekhọe, iran na niẹn obọ da Ọgua Osa na na erhunmwu,

³⁹ u ghi họn erhunmwu iran. U ghi danmwehọ iran vbe owa ruẹ vbe ẹrinmwi, u ghi ya orukhọ bọ iran ne u guan yọ. Wẹ ọkpa kẹkan ọre ọ rẹn emwi ne ọ rre emwa hia ekhọe. Ru ne dọmwadẹ ọghọe zẹ vbene ọ khẹ ke ẹe.

⁴⁰ Ne emwa ruẹn miẹn ehe na gha mu ohan ruẹn vbe ẹghẹ hia ne iran gha ya vbe otọe ne u mu ne avbe erha iran odede.

^41-42 “A deghẹ orhunmwuyẹn ne ọ rre ẹvbo ne ọ rrei họn usi ruẹ, kevbe emwi ni kọnkọn ne u he ru ne emwa ruẹn, ọ na gha dee do ga kevbe ne ọ vbe na erhunmwu vbe Ọgua Osa na,

⁴³ u ghi họn erhunmwu iran vbe ehe ne u ye vbe ẹrinmwi, ne u vbe ru emwi ne iran wẹ ne u ru, ne emwa ne agbọn hia miẹn ehe na rẹn ruẹn ne iran vbe gha mu ohan ruẹn zẹ vbene emwa ruẹn mu ohan ruẹn. Iran ghi do rẹn wẹ Ọgua Osa na ne I bọ ẹe na ọrọre ehe ne a na ga a.

⁴⁴ “U gha wẹ ne emwa ruẹn ya mu okuo gie eghian iran, iran na mu aro da ẹvbo ne uwẹ zẹe na, na erhunmwu ghe ruẹ, kevbe Ọgua Osa na ne I bọe nuẹn,

⁴⁵ u ghi họn erhunmwu iran. Họn vbe ẹrinmwi ne u gie iran khọnmiotọ.

⁴⁶ “A deghẹ emwa ruẹn ghi rukhọ ghe ruẹ, rhunmwuda a i miẹn ọmwa ne ẹ i ru orukhọ, ighẹ ohu mu ẹẹn, u na gie obọ eghian iran ke okhunmwu ne iran, iran na viọ iran oghunmwu gha rrie otọe ẹvbo ọvbehe, vbene ọ rhirhi rrei sẹ hẹ,

⁴⁷ danmwehọ erhunmwu emwa ruẹn. A deghẹ iran ghi vbe miẹn kue vbe odọ niii, vbene iran zẹ iba vbe ru emwi dan hẹ, iran na na erhunmwu ghe ruẹ, u ghi họn erhunmwu iran Nọyaẹnmwa.

⁴⁸ A deghẹ iran gele roiro fi ekhọe werriẹ vbe odẹ vbe ẹmwata, iran gha mu aro da otọe na ne uwẹ mu ne avbe erha iran na erhunmwu ghe ruẹ, ẹvbo na ne uwẹ zẹe kevbe Ọgua Osa na ne I bọe nuẹn,

⁴⁹ ẹghẹ nii, u ghi họn erhunmwu iran. Họn erhunmwu iran vbe owa ruẹ vbe ẹrinmwi ne u tohan iran.

⁵⁰ U ghi ye orukhọ kevbe isọtẹ iran ghe ruẹ bọ iran, ne u gie avbe eghian iran gha ya obọ esi mu iran.

⁵¹ Emwa ruẹn iran khin, emwa ne u viọ ke Igipt ladian, vbe uwu ogidi erhẹn nii.

⁵² “E Nọyaẹnmwa Osanobua ghẹ mwẹ u ma gha ye aro esi ghe ivbi Izrẹl ne emwa ruẹn kevbe ọba iran, ne u vbe gha họn erhunmwu iran ẹghẹ ne iran na rhirhi ya tu tie ruẹ ne u ye iran obọ.

⁵³ Wẹ ọ re ọ zẹ iran ke uwu ẹbu emwa hia ladian ne iran gha re emwa ruẹn, zẹ vbene u la unu e Mosis ne ọguọmwadia ruẹ tama iran, vbe ẹghẹ ne u na viọ avbe erha mwa odede ke Igipt ladian.”

