I Ọba 3 - Edo Bible (E Baibol Ẹdo) Version 1996

E Solomọn Nọọn Ẹwaẹn

¹ E Solomọn keghi kpe iku gie ọba Igipt, ọ na rhie ovbi ẹre nokhuo ọkpa rọnmwẹ. Ọ keghi rhie ẹre gha die ẹvbo e Devid ọ te do bọ ẹguae ẹre kevbe Ọgua Osa kevbe ekẹn ne ọ lẹga Jerusalẹm fo.

² A ma he bọ Ọgua Osa ne Nọyaẹnmwa, rhunmwuda ọnii, ihe ughughan ni bun ọ re emwa na ye gha zọ ese.

³ E Solomọn keghi ho ẹmwẹ e Nọyaẹnmwa ọ keghi vbe gha ru vbene Devid ne erha ẹe tama rẹn, sokpan ọ yevbe gbele aranmwẹ, ọ kevbe ye iran zọ ese vbe Ogiukpo ughughan.

⁴ Ọ ghi sẹ ẹghẹ ọkpa, ọ na gha rrie Gibiọn ne ọ ya zọ ese rhunmwuda, evba nii ọ re Ogiukpo ne ọ hin usi sẹ gha ye. Ọ ka vbe ya emwi izọese na giẹn uan iyisẹn iyisẹn zọ ese vbe evba nii yi vbe ẹghẹ ne ọ gberra.

⁵ Vbe asọn nii, e Nọyaẹnmwa keghi rhie egbe ma rẹn vbe imina, ọ nọ rẹn wẹẹ, “De emwi ne u ho ne I ru nuẹn?”

⁶ E Solomọn keghi wanniẹn wẹẹ, “Erriọ ọ re u vbe gha ho ẹmwẹ e Devid ne erha mwẹ, ọguọmwadia ruẹ, rẹn keghi wa vbe gha maa, ọ guobọ ruẹ, ọ na vbe gha re ne ọ gie a mu ẹtin yan vbe emwi ne ọ gha ru vbe odaro ruẹ. U keghi ye vbe gha ho ẹmwẹ ọnrẹn khian, vbe ekpa ne u na rhie ọmọ okpia ne ẹẹn ne ọ rriọba lele ẹe.

⁷ E Nọyaẹnmwa, Osanobua, u ya mwẹ rriọba lele erha mwẹ nẹ, a gha rhe miẹn wẹ, ọvbokhan ọ re I khin, I ma vbe rẹn vbene a ya gbe aro ghe ẹvbo hẹ.

⁸ Ghe mwẹ nian vbe uwu ẹbu emwa ne u zẹẹ ne ọ gha re ọwuẹ, emwa ne a miẹn wẹ iran bun sẹrriọ, a i vbe sẹtin ka iran.

⁹ Rhunmwuda ọnii, rhie ẹwaẹn mẹ ne I ya gha gbearoghe emwa na vbe ne a na ta ẹmwata kevbe ne a na rẹn emwi ne ọ maa hin ne ẹ i maa rre. A deghẹ ẹ i re erriọ, vbe I a gha ya gbearoghe okpe emwa ruẹn na hẹ?”

¹⁰ Ẹko keghi rhiẹnrhiẹn e Nọyaẹnmwa ye emwi ne Solomọn nọ rẹn na.

¹¹ Ọ keghi tama rẹn wẹẹ, “Vbe ne a na miẹn wẹ ẹwaẹn ne u gha ya gha gbearoghe emwa ẹse ọ re u nọ rẹn, u ma nọ wẹ ne a guẹ tọ ra ne u fe ra ne eghian ruẹn wulo,

¹² I gha rhie emwi ne u nọ rẹn ne uẹn. I gha rhie ẹwaẹn kevbe irẹnmwi ne uẹn sẹ emwa hia ni ke aro nuẹn kevbe ni gha vbe rre vbe iyeke ruẹ.

¹³ I gha vbe rhie emwi ne u ma nọ ba ruẹ re, u gha mwẹ ẹfe kevbe usi vbe ẹdẹ agbọn ruẹn hia sẹ ọba ke ọba ne ọ rhirhi gha khin.

