I Ọba 7 - Edo Bible (E Baibol Ẹdo) Version 1996

Egua Solomọn

¹ E Solomọn keghi vbe bọ ẹguae ọghe obọ ẹre, ukpo iwera ọre ọ ya bọ ẹe.

^2-3 Ọgua Ẹgbo Lebanọn kegha re ibata igbe yan ikiọkhọe vbe utanmwẹ (150) isẹn irrọvbe iyenẹ (75) vbe uvbẹmwẹ kevbe isẹn yan iyeva (45) vbe uyomwẹ. Ọ kegha mwẹ ọgbagba eha ọghe orre erhan isida, orre ekesugie ọ re ọ rre ọgbagba ọkpọkpa vbene egbaha ọghe isida na vbe hẹnhẹn egbe yan iran. Isida ọ re a ya hie ẹre, ọ keghi vbe niẹn obọ gberra aza ne a viọ emwi yi ne avbe ya orre mu rrọ.

⁴ Ọgbagba ewindo eha kegha rre ekẹn ni rre obọ eveva.

⁵ Avbe onurho kevbe avbe ewindo ni rrọ kegha re ne a mwa rẹn ne utanmwẹ ọnrẹn sẹẹ uvbẹmwẹ ọnrẹn, sokpan, avbe ewindo nii keghi re ọgbagba eha ni viọ aro da egbe vbe uviẹn nii.

⁶ Ọgua orre kegha re ibata isẹn irrọvbe iyenẹ (75) vbe utanmwẹ kevbe isẹn yan iyeva vbe uvbẹmwẹ, ọ kegha mwẹ ọlẹla ne a bọ ẹre uhunmwu, ne a ya orre kpa.

⁷ Ugha Ẹkete, ne avbe tie ẹre Ọgua Ibuohiẹn, ehe ne Solomọn na tota bu ohiẹn, ọ kevbe gha mwẹ ekpatako isida ke otọ ya sẹ ihie.

⁸ Ugha ọghe Solomọn ni rrọọ, ne ọ vbe rre iyeke Ọgua Ibuohiẹn, vbene a bọlọ nekpa ọ re avbe bọ ẹe. Ọ kevbe bọ owa ne ọ ye vbe rrio ne amwẹ ọnrẹn ne ovbi ọba Igipt.

⁹ Avbe owa na hia, okuta na a ya bọ ẹe ke otọ ya sẹ ọbọtuo, ehe ne a na giagia okuta ọre a na gia ehia, a na giagia ẹe ye omwa vbene a ho ẹre yi, a keghi ya ọsara rrie ọre aro ke iyeke.

¹⁰ Ẹyotọ ẹre, okuta nekhua ne a giagiae vbe ehe ne a na giagia okuta, ọ re a ya gbe ẹe. Eso vbọ kegha re ibata iweva vbe ne eso na re ibata ekesugie.

¹¹ A keghi vbe munọ okuta ne a mwaẹn gia yan rẹn, a keghi vbe viọ ekpatako sida yan enii.

¹² Ugha ẹguae, kevbe ikun ne ọ ke uwu ẹre vbe Ọgua Osa, kevbe ehe ne a la la Ọgua Osa, ekẹn ne a gbe yọ kegha re ne a gha na mu ekẹn eha ọghe okuta yan egbe nẹ, a ghi vbe mu ekpatako ọkpa yan rẹn.

Iwinna E Huram

¹³ E Solomọn ne ọba keghi gie ne a tie okpia ọkpa ne a tie ẹre Huram, ne okpia ne ọ fuẹro oze ne a dunmwu vbe ẹvbo ne a tie ẹre Taia.

¹⁴ Erha ẹe wu nẹ sokpan ovbi ẹvbo ne a tie ẹre Taia ne ọ vbe fuẹro oze ne a dunmwu na, vbe gha nọ, ovbi uniẹn e Naftali ọ re iye ẹe gha khin. E Huram kegha re owinna ne ọ rẹnmwi kevbe ne ọ fuẹro ẹsẹse. Ọ keghi kue yọ vbe Solomọn tama rẹn ne ọ gha gbearoghe iwinna ne a ra ye oze winna hia.

Orre Oze Eva

¹⁵ E Huram keghi dunmwu orre ọghe oze eva, ọkpọkpa vbọ kegha re ibata isẹn irrọvbọgban (25) vbe uyomwẹ, kevbe ibata evairrọvbugie vbe a gha mwa rẹn lẹga. Ọ keghi viọ iran ye onurho ne a la la Ọgua Osa.

