I Ọba 2 - Edo Bible (E Baibol Ẹdo) Version 1996

Uhunmwu Okiekie Ne Devid Gie E Solomọn Re

¹ E Devid ghi ra wu, ọ keghi tie Solomọn ne ovbi ẹre, ọ keghi gie uhunmwu okiekie wẹẹ:

² “Ẹdẹ uwu mwẹ rre nẹ. Din, ne u gie ekhọe ruẹ vbe sẹ otọ,

³ ne u gha ru avbe emwi ne Nọyaẹnmwa ne Osanobua ruẹ tama ruẹn ne u ru. U ghi gha ya uhi ẹre kevbe ilele ẹre ru emwi zẹ vbe ne a gbẹnnẹ ọẹn ye uhi e Mosis ne emwi hia ne u ru miẹn ehe na gha dinna odẹ nuẹn vbe ehe ne u rhirhi mu uhunmwu da.

⁴ U gha ru vberriọ, e Nọyaẹnmwa gha mu eyan ne ọ yan rẹn sẹ vbe ọ tama mwẹ wẹẹ: ‘Ivbi uẹ ọ re ọ ra rriọba yan Izrẹl vbe ẹghẹ hia, zẹ vbe ne iran vbe ya mu aro yọ ne iran ye ekhọekekhọe gha mu uhi mwẹ sẹ.’

⁵ “Emwi ọvbehe ye vbe rrọọ. U yerre emwi ne Joab ru mwẹ re ne ọ na gbele avbe ọkaokuo Izrẹl eva, Abna ne ovbi e Niẹ kevbe Amasa ne ovbi e Jeta. U yerre wẹ ẹ i re te a khọn okuo vbe ọ gbele iran an ba ẹmwẹ emwa ne iran gbele vbe ẹghẹ okuo. U miẹn nian, ọ gbele emwa ni ma ru khọ nẹ, a keghi ka ẹe ye ime urhu, mẹ ọ ghi ye uhunmwu tọn emwi ne ọ ke ẹre ikian mu.

⁶ U rẹn emwi ne u gha ru, ghẹ gie ẹe wu uwu ẹhi.

⁷ “U ghi tohan ivbi e Bazilai ni ke Giliad rre, u ghi gha gbe aro ghe iran, rhunmwuda, iran tohan mwẹ vbe ẹghẹ ne I na gha lẹ ne ọtuẹn ighẹ Absalọm.

⁸ “Vbe ye Simẹi rre ighẹ ovbi e Gera ne ovbi ẹvbo ne a tie ẹre Bahurim vbe Bẹnjamin. Ọ keghi ye ihẹn viẹ mwẹ agbọn ota agbọn owiẹ vbe ẹghẹ ne I na gha rrie Mahanem, sokpan, ọ ghi bu mwẹ sẹ Jọdan, I keghi yan ma rẹn wẹ I i ra gbe ẹe rua.

⁹ Sokpan ghẹ sẹ ọe rae vbe ne ọ ma na rri oya yọ, u rẹn emwi ne u gha ru, u ghi gia miẹn wẹ a gbe ẹe rua.”

Uwu E Devid

¹⁰ E Devid keghi wu, a na re ẹre ye Jerusalẹm.

¹¹ Ukpo iyeva ọre ọ rriọba la vbe otọ Izrẹl, ọ ya ukpo ihinrọn vbe Hibrọn, ọ keghi vbe ya ukpo ehayan ọgban vbe Jerusalẹm.

¹² E Solomọn keghi rriọba lele Devid ne erha ẹe, ẹtin ẹnrẹn zẹ vbe ọba kegha re ne ọ gbe ẹkun sẹ otọ ẹsẹse.

Uwu Adonaija

¹³ Ẹre Adonaija ne a tie iye ẹe Hagit, na bu e Batsiẹba ne iye Solomọn gha khian, okhuo nii ke nọ rẹn wẹẹ, “A deghẹ okhian maa?” Rẹn keghi wanniẹn wẹẹ, “Ọ wa maa.” Rẹn keghi rhie te ẹe wẹẹ,

¹⁴ “Te I do nọ ruẹn emwiọkpa.” Rẹn keghi nọ rẹn wẹẹ, “De emwi ne onii khin?”

¹⁵ Rẹn keghi wanniẹn wẹẹ, “U rẹnrẹn wẹ mẹ ọ re ọba te sẹ ọre egbe, emwa hia ni rre Izrẹl te rhie aro yọ wẹ mẹ ọ re ọ ra rriọba. Sokpan, ọ ma ghi de vberriọ, ọtẹn mwẹ ọ re ọ ghi rriọba rhunmwuda, iho e Nọyaẹnmwa nọ vberriọ.

