I Ọba 4 - Edo Bible (E Baibol Ẹdo) Version 1996

Emwa Iwinna E Solomọn

¹ E Solomọn keghi rriọba yan otọ Izrẹl hia.

² Avbe ekamakodin ne ọ ya winna ena khin. Ohẹn kegha re Azaraia ne ovbi Zadọk.

³ Avbe ọgbenbe iko kegha re Elihorẹf kevbe Ahija ne ivbi e Sisia Ne ọ sin emwi ẹro: Jehosiafat ovbi Ahilub.

⁴ Ọkaolotu ivbi iyokuo: e Benaia ovbi e Jehoiada. Avbe ohẹn: e Zadọk kevbe Abiata.

⁵ Ọka avbe ogie isi: Azaraia ne ovbi e Natan. Iguọbaziro: ohẹn ighẹ Zabuk ne ovbi e Natan.

⁶ Ọka ibiẹguae: Ahisia. Ọmwa ne ọ gbearoghe iwinna ne a ye ẹtin mu emwa winna: Adoniram ne ovbi Abda.

⁷ E Solomọn keghi ma arhin iweva ogie isi vbe Izrẹl. Iran na ọre a wẹ ne ọ gha viọ evbare gie ọba kevbe igiowa ẹre ke ehe ne iran gbearoghe gha dee. Orhiọnkpọkpa ghi gha rhẹe la uki ọkpọkpa vbe ukpo.

⁸ Iran ne a zẹlẹe ke ehe ne iran gha gbearoghe ọre ena khin: E Benhọ: Ifreim ne ẹvbo oke

⁹ E Bendekei: ẹvbo Makaz, Sialbim, Bẹt Siemẹs, Elọn kevbe Bethanan.

¹⁰ E Benhezed: ẹvbo Arubo kevbe Sukọ kevbe otọe Hefe hia.

¹¹ E Benabinadab, ne ọdafẹn Tafat ne ovbi e Solomọn: otọe Dọ hia.

¹² E Baana ne ovbi Ahilub: ẹvbo Taanak, Mẹgido kevbe otọe hia ni rre ọkpẹn Bẹt-Sian, vbe ọkpẹn Zarẹtan vbe odẹ ekẹn Jezrẹl, rhinrin ya sẹ Ebel Mehola kevbe ẹvbo Jokmiam.

¹³ E Bengebe: ẹvbo Ramọt ne Giliad kevbe a vbe igue ni rre Giliad ne ọre ọghe ewae Jeẹ ne ovbi e Manasẹ kevbe isoko Agọb vbe Basian, ọ keghi wa gha re okpẹvbo iyeha ne a gbe ekẹn gaa ya khọ egbe, a na vbe ye oze ru ogba ye onurho ẹre.

¹⁴ Ahinadab ne ovbi Ido: otọe ẹvbo ọghe e Mahanem

¹⁵ Ahimaz ne ọ rhie Basimat ne ovbi e Solomọn nokhuo ọvbehe: ẹvbo e Naftali

¹⁶ E Baana ne ovbi e Husiai: otọe Asia kevbe ẹvbo Bialot.

¹⁷ Jehosiafat ne ovbi e Paruah: otọe Isaka

¹⁸ E Simẹi ne ovbi Ela: otọe Bẹnjamin!

¹⁹ E Geba ne ovbi Uri: otọe Giliad ne ọba e Saihọn ọghe Amọn, kevbe ọba Ọg ọghe Basian te ka gha khaemwisẹ yan. Deba iran ne iweva na ni khaemwisẹ ọkpa kevbe gha rre otọe Juda.

Arriọba Ọrọkhọrhọ Ọghe Solomọn

²⁰ Ivbi e Juda kevbe Izrẹl kegha bun zẹ vbe ikpekhae ni rre ọkpẹn okun, iran kegha re, iran na gha da, ẹko kegha sẹ ehia ọyẹnmwẹ.