¹⁶ Ọ keghi vbe dunmwu, egbaha eva ne ọkpọkpa na re ibata ihinrọn vbe ukhiọnmwẹ ne a viọ iran rrọ ye uhunmwu orre nii.

¹⁷ A keghi ya ọgiọrọ ne a do ẹre ọrhiowẹlowẹ mu ona ye odukhunmwu orre nii,

¹⁸ ọgbagba eva ọghe ọmọ erhan pomegranẹt keghi vbe deba ẹre.

¹⁹ A keghi ru egbaha nii zẹ vbe elili ne utanmwẹ ọnrẹn re ibata ehan,

²⁰ a kevbe mu ẹẹn yan ehe ne khurubu ne ọ rre odukhunmwu ona ọgiọrọ nii e pomegranẹt uri ọ re ọ gha rre ọgbagba eva lẹga egbaha ọkpọkpa.

²¹ E Huram keghi viọ orre eva na ye onurho ne a la la Ọgua Osa, ọ kegha tie ne ọ rre odẹ ekẹn vbọ e Jakin, ọ kegha tie ne ọ rre odẹ okuọ e Boaz.

²² Egbaha oze ni yevbe iyokho ẹzẹ nii, a keghi viọ iran yan avbe orre nii. Erriọ ọ re a na do winna iwinna orre fo.

Ẹgbẹdin Amẹ Ọghe Oze

²³ E Huram keghi ru ẹgbẹdin oze ne ọ re ibata ihinrọn vbe ukhiọnmwẹ vbe udinmwimwẹ, ibata ekesugie vbe a gha mwa ẹnrẹn lẹga.

²⁴ A keghi ya oze ru uko ne a tẹn ye ọgbagba eva lẹga ehọ ẹgbẹdin nii, ọgbagba ọkpọkpa kegha re ibata isẹnyaniyeva, (45) te a wa sae ginna ẹẹn.

²⁵ A keghi mu ẹgbẹdin nii yan iyeke ẹmila oze iweva ni viọ uhe da egbe. Vbene eha na mu aro da ihọkpa.

²⁶ Ẹgbẹdin nii, emwi ne a ya ru ẹe kegha re akhuẹn obọ eha vbe ne ọ mwẹ imi sẹ. Ehọ ẹre kegha yevbe ehọ ukpu vbene ọ na vbokho egbe ladian zẹ vbe ipapa obobo. Inu e galọn ne ẹgbẹdin nii mu kegha re omwa arriaisẹn igbe (10,000).

Avbe Ikẹkẹ Oze

²⁷ E Huram keghi vbe ru ikẹkẹ oze igbe, ọkpọkpa vbọ kegha re ibata ehan vbe utanmwẹ, ibata eha vbe uvbẹmwẹ kevbe ibata enẹ vbe ukhiọnmwẹ vbe uyomwẹ.

²⁸ Ekpatako ne a ya erhan ghọ kugbe ọ re a ya ru ẹe.

²⁹ A keghi gbẹnnẹ ona oduma, ẹmila, kevbe aranmwẹ ni zẹ ifuẹn lele ekpatako nii kevbe avbe erhan ne a ya ghọ ẹre kugbe, ama ebe oha ne a do rhie ẹre owẹ la owẹ, kegha rre odukhunmwu kevbe ototọ avbe oduma kevbe ẹmila nii.

³⁰ Ọkpọkpa vbe avbe ikẹkẹ nii kegha mwẹ owẹ oze enẹ, ne avbe ya oze ru emwi ne ọ lẹga vbe adesẹneva ẹre. Emwi ne a hẹnhẹn ọẹn yan ne o da ẹe yi ọkpọkpa kegha re dọmwadẹ okhiẹ ọre enenẹ, a kevbe ya ebe oha ne a do ẹre ọrhiowẹlowẹ te ẹre egbe.

³¹ Edọnmwẹ ne ọ lẹga khurubu kegha rre odukhunmwu ẹnrẹn, ne a gha mu emwi yan rẹn, a kevbe ya ebe oha ne a do ẹre ọrhiowẹlowẹ na, mu ona yọ. Ọ keghi ye akhuẹn obọ eva irrọvbugie la ghe odukhunmwu ikẹkẹ nii, ọ keghi vbe gha re ibata ihinrọn vbe udinmwimwẹ ne ọ ya la uwu ẹre. A Keghi vbe ka emwi ya gbẹnnẹ ona yọ lẹga.

³² Owẹ ọre kegha re akhuẹn obọ ekesọgban, ototọ ekpatako nii ọ re a viọ ẹre yi. A keghi wa ru emwi ne ọ lẹga ne ọ rrọ, ba nene ikẹkẹ.

