I Ọba 18 - Edo Bible (E Baibol Ẹdo) Version 1996

Elaija Kevbe Avbe Akhasẹ E Bal

¹ Ọ ghi kpee fua kherhe, vbe ọ ghi rre ukpo eha ne amẹ ma ghi rhọ, e Nọyaẹnmwa keghi tama Elaija wẹẹ, “Ya ye egbe ne Ehab ne ọba miẹn, I gha gie amẹ rhọ.”

² Ẹre Elaija na gha khian. Te obọ ohanmwẹ ghi dotọ vbe Sameria.

³ Ẹre Ehab na tie Obedaia ne ọka ẹguae. Obedaia keghi re ọmwa ne ọ ye ekhọe ga e Nọyaẹnmwa,

⁴ ẹghẹ ne Jezibẹl na gha gbele avbe akhasẹ e Nọyaẹnmwa, Obedaia keghi viọ iyisẹn vbe uwu iran, ọ na viọ iran lẹre, ekigbesiyeha vbe uvun ọkpọkpa, ọ na gha ye amẹ vbe evbare koko iran.

⁵ Ehab keghi tama Obedaia wẹẹ, “Gie ima ya ghe ivbi ẹzẹ hia kevbe ekhuọrhọ ẹzẹ ni rre otọe na, a deghẹ a gha miẹn irunmwu ne ọ gha sẹ a ya koko avbe ẹsin kevbe ẹmila ne iran ghẹ wulo. U gha ghe, ma i ra gbele emwirri ima rhọkpa.”

⁶ Iran na ghae egbe ye otọe nii, iran na viọ uhunmwu da odẹ ughughan.

⁷ Obedaia ghi wa khian, ọ keghi khian dekun Elaija vbe udomwurri, ọ keghi rẹn ọnrẹn, ọ na vbokho egbe rriotọ ne ẹẹn, ọ keghi nọ rẹn wẹẹ, “Wẹ gele nọ ra enọwanrẹn!”

⁸ Elaija keghi wanniẹn wẹẹ, “Ẹn, mẹ ne Elaija nọ, ya tama arowa a ighẹ ọba wẹ I rre emwa.”

⁹ Obedaia keghi wanniẹn wẹẹ, “Vbia ru ne u na ho ne a si mwẹ obọ rhie ne Ehab ne ọba gbe ua?

¹⁰ Ne I wa ye eni e Nọyaẹnmwa ne Osanobua vẹn ihẹn nian wẹ ehe i mwẹ ehe ne ọba ma he gualọ ọ la vbe otọe agbọn na. Ẹghẹ ne iran a rhirhi ya tama rẹn wẹ u i rre evba, ọ ghi ya enogie ẹvbo nii vẹn ihẹn wẹ ọ gha gele miẹn ọn.

¹¹ Banbanna nian, u ho ne i ya tama rẹn ighẹ u rre emwa.

¹² A deghẹ I ghi kpao nẹ orhiọn e Nọyaẹnmwa tọ ọn mu gha rrie ehe ne a ma rẹn vbo? Ẹghẹ nii, mẹ gha ghi tama Ehab ighẹ u rre emwa, ighẹ rẹn ma ghi miẹn ọn, ọ ghi gbe mwẹ uan. Yerre wẹ, ke ẹghẹ ọvbokhan mwẹ gha dee, ekhọe ọ re I ya ga e Nọyaẹnmwa.

¹³ U ma he họn wẹ ẹghẹ ne Jezibẹl na gha gbele avbe akhasẹ e Nọyaẹnmwa, I keghi ya viọ iyisẹn vbe uwu iran lẹre, ekigbesiyeha vbe uvun ọkpọkpa, I na ye amẹ vbe evbare gha koko iran.

¹⁴ Vbe u a ghi ra wẹ ne I ya tama ọba hẹ ighẹ u rre emwa? Te ọ gbe mwẹ uan.”

¹⁵ Elaija keghi wanniẹn, wẹẹ, “I ya eni Oghodua ne I ga yan ma ruẹn wẹ I gha ye egbe ne ọba miẹn ẹre na.”

