I Ọba 22 - Edo Bible (E Baibol Ẹdo) Version 1996

E Makaia Yan Ma Ehab

¹ Izrẹl kevbe Siria keghi gba gha rrọọ vbe ọfumwegbe la ukpo eha.

² Sokpan ọ ghi rre ukpo ne ogieha, e Jehosiafat ne ọba e Juda keghi ya tuẹ Ehab ne ọba Izrẹl.

³ Ehab keghi nọ ewọe ẹre wẹẹ, “Vbọzẹ ne ima ma na he ru emwirhọkpa yi ne a ya miẹn Ramọt ne Giliad hin obọ Siria rre? Ma ọ re ọ yan rẹn!”

⁴ Ọre Ehab na nọ e Jehosiafat wẹẹ, “U gha lele mwẹ yo ya gu e Ramọt gbinna ra?” E Jehosiafat keghi wanniẹn wẹẹ, “U gha mu egbe, mẹ kevbe ivbi iyokuo mwẹ vbe mu egbe kevbe iran ni vbe hin ẹsin.

⁵ Sokpan, ka nọ e Nọyaẹnmwa nẹ vbe ekpa ẹre.”

⁶ Ẹre Ehab na tie avbe akhasẹ ọre ne ọ re omwa uri eva, ọ keghi nọ iran wẹẹ, “Ne I ya gu Ramọt gbinna ra ne I ghẹ yo?” Iran wanniẹn wẹẹ, “Ya khọn rẹn ighẹ e Nọyaẹnmwa gha rhie akhọnmiotọ nuẹn.”

⁷ Sokpan, e Jehosiafat keghi kha wẹẹ, “Akhasẹ ọvbehe i ghi rro ra ne ima gha wẹ ne ọ nọ e Nọyaẹnmwa?”

⁸ Ehab keghi wanniẹn wẹẹ, “Ọkpa ye rrọọ, Makaia ne ovbi Imla, sokpan I i ho ẹmwẹ ọnrẹn rhunmwuda, ẹ i ta ẹmwẹ esi ma mwẹ, emwi dan nọ vbe ẹghẹ hia.” E Jehosiafat keghi wanniẹn wẹẹ, “Ghẹ kha vberriọ.”

⁹ Rhunmwuda ọnii, Ehab keghi gie orhiọnkpa ke ẹguae gha khian ne ọ ya tie Makaia rre ẹgiẹgiẹ.

¹⁰ Avbe ọba eva na keghi mu egbe ọba, iran na tota ye ẹkete iran vbe ehe ne a na wiẹn ọka vbe a gha wa da gberra onurho e Sameria. Avbe akhasẹ nii hia kegha guan ẹmwẹ akhasẹ vbe odaro iran.

¹¹ Ọkpa vbe uwu avbe akhasẹ nii, e Zedekaia ne ovbi e Kienaana keghi dunmwu igho ematọn, ọ tama Ehab wẹẹ, “Vbenian ọre Nọyaẹnmwa khare, ‘Ọ na ọre u ra ya khọn ivbi e Siria a te do wabọ iran an fẹẹrẹ.’ ”

¹² Ẹmwẹ ọkpa nii ọ re avbe akhasẹ nekpa hia vbe ta. Iran wẹẹ, “Gha khian ya khọn e Ramọt ighẹ obọ ruẹ gha ke ukhunmwu, e Nọyaẹnmwa gha rhie akhọnmiotọ nuẹn.”

¹³ Vbe uwu ẹghẹ na, ọmwa ne a gie ne a tie Makaia keghi khama rẹn wẹẹ, “Avbe akhasẹ nekpa hia tama ọba nẹ ighẹ ọ gha khọnmiotọ, wẹ ghi vbe kha vberriọ.”

¹⁴ Sokpan, e Makaia keghi kha wẹẹ, “Vbe eni e Nọyaẹnmwa, emwi ne Nọyaẹnmwa tama mwẹ ọre I ra ta.”

¹⁵ Ọ ghi mudia ye odaro ọba, ọba keghi nọ rẹn wẹẹ, “Makaia, ne I mẹ vbe Jehosiafat ya khọn Ramọt ra ne I ma ghẹ yo?” E Makaia keghi kha wẹẹ, “Gha khian ighẹ u gha khọnmiotọ. E Nọyaẹnmwa gha rhie akhọnmiotọ nuẹn.”

¹⁶ Sokpan, Ehab keghi kha wẹẹ, “Inu igba I gha tama ruẹn yi wẹ ẹmwata ọkpa ọ re u gha ye eni Nọyaẹnmwa tama mwẹ?”

¹⁷ E Makaia keghi wanniẹn wẹẹ, “I bẹghe ivbi Izrẹl hia zagha lele uhunmwu oke hia zẹ vbe ohuan ne ẹ i mwẹ nọ suẹe. E Nọyaẹnmwa keghi kha wẹẹ, ‘Iran na i mwẹ olotu, wa gie iran hẹko gha rrie owa.’ ”

¹⁸ Ehab keghi khama Jehosiafat wẹẹ, “I ma tama ruẹn ighẹ ẹ i ta ẹmwẹ ne ọ maa ọkpa ma mwẹ, ẹmwẹ dan ọkpa nọ.”

