I Ọba 6 - Edo Bible (E Baibol Ẹdo) Version 1996

E Solomọn Bọ Nene Ọgua Osa

¹ Ọ ghi rre ukpo iyenẹ yan uri eva (480) ne ivbi Izrẹl kpao vbe Igipt rre, ne ọ vbe re ukpo ne ogienẹ ne Solomọn rriọba yan Izrẹl, vbe uki ne ogieva, uki ne a tie ẹre Ziv, e Solomọn keghi suẹn iwinna nene Ọgua Osa.

² Ọ kegha re ibata ekigbe siyisẹn vbe utanmwẹ vbe uwu ẹre, uyomwẹ ọnrẹn kegha re ibata isẹn yan iyeva.

³ Onurho ne a la larọ kegha re ibata ekesugie vbe uyomwẹ, ibata ọgban vbe uvbẹmwẹ ọ keghi vbe vbẹ vba Ogiukpo tobọ ẹre.

⁴ A keghi halọ uvun lele ekẹn ọnrẹn, ọ ghi vbẹ sẹẹ vbe ore, ọ ghi ye wẹnrẹn vbe uwowa.

⁵ A keghi vbe bọ fiante ekẹn ọnrẹn vbe orere, vbe asefẹn kevbe iyeke Ọgua Osa, ọ kegha re omuyan eha, ọkpọkpa vbọ kegha re ibata ihinrọn vbe ukhiọnmwẹ vbe uyomwẹ.

⁶ Dọmwadẹ ughugha ni rre owa ne ọ ke otọ kegha re ibata ihinrọn vbe ukhiọnmwẹ vbe omuyan ne ọ rre adesẹneva, ọ kegha re ibata ihinrin, vbene ne ọ ke ukhunmwu na gha re ibata igbe vbe ukhiọnmwẹ. Ekẹn ne a gbe ye Ọgua Osa kegha ye wẹnrẹn vbe odukhunmwu vbene ọ gha na sẹtin hẹnhẹn egbe yan ekẹn vbene a i na vbe mannọ orre yọ.

⁷ Okuta ne a ya bọ owa nii, ehe ne a na giagia okuta ọ re a na ka ehia, sẹrriọ wẹ a ma ghi họn owogho rhọkpa ọghe umọmọ ra ughanmwa ra ematọn ne a ya ka emwi rhọkpa vbe ehe ne a na bọ Ọgua Osa nii.

⁸ Ehe ne a na la enọkotọ vbe omuyan orhiete, kegha re odẹ ekẹn ọghe Ọgua Osa, vbe ne a na ru ehe ne a la hin ẹnrẹn yọ gha rrie omuyan ne ogieva kevbe ne ogieha.

⁹ E Solomọn keghi bọ nene Ọgua Osa fo, ọ keghi ya ekpatako kevbe sida hie ẹre.

¹⁰ Orhiete omuyan eha nii, ne ọkpọkpa re ibata ihinrọn vbe ukhiọnmwẹ vbe uyomwẹ, ekẹn ne ọ ke ore ọghe Ọgua Osa ọ re a ya ekpatako sida si ẹe ginna.

¹¹ E Nọyaẹnmwa keghi tama e Solomọn wẹẹ,

¹² “U gha ya uhi mwẹ hia ru emwi I gha ru emwi ne I ve Devid ne erha re hia ne uẹn.

¹³ I ghi gu ivbi Izrẹl ne emwa mwẹ gha rrọọ vbe uwu Ọgua Osa na ne u bọ khian na, mẹ I ra vbe he iran ye otọ ẹdẹ.”

¹⁴ Ẹre Solomọn na do bọ Ọgua Osa fo.

Vbene A Te Uwu Ọgua Osa Hẹ

¹⁵ Ekpatako ọghe isida ọ re a ya gue egbekẹn vbe uwu ẹre ke otọ ya sẹ ihie, a keghi ya erhan ọwegbe wa otọe ẹre.

¹⁶ Ovbi ughugha ọkpa keghi vbe gha rre uwu ẹre, a kegha tie ọna Ehe Ne ọ Huan Sẹẹ Ehia, ọ keghi rre odẹ ukpẹ Ọgua Osa. Uyomwẹ ọnrẹn kegha re ibata ọgban, a keghi ya ekpatako isida ne ọ ke otọ ya sẹ ihie fian ẹn.

¹⁷ Ehe ne a na ru ugamwẹ ne ọ rrọọ, kegha re ibata iyeha vbe utanmwẹ.

¹⁸ A keghi gbẹnnẹ ama ọghe uko ke obobo ye ekpatako isida nii ne a ya te ẹre; a keghi wa ekpatako sida rhu uwu ẹre hia sẹrriọ wẹ a i ghi bẹghe okuta ne a ya ru egbekẹn nii.