¹⁶ Ẹre Obedaia na bu ọba gha khian, ọ keghi tama rẹn. Ehab keghi bu Elaija gha khian.

¹⁷ Ehab ghi bẹghe ẹre, ọ tama rẹn wẹẹ, “Wẹ ọ na khin ọ gbe ẹti ne ọ rhia sẹ vbe otọe Izrẹl.”

¹⁸ Elaija wanniẹn wẹẹ, “Ẹ i re imẹ ọre ọgbẹti, wẹ nọ, wẹ kevbe erha a. Wa i họn ẹmwẹ ne Nọyaẹnmwa ta, wa keghi vbe gha gho e Bal ne ẹbọ.

¹⁹ Banbanna nian, tama ivbi Izrẹl hia ne iran bu mwẹ gha die oke Kamẹl. Wa ghi viọ avbe akhasẹ e Bal ne ọre ekigbe siyeha ọ yan uri eva (450) gha dee, kevbe akhasẹ Asiẹrra ne ọre uri eva (400) ne Jezibẹl ne Amwẹ Ọba koko.”

²⁰ Ẹre Ehab na tie ivbi Izrẹl hia kevbe avbe akhasẹ e Bal gha di oke Kamẹl.

²¹ Elaija keghi hin bu iran gha khian ọ keghi kha wẹẹ, “Vbe ọ khian sikan mu uwa unu kpẹ sẹ hẹ yi ne uwa ya ta obọ ne u wa ye vbọ. A deghẹ e Nọyaẹnmwa ọrọre Osanobua, wa gae, a deghẹ e Bal ọrọre Osanobua, wa gae!” Sokpan, emwa nii ma wanniẹn ẹmwẹ rhọkpa.

²² Ẹre Elaija ghi na kha wẹẹ, “Mẹ ọkpa ọ ghi ke ẹe vbe avbe akhasẹ e Nọyaẹnmwa, sokpan akhasẹ e Bal ekigbesiyeha yan uri eva, ọre ọ rre emwa na.

²³ Wa viọ ẹmila eva rre, wẹ ne avbe akhasẹ e Bal mu okpa, iran ghi gbe ẹe, iran ghi vae, iran ghi viọ ẹre yan uhunmwu erhan sokpan, a ghẹ hie erhẹn yọ. Mẹ ghi vbe ru ẹmila nọkpa vberriọ.

²⁴ Wa wẹ ne avbe akhasẹ e Bal na erhunmwu ghe ẹbọ iran, mẹ gha vbe na erhunmwu ghe Nọyaẹnmwa. Ne ọ ghi rhirhi rhie ewanniẹn yọ, ọ na gie erhẹn rre, onii ọre Osanobua.” Emwa ni hia keghi wa khuẹnniẹn yọ.

²⁵ Elaija keghi tama avbe akhasẹ e Bal wẹẹ, “Vbene a na miẹn wẹẹ, wa bun sẹ vbe nian, wa ka mu ẹmila ne uwa mwamwa ẹẹn, wa na erhunmwu ghe ẹbọ uwa, sokpan, wa ghẹ mu erhẹn ye erhan nii.”

²⁶ Iran keghi mu ẹmila ne a mu gie iran, iran na mwamwa ẹẹn, iran na gha na erhunmwu ghe e Bal ya sẹ ẹghẹ ogiavan. Iran kegha go kha wẹẹ, “E Bal zẹ ẹmwẹ wanniẹn ima.” Iran na gha ku lẹga aka ne iran gba ẹe nii. Sokpan, ewanniẹn ma rre.

²⁷ Ọ ghi sẹ ẹghẹ ogiavan, Elaija keghi suẹn gha ya iran gbe ogie wẹẹ, “Wa kakabọ go ladian vbe erhunmwu ne uwa na. Ẹbọ nọ. U gha ghe te ọ miẹn aro ra te ọ ra ya ghughẹ ra te ọ ra khian ladian. U gha ghe, te ọ vbiẹ ne uwa huẹn ọnrẹn!”

