I Ọba 21 - Edo Bible (E Baibol Ẹdo) Version 1996

Ugbo Emwiokọ E Nabot

¹ Ugbo emwiokọ ọkpa keghi sikẹ ọkpẹn ẹguae Ehab vbe Jezrẹl, a kegha tie ọmwa ne ọ yan ugbo emwiokọ nii e Nabot.

² Ọ ghi sẹ ẹghẹ ọkpa, Ehab keghi tama e Nabot wẹẹ, “Gun mwẹ mu ugbo emwiokọ ruẹ, ọ wa sikẹ ẹguae mwẹ, I ho ne I ya mu ugbo ebe uwọnmwẹ. I gha mu ugbo emwiokọ ne ọ maa sẹ ọnii ne uẹn ra deghẹ u ho, I gha ha osa ẹre ne uẹn vbene ọ khẹke.”

³ E Nabot keghi wanniẹn tama rẹn wẹẹ, “Obọ avbe erha mwẹ odede ọ re I na rri ugbo na vbe ukhu. Osanobua ghẹ gun mwẹ mu ẹẹn ne uẹn.”

⁴ Ehab kegha rrie owa vbene ekhọe ẹre na rhia, egbe wọ ẹre, rhunmwuda ẹmwẹ ne Nabot tama rẹn. Ọ keghi ya lovbiẹ mu aro da egbekẹn vbe ukpo ẹre, ọ ma rri evbare.

⁵ E Jezibẹl ne amwẹ ọnrẹn keghi bu ẹre, ọ nọ rẹn wẹẹ, “Vbe u a miẹn ne egbe na wọ ruẹ ye otọ vberriọ yi? Vbọzẹ ne u ma na rri evbare?”

⁶ Rẹn keghi wanniẹn wẹẹ, “Rhunmwuda ẹmwẹ ne Nabot tama mwẹ nọ. I tama rẹn wẹ ne I dẹ ugbo emwiokọ ẹre ra deghẹ ọnii ọ yọ ọre sẹẹ, ne I mu ọvbehe yọ ẹre re; ọ keghi tama mwẹ wẹ, rẹn i mu ẹẹn mẹ.”

⁷ E Jezibẹl keghi kha wẹẹ, “Tama mwẹ, wẹ ọrọre ọba ra ẹ i re uwẹ? Kpaegbe vbe ukpo, dọlọ aro yi ne u rri evbare, I gha mu ugbo emwiokọ e Nabot nuẹn!”

⁸ Ẹre okhuo nii na gbẹnnẹ ebe ọ na gbẹnnẹ eni Ehab lele ẹe ọ na munọ ama rẹn gbe ẹe, ọ na viọ gie emwa iwinna kevbe ekamakodin ni rre Jezrẹl.

⁹ Ẹmwẹ ne ọ rrọ ọ re ọna khin, “Wa bu ẹdẹ aguẹ, wa tie emwa nii hia si koko, ne uwa rhie ehe itota uyi ne Nabot.

¹⁰ Wa gualọ igbẹki eva ne iran do ba ẹre ifi ẹzọ wẹ iran họn vbe ọ kpa unu ghe Osa kevbe ọba. Iyeke ọnii, wa rhie ẹre ladian vbe ore ẹvbo ne u wa ya filo okuta gbe ẹe rua.”

¹¹ Emwa iwinna kevbe ekamakodin e Jezibẹl keghi ru vbene Jezibẹl khare.

¹² Iran keghi bu ẹdẹ aguẹ, iran na tie emwa nii hia si koko iran na rhie ihe itota ukpo uyi ne Nabot.

¹³ Igbẹki eva nii keghi wa sirra emwa hia ba ẹre ifi ẹzọ wẹ iran họn vbe ọ kpa unu ghe Osanobua kevbe ọba. Rhunmwuda ọnii, iran keghi silo ẹe ladian hin ore ẹvbo rre, iran na filo okuta gbe ẹe rua.

¹⁴ A keghi gie ya khama Jezibẹl wẹẹ, “A gbe Nabot nẹ.”

¹⁵ Uhunmwu ne iran gie ghi wa sẹ obọ e Jezibẹl nẹ, ọ keghi tama Ehab ne ọ ya mu ugbo emwiokọ ne ọ wẹ rẹn i khiẹn ne ẹẹn.