¹⁶ Wanwanna nian, emwi ọkpa ọ re I do nọọn, ghẹ mwẹ u ma ru ẹe mẹ.”

¹⁷ E Batsiẹba keghi nọ rẹn wẹẹ, “De emwi ne ọ khin yi?” Rẹn keghi wanniẹn wẹẹ, “Lahọ, tama e Solomọn ne ọ rhie Abisiag ne ovbi ẹvbo e Siunẹm mẹ rhie rọnmwẹ, mẹ rẹnrẹn wẹ, ẹ i ra he uhunmwu na ye uẹ obọ.”

¹⁸ Rẹn keghi wanniẹn wẹẹ, “Ọ wa maa, I gha tama ọba ne uẹn.”

¹⁹ Ẹre Batsiẹba na bu ọba ne ọ ya gu ẹe guan ne Adonaija. Ọba keghi gua kpao ne ọ tue iye ẹe, ọ kevbe vbokho uhunmwu rriotọ ne ẹẹn. Ọ keghi tota ye ẹkete ẹre ọ na wẹ ne iran mu ẹkete ọvbehe rre ne ọ tota yọ diake irẹn vbe obọ erha ọmwa.

²⁰ Okhuo nii keghi kha wẹẹ, “I mwẹ emwi ọkpa ne I do rinmwian ne u ru mẹ, lahọ, ghẹ mwẹ u ma ru ẹe mẹ.” Ọ keghi nọ wẹẹ, “Vbe ọ khin yi? I gha ru ẹe ne uẹn.”

²¹ Okhuo nii keghi kha wẹẹ, “Gie Adonaija ne ọtuẹn rhie Abisiag rọnmwẹ.”

²² Ọba na nọ wẹẹ, “Vbu a na wẹ ne I rhie Abisiag ne ẹẹn hẹ yi? U sẹtin wẹ ne I wa vbe mu ẹkete ne ẹẹn. U ghe ighẹ ọtẹn mwẹ ne ọdiọn nọ, Abiata ne ohẹn kevbe Joab, ọghe ọe ọre iran ta yi?”

²³ Ẹre Solomọn na yan wẹẹ, “Te Osanobua gha kinmwi mwẹ gbe ua a deghẹ ima ru ẹe ne Adonaija ye uhunmwu khiọ emwi ne ọ nọ rẹn na!

²⁴ E Nọyaẹnmwa gbe mwẹ ẹkun sẹ otọ nẹ vbe ẹkete e Devid ne erha mwẹ, ọ mu eyan ne ọ yan rẹn sẹ nẹ, ọ mu arriọba nii ne imẹ kevbe avbe ivbi mwẹ nẹ. I ya eni e Nọyaẹnmwa yan we ẹdẹnẹrẹ na ọre Adonaija miẹn agbọn sẹ?”

²⁵ Ẹre Solomọn ne ọba na gie Benaia ne ọ gha khian, ọ ke ya gbe Adonaija rua.

A Khu Abiata Fua, E Joab Vbe Wu

²⁶ Ẹre Solomọn ne ọba na tama Abiata ne ohẹn wẹẹ, “Gha rrie Anatọt ne ẹvbo ruẹ. Te ọ te kei ne u wu sokpan, mẹ i ra gbe ue ua nian rhunmwuda, wẹ ọre ọ gha gbe aro ghe Ẹkpẹti Ile vbe u rre ehe ne erha mwẹ ye ighẹ Devid wẹ, vbe ghae vbe uwu ọlọghọmwa rẹn hia.”

²⁷ Ẹre Solomọn na rhuan Abiata hin ehe ne ọ na te ga e Nọyaẹnmwa zẹ vbe ohẹn, ọ keghi do mu ẹẹn sẹ ighẹ ẹmwẹ ne Nọyaẹnmwa ta ẹe vbekpa Elai kevbe ivbi ẹre vbe Siailo.

²⁸ E Joab ghi họn emwi ne ọ sunu (Adonaija ọ re irẹn yegbe ba, ọ ma deba Solomọn) ọ keghi lẹ gha rrie Owa Ukpọn e Nọyaẹnmwa ne ọ huanrẹn, ọ keghi ya sobọ mu ukpẹ Ogiukpo.

²⁹ E Solomọn ne Ọba ghi họn ẹmwẹ na wẹ e Joab lẹ gha rrie Owa Ukpọn ne ọ huanrẹn kevbe wẹ ọ rre ọkpẹn Ogiukpo, e Solomọn keghi gie ya nọ Joab emwi ne ọ ya ẹe lẹ gha rrie Ogiukpo. E Joab keghi wanniẹn wẹ ohan e Solomọn ọ re ọ mu irẹn. Ẹre Solomọn ne ọba na gie Benaia ne ọ ya gbe Joab rua.