³³ Owẹ ọre keghi ye vbe ọghe ikẹkẹ okuo, ke ehe ne ọ ya lẹga, ehọ ẹre, ọkpọ kevbe emwi ne a se avbe ọkpọ ginna kegha re oze.

³⁴ Emwi ne a ya khẹ ọre enẹ kegha rre ototọ ọkpọkpa vbe ikẹkẹ nii vbe okhiẹ ọre, a keghi ru iran ba avbe ikẹkẹ nii.

³⁵ A kevbe mu emwi ne ọre akhuẹn obọ ihinrin gba odukhunmwu ọkpọkpa vbe ikẹkẹ nii, ekpatako ni rrọ kevbe emwi ne a ya khẹ ọre, ọkpa wa nọ.

³⁶ A keghi ya ama aranmwẹ ni mwẹ ifuẹn, oduma kevbe udin munọ ona ye emwi ne a ya khẹ ọre kevbe ekpatako nii, vbe ehe ne ẹkpotọ a rhirhi gha ye vbọ, vbe ne a na gbẹnnẹ ama emwi ne ginyan ginyan lẹga ẹre.

³⁷ Erriọ ọre a ru avbe nene ikẹkẹ, ehia kegha re ọkpa vbe ukpọlọmwẹ kevbe akpa.

³⁸ E Huram keghi vbe ru igarawa igbe, ọkpọkpa ne ikẹkẹ ọkpọkpa, avbe igarawa nii, ọkpọkpa vbọ kegha re ibata eha lẹga, e galọn uri ọkpọkpa vbo mu.

³⁹ Ọ keghi viọ isẹn vbe ikẹkẹ nii ye odẹ ekẹn ọghe Ọgua Osa, ne isẹn nekpa kegha rre odẹ okuọ, ọ na mu ẹgbẹdin nii ye odẹ ẹkpo ekẹn kevbe ahọ.

Emwi Ne A Ya Te Ọgua Osa Hia

^40-45 E Huram kevbe ru akhe ovbẹvbẹ kevbe ọkpan. Ọ keghi winna iwinna Ọgua Osa e Nọyaẹnmwa nii fo ne Solomọn ne ọba. Emwi ne ọ ru ena khin: Ọgbagba orre eva nii Egbaha ni yevbe ọkpan eva ni rre uhunmwu avbe orre nii A gbẹnnẹ ọgiọrọ ọrhiowẹlowẹ ni rre ọkpọkpa vbe egbaha nii Avbe pomegranẹt uri eva ne a mwamwa ẹre iyisẹn iyisẹn, ye uviẹn eva lẹga dọmwadẹ egbaha nii Avbe ikẹkẹ igbe nii Avbe igarawa igbe nii kevbe Ẹgbẹdin Ẹmila iweva ne a mu ẹgbẹdin nii yan Avbe akhe nii, ovbẹvbẹ kevbe ọkpan Oze ne a kpe, ọ re Huram ya ru avbe emwi ne a ya te Ọgua Osa ne Solomọn ne ọba.

⁴⁶ Ọba na wẹ ne a ru avbe emwi na hia vbe ẹkpotọ ne ọ rre ẹkpo Sukọt ne Zarẹtan vbe Iya e Jọdan.

⁴⁷ E Solomọn ma mwa vbene avbe emwi ne a ye oze ru na khua sẹhẹ. Ọ bun sẹrriọ wẹ a i sẹtin kha vbene iran khua sẹ hẹ.

⁴⁸ E Solomọn keghi wẹ ne a vbe ya igoru ru emwi ne a ya te Ọgua Osa, Ogiukpo igoru kevbe e tebul ne a viọ ebrẹd yi.

⁴⁹ Erhan ọmukpa igoru igbe ne ọ rre odaro Ehe Ne ọ Huan Sẹẹ Ehia, isẹn vbe odẹ ekẹn vbọ, isẹn vbe odẹ okuọ avbe obobo, avbe ukpa kevbe avbe awan,

⁵⁰ avbe ukpu igoru, emwi ne a ya dọ ukpa yọ, avbe ọkpan, uyẹngbe eturari kevbe egbẹnghẹngbẹnghẹn ne a ya wan erhẹn, olode ni rre ẹkhu Ehe Ne ọ Huan Sẹẹ Ehia kevbe ẹgun ne ọ ke Ọgua Osa.

⁵¹ E Solomọn ghi winna iwinna ni rre Ọgua Osa hia fo nẹ, ọ keghi do viọ avbe emwi hia ne Devid ne erha ẹe ya fiohan ne Ọgua Osa ye aza Ọgua Osa avbe esiliva kevbe igoru kevbe emwi ne a ya ru emwi ọvbehe.