I Ọba 20 - Edo Bible (E Baibol Ẹdo) Version 1996

Okuo E Siria

¹ E Benhadad ne ọba e Siria keghi si ivbi iyokuo ẹre hia koko. Enigie eva yan ọgban ọvbehe keghi lele ẹe, iran kevbe ẹsin kevbe ikẹkẹ okuo iran, ọ keghi ladian, ọ tan obọ khinkhian e Sameria, ọ na suẹn gha guẹ khọn.

² Ọ keghi gie emwa bu Ehab ne ọba Izrẹl gha khian, ọ tama rẹn wẹẹ, “E Benhadad ne ọba e Siria wẹ,

³ ne a viọ igoru ruẹ kevbe esiliva ruẹ, avbe amwọ wọn kevbe iran ni wegbe sẹẹ vbe ivbi uẹ gie irẹn.”

⁴ Ehab keghi wanniẹn wẹẹ, “Wa tama enaẹmwẹ ighẹ Benhadad wẹ I khuẹnniẹn yọ, ọ sẹtin do rhie imẹ kevbe ne ọ vbe viọ emwi ne I mwẹ hia.”

⁵ Iyeke ọnii, emwa ne a gie ẹre uhunmwu nii keghi vbe do tama Ehab ighẹ e Benhadad vbe gie uhunmwu ọvbehe rre wẹẹ, “I gie ne a tama ruẹn wẹ ne u viọ igoru ruẹ, esiliva ruẹ, amwọ ọn kevbe avbe ivbi uẹ gun mwẹ.

⁶ Sokpan, banbanna nian, I gha gie emwa mwẹ bu ruẹ gha dee ne iran do gualọ ẹguae ruẹ, ne iran vbe viọ emwi hia ne iran ghi yayi ighẹ ọ maa vbọ. Iran gha sẹ evba vbe odẹ ẹghẹ na akhuẹ.”

⁷ Ehab ne ọba keghi tie avbe ekaolotu ẹvbo nii hia rrie egbe ọ tama iran wẹẹ, “Wa miẹn wẹ okona wa gualọ emwi ne ọ gha ru ima ẹre. Ọ gie gun mwẹ wẹẹ ne I viọ ibiẹka mwẹ kevbe ivbi mwẹ, esiliva kevbe igoru mwẹ gie irẹn, I keghi khuẹn niẹn yọ.”

⁸ Avbe ekaolotu kevbe emwa nii keghi tama rẹn wẹẹ, “Ghẹ zẹ yọ ẹre re, ghẹ rhie otọ ne ẹẹn.”

⁹ Ẹre Ehab ghi na tama emwa ne Benhadad gie ẹre uhunmwu wẹẹ, “Wa tama enaẹmwẹ ighẹ ọba wẹ, I kue ye uhunmwu ne ọ ka gie gun mwẹ sokpan I i sẹtin khuẹnniẹn ye ne ogieva na.” Emwa ne a gie ẹre uhunmwu ghi kpao nẹ, e Benhadad kevbe gie iran uhunmwu,

¹⁰ ọvbehe rre wẹẹ, “I gha viọ emwa ni bun rre ne iran do dunmwu ẹvbo ruẹ na an. Iran gha bun sẹrriọ wẹ te iran khian kpolo ebubẹ ọre mwẹ obọ gha rrie. Te avbe ẹbọ gha kinmwi mwẹ gbe ua a deghẹ I ma ru ẹe vberriọ!”

¹¹ Ehab ne ọba keghi wanniẹn wẹẹ, ya khama e Benhadad ne ọba wẹẹ, “Ovbiyokuo ne ọ sekpe, te ọ khọn okuo sẹ owa nẹ ọ kegha ghagha ighẹ ẹ i re vbe ọ ma he yo okuo.”

¹² Ehe ne Benhadad kevbe avbe ihua ẹre na da ayọn vbe uwu agọ ukpọn rẹn, ọ re iran na do na iyẹn na ma rẹn. Ọ keghi tama emwa rẹn ne iran ya khọn ẹvbo nii, edọmwadẹ ọghọe keghi mudia ye ihe ẹre.