¹⁹ E Makaia keghi rhie te ẹe wẹẹ “Danmwehọ vbene Nọyaẹnmwa kha hẹ! I keghi bẹghe vbe Nọyaẹnmwa tota ye ẹkete ẹre vbe ẹrinmwi, avbe odibo ẹre keghi mudia lẹga ẹre.

²⁰ E Nọyaẹnmwa keghi nọọn wẹẹ, ‘Gha ọ gha rẹrẹ, Ehab ne ọ gha rrie Ramọt ne iran ya gbẹe rua?’ Eso vbe avbe odibo Osa ni keghi ta ẹmwẹ ọkpa, eso kevbe ta ọvbehe,

²¹ orhiọn ọkpa keghi kpaegbe ladian, ọ keghi sikẹ e Nọyaẹnmwa, ọ tama rẹn wẹẹ, ‘I gha rẹrẹ ọe.’ E Nọyaẹnmwa keghi nọ wẹẹ, ‘Vbe u a ra ya ru ẹe hẹ?’

²² Orhiọn nii keghi kha wẹẹ, ‘I gha yo ya ru ẹe ne avbe akhasẹ Ehab hia gha ta ohoghe.’ E Nọyaẹnmwa keghi tama rẹn wẹẹ, ‘Gha khian ya rẹrẹ ọe, u gha sẹtin.’ ”

²³ E Makaia keghi ye ọna mu ẹmwẹ nii ye otọ wẹẹ, “Emwi ne ọ sunu ọ re onii khin. E Nọyaẹnmwa ru ẹe nẹ ne avbe akhasẹ ruẹ na hia gha ta ohoghe ma ruẹn. Sokpan rẹn tobọ ẹre ghae ọfuan ye otọ khẹ ruẹ nẹ.”

²⁴ Ere Zedekaia na sikẹ Makaia, ọ na gbe ubi ye ọre aro, ọ wẹẹ, “De ẹghẹ ne orhiọn e Nọyaẹnmwa ghi vbe ya sẹ imẹ rae ya gha gu uwẹ guan yi?”

²⁵ E Makaia keghi tama rẹn wẹẹ, “U gha rẹn vbene ọ ya sunu hẹ vbe u a lẹ la ughugha ne ọ rre iyeke owa ya lẹre.”

²⁶ Ẹre Ehab ne ọba na tama ọkpa vbe uwu avbe emwa rẹn wẹẹ, “Mu e Makaia, ne iran rhie ẹre bu Amọn ne enogie ẹvbo nii ke Joas ne ovbi ọba.

²⁷ Tama iran ne iran fi ẹe fi uwu ẹwẹdọ, ne ọ gha ye ebrẹd vbe amẹ koko ẹe I te rre vbe egbe hẹnnẹdẹn.”

²⁸ E Makaia keghi datu wẹẹ, “U gha ye egbe hẹnnẹdẹn rre, ọnii rhie maa wẹ ẹ i re Nọyaẹnmwa ọre ọ gie mwẹ uhunmwu.” Ọ keghi kha wẹẹ, “Wa hia họn vbene I kha hẹ na!”

Uwu Ehab

²⁹ Ehab ne ọba Izrẹl kevbe Jehosiafat ne ọba e Juda keghi gba mu okuo gha rrie Ramọt ne Giliad.

³⁰ Ehab keghi tama e Jehosiafat wẹẹ, “A gha la okuo I gha mu egbe vbene a i ghi na rẹn mwẹ, sokpan wẹ mu egbe ọba gha khian.” Rhunmwuda ọnii ọba Izrẹl keghi mu egbe ne ẹ i gia rẹn ọnrẹn la okuo.

³¹ Ọba e Siria keghi tama iran ni ye ẹsin gha okuo ne eva yan ọgban wẹ ne iran ghẹ gu ọmwa rhọkpa ọvbehe gbinna gberra ọba Izrẹl.

³² Iran ghi bẹghe Jehosiafat ne ọba, iran keghi te gha ro ighẹ rẹn ọrọre ọba Izrẹl, iran keghi mu aro da ẹre ne iran gu ẹe gbinna. Sokpan, ọ ghi tu ladian,

³³ iran keghi rẹn wẹ ẹ i re irẹn ọrọre ọba Izrẹl, iran keghi dobọ okhọn nii yi.

³⁴ Sokpan, ovbi e Siria ọkpa keghi fi ifẹnmwẹ ne ọ ma ya kọn rẹn ọ ke la ehe ne a na ku ẹwu ematọn rẹn kugbe vba Ehab ọ keghi kha wẹẹ, “Emwi vba mwẹ.” Ọ na wẹ ne ọmwa ne ọ gua ikẹkẹ okuo ẹre ladian hin odaro okuo rre.

