I Ọba 5 - Edo Bible (E Baibol Ẹdo) Version 1996

E Solomọn Mu Egbe Ne Ọ Bọ Ọgua Osa

¹ Ke Omuhẹn gha dee, ọse Devid ọre Hiram ne ọba Taia gha khin, ọ ghi họn wẹ e Solomọn rriọba lele Devid ne erha ẹe, ọ keghi gie ukọ bu ẹre gha khian.

² E Solomọn keghi gie uhunmwu na werriegbe gie Hiram wẹẹ,

³ “U rẹnrẹn wẹ e Devid ne erha mwẹ ma sẹtin bọ Ọgua Osa ne a na ga e Nọyaẹnmwa Osanobua ẹre, rhunmwuda kugbakẹghẹre ne ọ ya gha gu avbe eghian ni rre ẹvbo ni lẹga ẹre khọn. Ẹ i sẹtin bọ Ọgua Osa vbe ẹ i re te Nọyaẹnmwa rhie ẹre obọ yan avbe eghian rẹn hia uhunmwu nẹ.

⁴ Sokpan, banbanna nian, e Nọyaẹnmwa Osanobua mwa rhie ọfumwegbe mẹ nẹ vbe ehe ni lẹga mwẹ hia. I i mwẹ eghian, I i vbe fian afianma odekun igbinna.

⁵ E Nọyaẹnmwa tama erha mwẹ ighẹ Devid wẹ ovbi uẹ ne I gha ya rriọba lele uẹ gha bọ owa mẹ. I mu egbe nian ne I ya bọ Ọgua Osa nii, ehe ne a gha na gha ga e Nọyaẹnmwa Osanobua mwẹ.

⁶ Rhunmwuda ọnii, gie emwa ruẹn gha rrie Lebanọn, ne iran ya gbele igẹdu ye otọ mẹ. Emwa mwẹ gha deba iran winna. Emwi ne u ghi wẹ ne I ha emwa ruẹn re, I gha hae. Zẹ vbene u wẹ rẹnrẹn, emwa mwẹ i guara tọnnọ erhan vbene emwa ruẹn ye.”

⁷ E Hiram ghi họn uhunmwu ne Solomọn gie, ẹko keghi rhiẹnrhiẹn ọẹn ẹsẹse, ọ wẹẹ, “Urhomwẹ nọ ne Nọyaẹnmwa ẹrẹna, ne ọ na rhie ọmọ ne ọ wan vberriọ ne Devid ne ọ rriọba yan okpẹvbo na.”

⁸ Ẹre Hiram ghi na gie ne a tama e Solomọn wẹẹ, “I họn uhunmwu ne u gie, I vbe mu egbe ne I ya ru vbene u nọ rẹn, I gha viọ avbe sida kevbe erhan ọwegbe nii rre. E

⁹ mwa mwẹ gha viọ avbe igẹdu ni ke Lebanọn gha die okun kevbe ne iran gbalọ ẹe kugbe zẹ vbe okọ ne iran gua ẹe lele ọkpẹn ẹzẹ gha die ehe ne u ho. Emwa mwẹ ghi do rhan rẹn vbe evba, emwa ruẹn ọ re ọ ghi yaẹn ke evba kpao. Zẹ vbe ne ọ kan uwẹ vbọ, I ho ne u viọ evbare gie emwa mwẹ.”

¹⁰ Ẹre Hiram na viọ sida erhan ọwegbe ne Solomọn ho hia gie ẹe.

¹¹ E Solomọn keghi viọ igarawa ẹlubọ arriaisẹn iyisẹn (100,000) kevbe e galọn ofigbọn oliv ne a ma gua arriaisẹn igbe yan iyisẹn (110,000) gie Hiram ukpukpo ne ọ ya gha koko emwa rẹn.

¹² E Nọyaẹnmwa keghi mu eyan rẹn sẹ, ọ na rhie ẹwaẹn ne Solomọn ọfumwegbe kegha rre ẹkpo Hiram kevbe Solomọn, iran keghi gba rhie obọ ọse ma khin ye ebe.

¹³ Emwa ne Solomọn ya ẹtin munọ gha winna kegha re arriaisẹn ọgban (30,000) vbe otọ Izrẹl hia.

¹⁴ Ọ keghi rhie Adoniram yọ ne ọ gha gbe aro ghe iran. Ọ keghi gha iran ye oka eha ne arhin arriaisẹn igbe (10,000) ye, oka ọkpọkpa ghi gha gbe uki ọkpọkpa vbe Lebanọn, kevbe uki eva vbe owa.

¹⁵ E Solomọn keghi vbe mwẹ arhin arriaisẹn iyenẹ (80,000) vbe ẹvbo uhunmwu oke, iran kegha gbe okuta, iran ni ka ẹre kegha re arriaisẹn ekigbe siyenẹ (70,000).

¹⁶ Ọ keghi viọ arhin iyisẹn irrọ vbe uri eva yan arriaisẹn eha (3,300) ne iran gha gbe aro ghe iwinna ne iran iwinna.

¹⁷ Zẹ vbene Solomọn ne ọba gie, iran keghi giagia okuta nekhua ke ni mose ne a ya gbe ẹyotọ Ọgua Osa.

¹⁸ Emwa iwinna Solomọn kevbe Hiram, kevbe emwa ni ke Biblọs rre, keghi giagia avbe okuta kevbe olita ne a ra ya bọ Ọgua Osa.