¹³ Vbe uwu ẹghẹ ne a kha na, akhasẹ ọkpa na ya tama Ehab ne ọba wẹẹ, “E Nọyaẹnmwa khare wẹẹ, ‘Ghẹ gie ohan ivbi iyokuo ni bun na mu ẹẹn! I gha rhie ruẹ obọ yan iran uhunmwu ẹrẹna, u ghi rẹn wẹ mẹ ọrọre Nọyaẹnmwa!’ ”

¹⁴ Ehab keghi nọ wẹẹ, “Gha ọ gha ke odaro nene okuo yi?” Akhasẹ ni keghi wanniẹn wẹẹ, “Avbe enigie isi ọ re ọ gha viọ ivbi iyokuo avbe igbama gha khian erriọ Nọyaẹnmwa kha re.” Ọba kevbe nọ wẹẹ, “Gha ọ ra ru ọkaolotu ivbi iyokuo kpataki ne ọ rrọọ?” Akhasẹ na wanniẹn wẹẹ, “Wẹ tobọ ọ.”

¹⁵ Ẹre ọba na mwamwa avbe ivbi iyokuo igbama viọ ne a vbe ogie isi, ehia kegha re eva yan ọgban ọya yan uri (232). Ọ kevbe tie ivbi iyokuo Izrẹl ladian, ehia kegha re arriaisẹn ihinrọn (7,000).

¹⁶ Ẹghẹ ogiavan ọre igbinna ya suẹn vbe Benhadad kevbe iran eva yan ọgban ni deba ẹre da ayọn gbe egbe vbe agọ ukpọn iran.

¹⁷ Ivbi iyokuo igbama keghi kodaro. Avbe ọrhẹ ne Benhadad gie keghi khama rẹn wẹ, ivbi iyokuo eso ke Sameria dee.

¹⁸ Rẹn keghi wa tama iran wẹẹ, “Wa munọ iran munọ ẹmwẹ ne unu ọ re te iran do gbinna ra te iran do gualọ adọlọ.”

¹⁹ Ivbi iyokuo igbama ọre ọ ke odaro, ivbi iyokuo Izrẹl keghi lele iran,

²⁰ orhiọnkpọkpa na gbe ọmwa ne irẹn vbe ọre gba viọ aro igbinna da egbe. Ivbi e Siria keghi lẹ kua, ivbi Izrẹl keghi zẹ iran khu, sokpan, e Benhadad keghi hin ẹsin lẹ fua ke ẹe kevbe iran ni hin ẹsin ọvbehe ni yaba ẹre.

²¹ Ehab ne ọba keghi ladian, ọ keghi munọ avbe ẹsin ni kevbe avbe ikẹkẹ okuo, ọ keghi khọn ivbi e Siria muotọ vbene obọ na da iran ẹsẹse.

²² Ẹre akhasẹ nii na bu Ehab gha khian, ọ tama rẹn wẹẹ, “Gha khian ya u ya dọlegbe mu ivbi iyokuo ruẹ egbe ye otọ, ne u vbe ya ru emwamwa ne ọ gbe ẹkun sẹ otọ ru rhunmwuda, ọba e Siria gha dọlegbe mu okuo rre vbe omuhẹn orhọ!”

Okuo E Siria Ne Ukpogieva

²³ Emwa e Benhadad ne ọba keghi tama rẹn wẹẹ, “Ẹbọ emwa Izrẹl, ẹbọ ne uhunmwu oke iran khin, onii ọ si ẹe ne ivbi Izrẹl na khọn ima muotọ. Sokpan ma gha gu iran gbinna vbe otọe kẹkan, ẹ i mwẹ ma ma khọn miẹn iran otọ.

²⁴ Banbanna nian, miẹn avbe ogie isi eva yan ọgban emwi ne iran te viọ ye okuo ne u viọ iran ne avbe ọkaokuo igbinna.