³⁵ Ẹghẹ ne okuo na wa ye yọn nii, Ehab ne ọba keghi sikuẹn ye uwu ikẹkẹ okuo ẹre, vbene ọ na mu aro da ivbi e Siria. Esagiẹn ne ọ ke ehe ne emwi na vba ẹre ladian keghi lẹ ghe otọ, ọ keghi vuọn ototọ ikẹkẹ okuo ẹre. Ọ ghi se ẹghẹ ota, ọ keghi wu.

³⁶ Owẹn ghi ra de fua, iran keghi ta ẹe gba ivbi Izrẹl hia ne iran họn wẹẹ, “We ne edọmwadẹ ọghe ọe gha rrie ẹvbo ẹre kevbe otọe ẹre!”

³⁷ Erriọ ọre Ehab ne ọba na wu. A keghi mu ikun ẹnrẹn gha rrie Sameria ne a ya re ẹre.

³⁸ Iran keghi ya kpe ikẹkẹ okuo ẹre vbe ẹzẹ e Sameria, evba ọ re avbe ekita na lalọ esagiẹn ọnrẹn, avbe ebabotu kevbe khuẹ vbe evba zẹ vbene Nọyaẹnmwa ta ẹe ighẹ ọ gha sunu.

³⁹ Emwi hia ne Ehab ne ọba ru fẹẹrẹ, ya sẹ egbe ẹguae ne ọ ya akọn eni tee kevbe avbe okpẹvbo ne ọ bọlọ ẹe, a gbẹnnẹ ọẹn ye Ebe Okha Avbe Ọba Izrẹl.

⁴⁰ Ọ ghi wu nẹ Ahazaia ne ovbi ẹre keghi rriọba lele ẹe.

E Jehosiafat Ne Ọba E Juda

⁴¹ Ọ ghi rre ukpo enẹ ne Ehab ne ọba Izrẹl rriọba, e Jehosiafat ne ovbi Asa keghi rriọba e Juda.

⁴² Vbe ọ rre ọmọ ukpo isẹnyan ọgban, ọ keghi ya ukpo isẹnyan ugie vbe ẹkete vbe Jerusalẹm. Azuba ne ovbi e Silhi ọre iye ne ọ biọe.

⁴³ Ọ kevbe ru emwi ne ọ maa vbe odaro Osanobua zẹ vbene erha ẹe ighẹ Asa vbe ru sokpan, ọ ma guọghọ ehe ne iran ni ga ẹbọ na ga hin rre, emwa keghi ye gha zọ ese, iran keghi ye vbe gha giẹn eturari vbe evba.

⁴⁴ E Jehosiafat keghi gu ọba Izrẹl dọlọ kugbe.

⁴⁵ Emwi ne Jehosiafat ghi ru hia, udinmwẹ ọnrẹn kevbe avbe okuo ne ọ khọn rẹn, a gbẹnnẹ ọẹn ye ebe Okha Avbe Ọba E Juda.

⁴⁶ Ọ keghi khulo avbe ebabotu ne ikpia kevbe ne ikhuo ni ga vbe Ogiukpo avbe iran ni ga ẹbọ kua, iran ni ghi dekẹe ke ẹghẹ Asa ne erha ẹe gha dee.

⁴⁷ Otọe Idọm ma gha mwẹ ọba, edayi ne ọba e Juda zẹ yọ ọ re ọ ghaa khaemwisẹ yan rẹn.

⁴⁸ E Jehosiafat ne ọba kegha mwẹ avbe okọ ni yo uwu okun, ne a kan rẹn ne ọ ya gha viọ igoru ke Ọfa rre, sokpan, ehia keghi ni vbe Eziọngeba, iran ma yo uwu ẹzẹ.

⁴⁹ Ẹre Ahazaia ne ọba Izrẹl na we ne emwa irẹn lele emwa Jehosiafat gu oko sokpan e Jehosiafat ma kue yọ.

⁵⁰ E Jehosiafat keghi wu, a keghi re ẹre ye ẹvbo e Devid, ẹre Jehoram ne ovbi ẹre na rriọba lele ẹe.

Ahazaia Ne Ọba Izrẹl

⁵¹ Ọ ghi rre ukpo eha irrọvbe ugie ne Jehosiafat ne ọba e Juda rriọba, Ahazaia ne ovbi Ehab keghi rriọba vbe Izrẹl, ọ keghi ya ukpo eva vbe ẹkete vbe Sameria.

⁵² Ọ keghi ru orukhọ ghe Nọyaẹnmwa, ọ keghi wa lele igiemwi dan ọghe Ehab ne erha ẹe, ọghe Jezibẹl ne iye ẹe kevbe ọghe Jeroboam ne ọ si ivbi Izrẹl obọ fi orukhọ.

⁵³ Ọ kegha gho, ọ na vbe gha ga e Bal, ọ keghi ya ohu mu e Nọyaẹnmwa ne Osanobua Izrẹl, zẹ vbene erha ẹe vbe ru.