Erhunmwu Okiekie

⁵⁴ E Solomọn ghi na erhunmwu ghe e Nọyaẹnmwa fo nẹ, ọ keghi mudia vbe odaro Ogiukpo, ehe ne ọ na diguẹ viọ obọ da odukhunmwu usin.

⁵⁵ Ọ keghi ya urhu ne ọ la nọọn afiangbe Osanobua ne iran ni si koko ye evba nii, ọ wẹẹ,

⁵⁶ “Rho e Nọyaẹnmwa, ọmwa ne ọ rhie ọfumwegbe ne emwa rẹn, zẹ vbene ọ khare zẹ wẹ rẹn gha ru ẹe. Emwi ọrhẹnrhẹn ne ọ la unu e Mosis ne ọguọmwadia ẹre ve, ọ gele wa ru ehia fẹẹrẹ.

⁵⁷ Te Nọyaẹnmwa ne Osanobua mwa gha gu ima gha rrọọ, zẹ vbene ọ gu avbe erha mwa odede gha rrọọ. Te ọ gha tohan ivbi Izrẹl kevbe ọba iran ẹghẹ hia, ẹ i gha sẹ mwa rae ra ne ọ fi iyeke gbe mwa.

⁵⁸ Te ọ gha gie ima gha họn ẹmwẹ ọnrẹn, ne ima gha yin vbe ẹghẹ hia zẹ vbene ọ ho, ne ima gha ya uhi ke iyi ne ọ yi ne avbe erha mwa odede hia ru emwi.

⁵⁹ Te Nọyaẹnmwa Osanobua mwa gha yerre ẹghẹ hia, erinmwian kevbe erhunmwu mwẹ ne I na ghe ẹre. Te ọ gha tohan ivbi Izrẹl kevbe ọba iran ẹghẹ hia, emwi ne iran rhirhi gha ho ẹdẹgbegbe.

⁶⁰ Erriọ, ọ re ẹvbo ni rre otọ agbọn hia gha na do rẹn wẹ, e Nọyaẹnmwa ọkpa ọrọre Osanobua, ọvbehe i rrọọ.

⁶¹ Te uwa ne emwa rẹn gha guobọ e Nọyaẹnmwa ne Osanobua mwa, ne uwa gha ya uhi kevbe iyi ẹre hia ru emwi, zẹ vbene uwa ru ẹdẹnẹrẹ na.”

A ya Fi Ohan Ọghe Ọgua Osa

⁶² Ẹre Solomọn kevbe emwa ni rre evba hia na zọ ese ghe Nọyaẹnmwa.

⁶³ Ọ keghi ya ẹkhuia ẹmila arriaisẹn eva yan ugie (22,000) zọ ese kevbe ohuan arriaisẹn iyehan (120,000) zẹ vbe ọghe isara. Erriọ ọ re ọba kevbe emwa nii hia na ya Ọgua Osa fi ohan ne a na gha ga e Nọyaẹnmwa.

⁶⁴ Vbe ẹdẹ ọkpa nii, ọ keghi vbe ya ikun ne adesẹ ne ọ rre odaro Ọgua Osa fiohan, ehe ne a na giẹn vbe aka avbe aranmwẹ ne a ya zọ ese, ne a ma va, izọ ese avbe ọka, kevbe ẹvbi aranmwẹ ne a ya si isara. Aka ọghe oze ne ọ rre Ọgua Osa, ma ghi gua emwi izọese na hia.

⁶⁵ Ẹghẹ nii, ọ re Solomọn kevbe ivbi Izrẹl hia, wa ke ada e Hamat vbe odẹ okuọ ya sẹ ehe ne otọe Igipt lae vbe odẹ ekẹn na ru emwiukpo Ibuagọ vbe odaro e Nọyaẹnmwa Osanobua la ikpẹdẹ ihinrọn vbe otọ vbe Ọgua Osa.

⁶⁶ Vbe ikpẹdẹ ne ogierẹnrẹn, e Solomọn keghi zẹ. emwa ni hia urrie, iran hia keghi tian rẹn, iran kegha rrie owa vbe ne ọyẹnmwẹ na sẹ iran ye emwi esi hia ne Nọyaẹnmwa ya ne Devid ne ọguọmwadia ẹre kevbe ivbi Izrẹl ne emwa rẹn.