²⁵ Iyeke onii vbe si avbe ivbi iyokuo ne ọ vbe bun vba ni kpa sẹ uẹ rae nii, deba ẹsin kevbe ikẹkẹ okuo ne ọ vbe bun vba ọghe okaro nii. Ma ghi gu ivbi Izrẹl gbinna vbe otọe kẹkan, ma gha khọn miẹn iran otọ vbe ọnọna.” E Benhadad ne ọba keghi yayi, ọ na rhie ude iran.

²⁶ Orhọ nọkpa ghi wa da suẹn, ọ keghi si emwa rẹn koko, gu ivbi Izrẹl gbinna.

²⁷ A keghi tie ivbi Izrẹl hia kugbe, a na viọ emwi igbinna ne iran; iran keghi khian ladian. Iran na gha egbe ye otu eva, iran na viọ aro da ivbi e Siria. Ivbi Izrẹl keghi ye vbe ivbi oghẹn ẹwe eva giẹrẹ vbe a ya iran gie ivbi e Siria ne ọ wa gha egbe gba oha nii rre eni hia.

²⁸ Akhasẹ ọkpa keghi bu Ehab ne ọba gha khian, ọ tama rẹn wẹẹ, “Vbenian ọ re Nọyaẹnmwa khare: Rhunmwuda ne ivbi e Siria na kha wẹ, Osanobua uhunmwu oke ọre imẹ khin ighẹ me ẹ i re Osanobua otọ kẹkan, I gha rhie ẹtin ne uẹn ya khọnmiotọ vbe uhunmwu ivbi iyokuo ẹre ne ọrhiẹnrhiẹn biẹnrhẹn, ẹghẹ nii, wẹ kevbe emwa ruẹn gha rẹn ighẹ mẹ ọrọre Nọyaẹnmwa!”

²⁹ Ivbi iyokuo e Siria kevbe ivbi iyokuo Izrẹl keghi wa ya ikpẹdẹ ihinrọn viọ aro da egbe vbe ne dọmwadẹ ọghọe na rre ihe ẹre. Vbe ikpẹdẹ ne ogihinrọn, iran keghi suẹn igbinna, ivbi Izrẹl keghi gbele ivbi e Siria arriaisẹn iyisẹn (100,000).

³⁰ Iran ni miẹn uhunmwu vbọ keghi lẹ la adesẹ ore ẹvbo, iran kegha rrie ẹvbo ne a tie ẹre Afẹk, ekẹn ne a gbe lẹga ẹvbo nii keghi siẹn rhu iran, ọ keghi gbele arhin arriaisẹn eha irrọ vbe ọgban (27,000), vbe uwu iran. E Benhadad kevbe lẹfua, ọ na ya lẹre ye ughugha ne ọ rre iyeke owa.

³¹ Emwa rẹn keghi bu ẹre gha khian, iran tama rẹn wẹẹ, “Ma họẹn wẹ emwa itohan ọ re avbe ọba Izrẹl khin. Rhie asẹ ne ima, ne ima viọ ukpọn akhiẹ rhuan, ne a vbe rilo irri ye urhu bu ọba Izrẹl gha khian, u gha ghe, ọ gha zẹ ima obọ.”

³² Rhunmwuda ọnii, iran keghi viọ ukpọn akhiẹ rhuan, iran keghi rrilo irri ye urhu, iran keghi bu Ehab gha khian, iran tama rẹn wẹẹ, “E Benhadad ne ọguọmwadia ruẹ wẹ ne u lahọ ne u ghẹ gbe irẹn uan.” Ehab keghi wanniẹn wẹẹ, “Ọ ye rre agbọn ra? ọ ma khekherriọ, te ọ yevbe ọtẹn mwẹ ne okpia!”