¹⁶ Ehab keghi gele wa gha khian ọwarọkpa ne ọ ya mu.

¹⁷ Ẹre Nọyaẹnmwa na gie Elaija ne akhasẹ ne ovbi e Tisbi wẹẹ,

¹⁸ “Bu Ehab ne ọba Sameria. U gha do vba ẹre vbe uwu ugbo azara e Nabot ọ ra ya mu ya khian ọghe ọe.

¹⁹ U ghi tama rẹn wẹ mẹ ne Nọyaẹnmwa ọ re ọ tama rẹn wẹẹ, ‘U gbe ọmwa ran nẹ, te u ghi ra vbe rri ọ re ukhu ra? Tama rẹn wẹ vbenian ọre I khare. Ehe ne avbe ekita na lalọ esagiẹn e Nabot, evba dandaandan iran gha na vbe lalọ ọwuẹ!’ ”

²⁰ Ugbẹn vbe Ehab ghi bẹghe Elaija, ọ tama rẹn wẹẹ, “U vbe zọ owẹ mwẹ miẹn nẹ ra oghian mwẹ.” Elaija keghi wanniẹn wẹẹ, “Ẹn, I zọ owẹ ruẹ miẹn nẹ rhunmwuda u na wa rhie gba yọ ne u gha ru emwi ne ọ ma gba vbe odaro e Nọyaẹnmwa.

²¹ Ẹre Nọyaẹnmwa na tama ruẹn wẹẹ, ‘I gha zẹ ọkhọ rruan ruẹn. I gha mu ẹẹn fua, I ghi vbe gbele ikpia ni rre ẹgbẹe ruẹ fo, ibiẹka kevbe eniwanrẹn.

²² Ẹgbẹe ruẹ ghi do gha yevbe ẹgbẹe ọghe Jeroboam ne ọba, ovbi e Nebat kevbe Baasia ne ọba ovbi Ahija, rhunmwuda wẹ ọre ọ ya obọ si ohu mwẹ rrie egbe vbe ne u na silo ivbi Izrẹl obọ fi orukhọ.’

²³ E Nọyaẹnmwa kevbe kha vbe ekpa e Jezibẹl wẹẹ, ‘Ekita ọ re ọ khian rri ikun ruẹn vbe adesẹ ore Jezrẹl.

²⁴ Etuẹn ni wulo ye adesẹ ẹvbo, ekita ghi rri iran, iran ni wulo ye oha, avbe ugu ghi rri iran.’ ”

²⁵ (A ma he vbe miẹn ọmwa ne ọ wa rhie egbe ẹre fẹẹrẹ yọ ne ọ wa gha ru emwi ne ọ ma gba vbe odaro e Nọyaẹnmwa zẹ vbe ne Ehab gha ye, ne a miẹn wẹ e Jezibẹl ne amwẹ ọnrẹn gha kpikpi fiọ ne ọ gha ru ẹe.

²⁶ Rẹn ọ re ọmwa ne ọ he ru emwi emwiekhue sẹẹ vbe ekpa ẹbọ ne a ga zẹ vbene emwa Amọri gha ru, emwa ne e Nọyaẹnmwa khulo hin otọe ni rre vbe ivbi Izrẹl dee.)

²⁷ Elaija ghi guan fo nẹ, Ehab keghi sọ ukpọn irẹn uan, ọ keghi kie ẹre viọ kua, ọ na viọ ukpọn akhiẹ yọ. Ọ ma ghi rri evbare, ọ keghi ya ukpọn akhiẹ vbiẹ, ọ kegha khian huẹẹ, vbe ọmwa ne akhiẹ gbe fi otọ.

²⁸ E Nọyaẹnmwa keghi tama Elaija ne akhasẹ wẹẹ,

²⁹ “U miẹn vbene Ehab mu egbe rriotọ hẹ vbe odaro mwẹ? Rhunmwuda ne ọ na ru vberriọ, I i ghi zẹ ọkhọ na rruan rẹn vbe ọ he rre agbọn, ẹghẹ ovbi ẹre I gha na zẹ ọkhọ ne ọ rruan ẹgbẹe Ehab.”