I Ọba 19 - Edo Bible (E Baibol Ẹdo) Version 1996

Elaija Vbe Uhunmwu Oke Sainai

¹ Ehab ne ọba keghi na iyẹn emwi hia ne Elaija ru ma e Jezibẹl ne amwẹ ọnrẹn, kevbe vbene ọ vbe gbele avbe akhasẹ e Bal hia a hẹ.

² Okhuo ni keghi gie ne a tama Elaija wẹẹ: “Te avbe ẹbọ gha kinmwi mwẹ gbe ua a deghẹ ọ te sẹ ẹghẹ na akhuẹ mẹ ma ru uwẹ zẹ vbene u ru avbe akhasẹ nii.”

³ Ohan keghi mu Elaija ọ na lẹ fua, ọ keghi rhie ọguọmwadia ẹre ba egbe, ọ na lẹ gha rrie Biẹsiẹba vbe Juda. Ọ keghi vbe sẹ ọguọmwadia ẹre rae ye evba.

⁴ Elaija na ye vbe khian okhian ikpẹdẹ hoho la uwu oha. Ọ keghi yakọ, ọ na tota ye ototọ irhu ọghe erhan, ọ na wẹ rẹn wu ọ re ọ ghi maa sẹ. Ọ keghi na erhunmwu wẹẹ, “Ọ sẹ mwẹ abọ nẹ Nọyaẹnmwa. Rhie orhiọn mwẹ ighẹ i wu ọ re ọ ghi maa sẹ!”

⁵ Ọ keghi lovbiẹ ye ototọ erhan nii, ovbe na rhie ẹre. Vbe udomwurri, odibo Osa keghi ya obọ kan rẹn, ọ wẹẹ, “Kpaegbe ne u rri evbare.”

⁶ Ọ na ghee lẹga, ọ ghi ghe ududu eka ọkpa kevbe ovbi ẹluba amẹ rre irẹn ọkpẹn uhunmwu. Ọ keghi rri evbare, ọ na wọn amẹ, ọ na vbe dọlegbe lovbiẹ.

⁷ Odibo e Nọyaẹnmwa kevbe werriegbe bu ẹre ukpogieva, ọ huẹn ọnrẹn ọ keghi tama rẹn wẹẹ, “Kpaegbe ne u rri evbare ne a ghẹ do miẹn wẹ ẹtin ruẹn ma sẹ okhian na.”

⁸ Elaija keghi kpaegbe, ọ rri evbare, ọ keghi wọn amẹ, evbare ni keghi rhie ẹtin ne ẹẹn ne ọ ya khian okhian ikpẹdẹ iyeva gha rrie Sainai ne oke ne ọ huanrẹn.

⁹ Ọ keghi la uwu uvun okuta vbe evba ne ọ vbiẹ evba ne ẹdẹ gbe. Vbe udomwurri, e Nọyaẹnmwa keghi gu ẹe guan wẹẹ, “Elaija vbe u a ru vbe emwa yi?”

¹⁰ Rẹn keghi wanniẹn wẹẹ, “E Nọyaẹnmwa, Osanobua Oghodua, wẹ ọkpa kẹkan ọre I ga ke otọ gha dee. Sokpan, ivbi Izrẹl ma ghi mu ile ne iran guẹ ta sẹ, iran dunmwu avbe ogiukpo ruẹ sotọ, iran gbele avbe akhasẹ ruẹ hia, mẹ ọkpa ọre ọ ghi ke ẹe, iran vbe ho ne iran gbe mwẹ uan!”

¹¹ E Nọyaẹnmwa keghi tama rẹn wẹẹ, “Ladian ne u ya mudia ye odaro mwẹ vbe uhunmwu oke.” Ẹre Nọyaẹnmwa na do gberra, ọ na gie ẹhoho ne ọ wegbe, ọ na gha mu oke ni rueghe, ọ na gha rẹnkhẹn avbe okuta sokpan e Nọyaẹnmwa ma gha rre uwu ẹhoho nii. Ẹhoho keghi dobọyi, igbohiotọ keghi suẹn. Sokpan e Nọyaẹnmwa ma gha rre uwu igbohiotọ nii.

¹² Igbohiotọ ghi vbe fo nẹ, erhẹn keghi suẹn. Sokpan e Nọyaẹnmwa ma vbe gha rre uwu erhẹn nii. Vbe iyeke erhẹn nii, ovbi urhu ne rọkhọọ na guan ladian.

¹³ Elaija ghi họn ẹn, ọ keghi mu agbada ẹwu ẹre gua aro, ọ keghi ladian ya mudia ye onurho uvun okuta nii. Urhu ọkpa keghi gu ẹe guan wẹẹ, “Elaija vbe u a ru mwa yi?”

¹⁴ Rẹn keghi wanniẹn wẹẹ, “E Nọyaẹnmwa Osanobua ne Oghodua, wẹ ọkpa kẹkan ọ re I ga ke otọe gha dee, sokpan, ivbi Izrẹl ma ghi mu ile ne iran guẹ ta sẹ, iran dunmwu avbe ogiukpo ruẹ sotọ, iran kevbe gbele avbe akhasẹ ruẹ hia. Mẹ ọkpa ọ ghi ke ẹe, iran vbe ho ne iran gbe mwẹ uan.”

¹⁵ E Nọyaẹnmwa keghi kha wẹẹ, “Werriegbe ne u gha rrie oha ne ọ rre ọkpẹn e Damaskọs. U ghi la ore ẹvbo ni ne u ya ma Hazaẹl ọba e Siria.

¹⁶ U ghi vbe ma e Jehu ne ovbi e Nimsi ọba Izrẹl. U ghi rhie Elaisia ne ovbi e Siafat ne ovbi ẹvbo ne a tie ẹre Ebel Mehola u ghi ya ẹe ma akhasẹ ye ihe egbe ruẹ.

¹⁷ Ọmwa ne obọ e Hazaẹl ma vba ya gbe ua, e Jehu ghi gbe ẹe rua, ọmwa ne ọ vbe lẹ e Jehu fe, Elaisia ghi gbe ẹe rua.

¹⁸ Sokpan, I gha sẹ arhiẹn arriaisẹn ihinrọn (7,000) rae vbe Izrẹl, emwa ni rhie egbe mu mwẹ, emwa ni ma he vbokho igue rre ne Bal ra ne iran ya unu soso amazẹ ẹre unu.”

Utiemwẹ Elaisia

¹⁹ Elaija ghi ladian, ọ keghi vba Elaisia gha ya oghẹn ẹmila gua, oghẹn owọrọ keghi kodaro ne irẹn, ne ọ ke odieke vbọ ọre ọ ghi ya gua. Elaija keghi ban agbada ẹwu ẹre, ọ na mu ẹẹn yọ Elaisia.

²⁰ Elaisia keghi sẹ oghẹn ẹmila ẹre rae, ọ keghi rhulẹ lele Elaija wẹẹ, “Gun mwẹ ya ye isosunu gbe okhian ẹdẹ hia ne erha mwẹ kevbe iyemwẹ nẹ, I keghi do lele uẹ gha khian.” Elaija keghi tama rẹn wẹẹ, “Ọ maa, I ma da o obọ yi!”

²¹ Elaisia kegha rrie ehe ne oghẹn ẹmila ẹre ye, ọ keghi gbele ẹe, ọ na lẹe, ọ keghi ya urọnghọn ne ọ rrọ hie erhẹn ọ na viọ emiowo ni ne emwa, iran na rriọe. Ọ keghi kpao, ọ na ya gha lele Elaija khian zẹ vbe ọkpọmwa.