³³ Emwa e Benhadad keghi wa rhie aro ye otọ ne iran rẹn vbene o gha ye hẹ, rhunmwuda ọnii, Ehab ghi kha wẹẹ, “Ọtẹn mwẹ ne okpia” iran keghi wa zegiẹgiẹ mu ọnii go kha wẹẹ, “Vbene u gele ta ee ni, ọtuẹn ne okpia ore Benhadad khin!” Ehab keghi kha wẹẹ, “Wa ya rhie ẹre gunmwẹ.” E Benhadad ghi rre, Ehab na wẹ ne ọ do gu irẹn tota ye uwu ikẹkẹ okuo.

³⁴ E Benhadad keghi tama rẹn wẹẹ, “I gha viọ avbe ẹvbo ne erha mwẹ munọ ẹn vbe otọe erha a ne uẹn. U sẹtin bu ẹki ye Damaskọs zẹ vbene erha mwẹ vbe bu ye Sameria.” Ehab keghi wanniẹn wẹẹ, “I gha sẹ uẹ rae rhunmwuda vbene a ghi mwamwa ẹẹn yi na.” Ọ keghi gu ẹe rhie obọ ye ebe ọ na sẹ ọe rae.

Akhasẹ Ọkpa We Ehab I Maa

³⁵ Zẹ vbene Nọyaẹnmwa gie, ọkpa vbe uwu ivbiotu akhasẹ keghi tama ogieva ẹre wẹẹ, “Fi mwẹ emwi.” Sokpan, ọ keghi he.

³⁶ Rẹn keghi rhunmwuda ọnii tama rẹn wẹẹ, “Rhunmwuda ighẹ u he uhunmwu ye Nọyaẹnmwa obọ, u gha wa da kpao vbe ehe ne i ye rre, oduma gha gbe uẹ re.” Ọ ghi gele wa kpao vbe evba rre, oduma keghi ladian, ọ na gbe ẹe rua.

³⁷ Akhasẹ ọkpa na keghi vbe bu ọmwa ọvbehe, ọ tama rẹn wẹẹ, “Fi mwẹ emwi.” Oko na ke gele ru vberriọ, ọ na kinmwi ẹn.

³⁸ Akhasẹ ni keghi gbalọ aro ne a ghẹ rẹn ọnrẹn ọ keghi ya mudia ye ọkpẹn odẹ, ne ọba Izrẹl ra do la gberra.

³⁹ Ọba ghi wa gberra khian akhasẹ ni keghi datie ẹre, ọ tama rẹn wẹẹ, “U gha to ukpẹre Umogun, ehe ne I na gbinna vbe okuo, ovbiyokuo keghi mu oghunmwu ọkpa gun mwẹ, ọ tama mwẹ wẹẹ, ‘Gha ghe oko na, ọ gha lẹfua, uhunmwu ọ re u ya khiẹ ọre, a deghẹ ẹ i re vberriọ, u gha ha esiliva arriaisẹn eha (3,000) ne a gha fian ẹre.’

⁴⁰ Sokpan iwinna ọvbehe eso keghi mu mwẹ, okpia nii keghi lẹfua.” Ọba keghi wanniẹn wẹẹ, “We Ọ re ọ bu ohiẹn egbuẹ. Te u gha rri oya ne ọ ke yọ.”

⁴¹ Akhasẹ nii keghi fannọ ukpọn hin arọ rre. Ọba keghi wa rẹn vbe ọwarọkpa wẹ ọkpa vbe uwu avbe akhasẹ nọ.

⁴² Akhasẹ nii keghi tama ọba wẹẹ, “Vbenian ọre Nọyaẹnmwa khare, rhunmwuda ne u na gie ọmwa nii lẹfua vbe imẹ wẹ ne u gbe ẹe rua, uhunmwu ọ re u ra ya khiọ ẹre, a gha fuẹn ivbi iyokuo ruẹ ua rhunmwuda ne iran na gie ivbi iyokuo ẹre lẹfe.”

⁴³ Ọba keghi werriegbe gha rrie Sameria vbene egbe hia na wọ ẹre ye otọ, ekhọe ẹre kevbe tighi ua.