³⁰ Ọ kegha rrie uwu Owa Ukpọn ne ọ huanrẹn, ọ keghi tama Joab wẹẹ, “Ọba wẹ ne u ladian vba.” E Joab keghi wanniẹn wẹẹ, “Ẹn o, emwa I gha na wu.” E Benaia na bu ọba gha khian ọ na ya tama rẹn vbene Joab kha hẹ.

³¹ E Solomọn ke wanniẹn wẹẹ, “Ru ẹe vbene Joab kha re, gbe ẹe rua ne u re ẹre, ẹghẹ nii, ẹmwẹ emwi ne Joab ru ne ọ na gbele emwa ni ma rukhọ ghi lahin mwẹ uhunmwu rre kevbe hin uhunmwu avbe ivbi mwẹ rre.

³² E Nọyaẹnmwa gha rria e Joab ikhi ye a ghẹ ru ne ọ ru nii vbe ne erha mwẹ ma na rẹn. E Joab gbele arhin eva ni maa sẹẹ ọre vbe ne iran ma na ru khọ, iran na ọ re Abna ne ọkaokuo ọghe ivbi iyokuo Izrẹl kevbe Amasa ne ọkaokuo ọghe ivbi iyokuo e Juda.

³³ Ikhi ne a gha rria ye izigha ne a de iran na, uhunmwu e Joab kevbe ivbi ẹre ọ re ọ gha ye ẹdẹdẹmwẹdẹ sokpan ivbi e Devid ni tota ye ẹkete, te Nọyaẹnmwa gha rhie arudinodẹ ne iran ẹdẹdẹmwẹdẹ.”

³⁴ Ẹre Benaia na gha rrie Owa Ukpọn Ne ọ huanrẹn, ọ na ya gbe Joab rua. A keghi ya re ẹre ye adesẹ ore vbe ẹvbo ẹre.

³⁵ Ọba keghi ya Benaia ru ọkaokuo ye ihe ẹre, ọ na rhie Zadọk ne ohẹn ye ihe Abiata ne ohẹn.

Uwu E Simẹi

³⁶ Ọba keghi gie ne a tie Simẹi, ọ kevbe tama rẹn wẹẹ, “Bọ owa ruẹ ye Jerusalẹm mwa na, u ghi gha rre evba, ghẹ ladian hin ore ẹvbo rre.

³⁷ U gha khian gberra Ẹzẹ Kidrọn, te u ya uhunmwu khiẹ ọre, emwi ne u ya obọ ruẹ si nọ.”

³⁸ E Simẹi kevbe wanniẹn wẹẹ, “Ọ wa maa, Umogun, I gha ru vbene u kha re.” Ọ keghi gele gha rre Jerusalẹm vbe ẹghẹ ne ọ taẹn.

³⁹ Ọ ghi gba vbe ukpo eha, eva vbe usun eviẹn Simẹi keghi lẹ kua gha rrie ọghe Akis ne ọba e Gat ne ovbi Maka.

⁴⁰ Rẹn keghi gbalọ ekẹtẹkẹtẹ ẹre, ọ na gha rrie ọghe Akis ne ọba vbe Gat ne ọ ya gualọ avbe eviẹn ọnrẹn, ọ keghi miẹn iran, ọ na viọ iran werriegbe gha die owa.

⁴¹ Ugbẹn vbe Solomọn ghi họn emwi ne Simẹi ru,

⁴² ọ keghi gie ne a tie ẹre, ọ wẹẹ, “I ya a vẹn ihẹn wẹ ne u ghẹ ladian hin e Jerusalẹm rre, I keghi vbe ya obọ sẹ ekhae ne uẹn wẹ u gha ladian, te u wu yọ. Ẹre te u kue yọ vberriọ ẹghẹ nii wẹ u gha ru vbene I khare?

⁴³ Vbọzẹ ne u ma na ghi mu eyan ruẹn sẹ nian, u ma ru vbene I khare?

⁴⁴ U rẹnrẹn ẹsẹse avbe emwi dan ne u ru erha mwẹ ighẹ Devid re. Te Nọyaẹnmwa rria ruẹ ikhi yọ.

⁴⁵ Sokpan, ọ gha fiangbe mwẹ, ọ ghi gbe ẹkun arriọba Devid sẹ otọ ẹdẹdẹmwẹdẹ.”

⁴⁶ Ẹre ọba na gie Benaia uhunmwu, rẹn na gha khian ọ na ya gbe Simẹi rua. Ẹghẹ na, te obọ e Solomọn ghi wa gba emwi hia fẹẹrẹ.