²¹ Otọe arriọba e Solomọn keghi ke Ẹzẹ e Yufretes vbe odọ ahọ, ya sẹ Filistia vbe odẹ orrie kevbe rhinrin yasẹ okhiẹ Igipt. Iran kegha ha igho uhunmwu gie ẹe, iran na vbe gha rre ototọ ẹre vbe ẹdẹ agbọn rẹn hia.

²² Emwi ne Solomọn lo ẹdẹ ọkpọkpa kegha re igarawa irhuarhua igbe yan ikiọkhọe (150) kevbe igarawa iyisẹn yan uri (300) ọghe evbare.

²³ Ẹmila abẹgbe kevbe ẹmila ne ọ tobọ ẹre rhọ irunmwu re ugie, kevbe ohuan iyisẹn, do deba ẹrhuẹ, uzo, avbe iku aranmwẹ ọvbehe kevbe ọkhọkhọ.

²⁴ E Solomọn kegha khaemwisẹ yan otọe ni rre orrie Ẹzẹ Yufretes hia kevbe Tifsa vbe Yufretes ya sẹ ẹvbo e Gaza vbe orrie ne gbaan. Avbe ọba hia ni rre odẹ orrie ọghe Yufretes kegha ga gie ẹe, rẹn vbe ẹvbo ni lẹga ẹre hia keghi gba gha rrọ vbe ọfumwegbe.

²⁵ Ẹghẹ hia ne ọ ya ẹe vbe agbọn, emwi rhọkpa ma ru emwa e Juda kevbe Izrẹl dọmwadẹ igiowa kegha mwẹ ugbo azara ọghe ọe kevbe ọghe erhan ohọ.

²⁶ E Solomọn keghi mwẹ ẹsin ikẹkẹ okuo arriaisẹn iyeva (40,000) vbe ehe ne a viọ iran yi, deba emwa ni hin ẹsin arriaisẹn iweva (12,000).

²⁷ Avbe ogie isi iweva ne ọ mwẹ nii ọ re a rhie uki ọkpọkpa na ne ọ gha na viọ evbare gie Solomọn ne ọ gha re kevbe iran ni rri evbare vbe ẹguae ẹre. Ẹghẹ hia iran ya viọ emwi ne ọ ho rre.

²⁸ Dọmwadẹ ogie isi ghi gha viọ ọka irhuarhua kevbe irunmwu ne a fiaẹn rre ne avbe ẹsin ikẹkẹ okuo kevbe avbe aranmwẹ ne a ya winna gha re.

²⁹ Osanobua keghi rhie ogie ẹwaẹn ne Solomọn, deba vbene arria ẹmwẹ hẹ vbe ẹko kevbe irẹnmwi ne a i sẹtin mwa vbene ọ kpọlọ sẹ.

³⁰ E Solomọn keghi wan sẹẹ avbe umẹwaẹn ni rre odẹ ahọ kevbe avbe umẹwaẹn ni rre Igipt.

³¹ Rẹn kegha re ne ọ wan sẹẹ vbe uwu emwa hia fẹẹrẹ, ọ wan sẹ Etan ne ovbi ẹvbo ne a tie ẹre Ẹzra kevbe Henian, Kalkọl kevbe Daba iran ne ivbi e Mahọl. Otiti ẹre keghi vẹ gba ẹvbo ni lẹga enii hia.

³² Ọ keghi kpa itan arriaisẹn eha (3,000), ọ keghi vbe so ihuan ne ọ sẹ arriaisẹn (1,000).

³³ Ọ ta ẹmwẹ vbekpa erhan, irunmwu kevbe sida e Lebanọn yasẹ egbe ebe ne a ya miẹn afọ ni zọ vbe egbekẹn, ọ guan vbe ekpa aranmwẹ, ahianmwẹ kevbe emwi ni hiọrọ kevbe avbe ehẹn.

³⁴ Avbe ọba ni rre otọ agbọn hia kegha họn vbe ne ọ wan hẹ, iran na gie emwa do gha danmwehọ ẹre.