¹⁹ A keghi vbe bọ ovbi ughugha ye odẹ ufomwẹ Ọgua Osa nii, ehe ne a gha mu Ẹkpẹti Ile ọghe Nọyaẹnmwa yi.

²⁰ Ovbi ughugha ne ọ ke uwu ẹre na, kegha re ibata ọgban vbe uvbẹmwẹ, ọgban vbe utanmwẹ, kevbe ọgban vbe uyomwẹ. A keghi wa ya igoru ne a ma gua rhu ehia, ekpatako isida ọ re a ya rhu Ogiukpo ne ọ rrọọ.

²¹ Igoru ọ re a ya rhu Ọgua Osa na vbe uwu ẹre, a keghi vbe tan ọgiọrọ igoru gbe odẹ ne a la la ughugha ne ọ ke uwu ẹre ne a vbe ya igoru rhu.

²² Igoru ọ re a ya rhu uwu Ọgua Osa na hia, erriọ vbe nọ ne Ogiukpo ne ọ rre uwu Ehe Ne ọ Huan Sẹẹ Ehia.

²³ A keghi ru aranmwẹ ni mwẹ ifuẹn eva viọ ye ughugha ne ọ ke uwu ẹre, ọkpọkpa vbọ kegha re ibata ekesugie vbe uyomwẹ, erhan ọliv ọ re a ya ka ẹre.

^24-26 Ọkpa eveva na khin vbe ukpọlọmwẹ kevbe ama. Ifuẹn eva iran mwẹ, utanmwẹ ifuẹn iran kegha re ibata ihinrọn vbe ukhiọnmwẹ vbe utanmwẹ, onii nọ wẹ ke ifuẹn ọkpa ya sẹ nọkpa kegha re ibata ekesugie.

²⁷ Te a viọ iran ke egbe vbe ughugha Ne ọ Huan Sẹẹ Ehia vbene ukpẹ ifuẹn ne iran rhan ran an gha na dekan egbe vbe adesẹneva ughugha nii, ifuẹn ne eva ni dekẹe ghi vbe sẹ egbekẹn.

²⁸ Igoru ọ re a ya rhu aranmwẹ ni zẹ ifuẹn eveva na.

²⁹ Egbekẹn ọghe ọgua nọkhua kevbe ughugha ne ọ ke uwu ẹre, emwi ne a ya te ẹre kegha re emwi ni zẹlẹ ifuẹn ne a kare, udin ne a ka re kevbe obobo.

³⁰ Ya sẹ egbe otọ owa tobọ ọ re, igoru ọre a ya rhu ẹe.

³¹ A keghi vbe mu ẹkhu obọ eveva ne a ya erhan ohọ ru ye onurho Ehe Ne ọ Huan Sẹẹ Ehia. Urho nii keghi re ne a kare ne ọ niẹn ukpẹ da ukhunmwu vbe adesẹneva.

³² Emwi ne a ya te avbe ẹkhu kegha re emwi ni zẹlẹ ifuẹn ne a ka re, udin ne a kare kevbe obobo, kevbe ẹkhu nii, avbe emwi nii zẹlẹ ifuẹn ne a kare nii kevbe avbe udin nii, igoru ọ re a ya rhu ehia.

³³ A keghi ya erhan ohọ ru edọnmwẹ ẹkhu ne ọ mwẹ igie enenẹ ye onurho ne a la lao ọgua nọkhua.

³⁴ Ẹkhu eva ne ọ gia kii vbe ewa, ne a ya erhan ọwegbe ru kevbe gha rrọọ,

³⁵ a keghi ya emwi ni zẹlẹ ifuẹn ne a kare, kevbe udin ne a kare, kevbe obobo zẹ ose yọ, a keghi vbe ya igoru rhu ehia.

³⁶ A keghi vbe bọ ọgua ne ọ ke uwu ẹre ye odaro Ọgua Osa, a na gbe ekẹn lẹga ẹre, ekẹn na, a gha viọ okuta eha yan egbe nẹ, a ghi vbe mu ekpatako isida yan rẹn.

³⁷ Uki ne ogieva ọ re a na gbe ẹyotọ Ọgua Osa na, uki ne a tie ẹre Ziv, vbe ọ rre ukpo enẹ ne Solomọn rriọba.

³⁸ Ọ ghi rre uki ne ogierẹnrẹn ne a tie ẹre Bul vbe ukpo ne ogiowọrọ ne Solomọn rriọba, a keghi bọ Ọgua Osa nii fo zẹ vbene a wa mwamwa ẹẹn zẹẹ. Ukpo ihinrọn ọre Solomọn ya bọ ẹe.