¹⁴ A deghẹ u ghi vbe ya ẹmwẹ mwẹ ru emwi, u na rhie uhi kevbe ilele mwẹ mwẹ, zẹ vbene Devid ne erha a ru, I ghi rhie utọmwẹ ba ruẹ re.”

¹⁵ E Solomọn ghi rhiọrre ọ keghi miẹn wẹ te Osanobua gu irẹn guan vbe imina. Ẹre ọ na gha rrie Jerusalẹm, ọ na ya mudia ye odaro Ẹkpẹti Ile e Nọyaẹnmwa, ọ na zọ ese ne a giẹn uan kevbe ọghe isara ghe Nọyaẹnmwa. Iyeke ọnii, ọ keghi le evbare ne emwa rẹn hia re.

E Solomọn Bu Ohiẹn Nọ Wegbe

¹⁶ Ebabotu eva keghi bu e Solomọn gha dee.

¹⁷ Ọkpa vbọ keghi kha wẹẹ, “U gha tọ u kpẹre Umogun, owa ọkpa ọ re ime vbe okhuo na gba ye, mẹ keghi sirra ẹre biẹ ọmọ okpia.

¹⁸ A ghi tie ẹre nẹghẹdia ne imẹ biẹe, rẹn keghi vbe biẹ ọmọ okpia, ma eveva nii ọkpa kẹkan ọ re ọ gha rre owa nii, ọmwa ọvbehe rhọkpa i rre evba.

¹⁹ Ọ ghi sẹ asọn ọkpa, ọ keghi lovbiẹ yan ovbi ẹre vbe ne ọ na ma rẹn, ọ na piẹnpiẹn ọẹn gbe ua.

²⁰ Ọ na kpaegbe vbe asọn, ọ keghi mu ovbi mwẹ hin ehe ne i ye rre vbe i vbiẹ, ọ na mu gha rrie ukpo ẹre, ọ keghi mu ọmọ ne ọ wu nii, yọ mwẹ ukpo.

²¹ Ẹdẹ ghi gbe, i ghi rhiọrre, vbe I ghi mu ọmọ ne i ya ne ẹẹn wẹn, I keghi miẹn wẹ, ọ wu, I keghi kakabọ ghẹ ẹre ẹse, I na miẹn wẹ ẹ i rre ovbi mwẹ.”

²² Sokpan okhuo nọkpa keghi wanniẹn wẹẹ, “Ohoghe nọ, ọmọ ne ọ wu ọrọre ọ wuẹ, ne ọ ma wu ọrọre ọghomwẹ!” Erriọ iran na gha muan ẹmwẹ vbe odaro ọba.

²³ Ẹre Solomọn ne ọba na kha wẹẹ, “Dọmwadẹ ọghe ọe vbe uwu uwa wẹ ọmọ ne ọ ma wu ni ọrọre ọghe ọe, ne ọ wu ọrọre ọghe okhuo nọkpa.”

²⁴ Ọ na wẹ ne a mu umozo rre, iran ghi mu ẹẹn rre nẹ.

²⁵ Ọ keghi kha wẹẹ, “Fian ọmọ ne ọ ma wu ye ihe eva ne u rhie obọ ọkpọkpa vbọ ne ikhuo na.”

²⁶ Ekhọe okhuo ne ọ yan ọmọ keghi vuọn ne agiẹngiẹn ovbi ẹre, ọ keghi kha ma ọba wẹẹ, “U gha tọ u kpẹre Umogun, ghẹ gbe ọmọ nii uan, mu ne ẹẹn.” Sokpan, okhuo nọkpa keghi kha wẹẹ, “Ghẹ mu ẹẹn ne ọmwa rhọkpa vbe uwu ima, fian ẹre eva.”

²⁷ Ẹre Solomọn na kha wẹẹ, “Ghẹ gbe ọmọ nii uan, mu ne okhuo ne okaro, rẹn ọrọre iye ẹe.”

²⁸ Ivbi Izrẹl ghi họn ohiẹn ne Solomọn buru, iran keghi kpa uhe ne ẹẹn, rhunmwuda, iran miẹn wẹ Osanobua rhie ẹwaẹn ne ẹẹn ne ọ ya gha buohiẹn ẹse.