²⁸ Rhunmwuda ọnii, avbe akhasẹ nii keghi kakabọ gha tọn urhu mu na erhunmwu, iran na gha ya abẹe vbe agbada giagia egbe iran zẹ vbene iran ru ẹe, sẹrriọ ne esagiẹn ghi na gha tue ladian.

²⁹ Iran na gha vannọ, iran na gha go ọ te ya sẹ ẹghẹ ogiavan, sokpan ewanniẹn ma rre, a ma họn urhu rhọkpa.

³⁰ Ẹre Elaija na tama emwa nii wẹẹ, “Wa sikẹ mwẹ.” Iran hia keghi gele sikẹ ọre, iran na mudia lẹga ẹre. Ọ keghi suẹn gha dọlọ aka ọghe Nọyaẹnmwa ne iran te guọghọ kua.

³¹ Ọ keghi munọ okuta iweva, ọkpọkpa ọghe ivbi e Jekọb, ọmwa ne Nọyaẹnmwa he ẹre Izrẹl.

³² Ọ keghi ya avbe okuta nii dọlegbe bọ Ogiukpo ne a na ga e Nọyaẹnmwa. Ọ keghi tọn uvun lẹga ẹre, uvun nii dinmwi sẹ ne ọ gha mu sẹ omwa egalọn enẹ ọghe amẹ.

³³ Rẹn keghi viọ avbe erhan ni ye aka ni, ọ keghi giagia ẹmila nii, ọ na viọ ẹre yan erhan nii, ọ na kha wẹẹ, “Wa ya esago enẹ sa amẹ ne uwa tue ẹre yan emwi izọ ese kevbe erhan nii.” Iran keghi ru ẹe vberriọ.

³⁴ Ọ keghi tama iran wẹẹ, “Wa dọlegbe ru ẹe.” Iran keghi ruẹ vberriọ, ọ keghi yevbe kha wẹẹ, “Wa dọlegbe ru ẹe.” Iran ke ru ẹe.

³⁵ Amẹ nii keghi lẹ ku otọ kevbe uhunmwu aka nii rre ọ na vuọn uvun ne a tọn ẹn ni.

³⁶ Ọ ghi sẹ ẹghẹ ne a ya zọ ese ogiavan, Elaija ne akhasẹ keghi sikẹ aka, ọ keghi na erhunmwu wẹẹ, “E Nọyaẹnmwa, Osanobua Ebraham, Aizik, kevbe Jekọb, rhie maa nian ighẹ wẹ ọrọre Osanobua Izrẹl kevbe wẹ ọguọmwadia ruẹ mẹ khin, kevbe wẹ emwi ne I ru na hia, wẹ ọre ọ gie mwẹ.

³⁷ Zẹmwẹ wanniẹn mwẹ Nọyaẹnmwa, zẹmwẹ wanniẹn mwẹ, ne avbe emwa na miẹn ehe na rẹn wẹ, wẹ ne Nọyaẹnmwa ọrọre Osanobua kevbe wẹ te u viọ iran dọlegbe bu egbe ruẹ dee.”

³⁸ E Nọyaẹnmwa keghi gie erhẹn rre, ọ keghi giẹn ese nii hia, erhan kevbe okuta, ọ keghi ya otọ kaka, ọ na ka amẹ ne ọ rre uvun ni hia.

³⁹ Emwa nii ghi miẹn emwi na, iran hia keghi dele gbe otọ, iran na datu wẹẹ, “E Nọyaẹnmwa ọrọre Osanobua, e Nọyaẹnmwa ọkpa ọrọre Osanobua!”

⁴⁰ Elaija keghi kha wẹẹ, “Wa munọ avbe akhasẹ e Bal, wa ghẹ gie ọkpa lẹfua vbọ!” Iran keghi mu nọ iran hia, Elaija keghi viọ iran gha rrie ovbi Ẹzẹ Kisiọn, ọ na gbele iran an.

Ufomwẹ Amẹ Ne Ẹ I Rhọ

⁴¹ Ẹre Elaija na tama Ehab ne ọba wẹẹ, “Banbanna nian, gha khian ne u ya rri evbare. I họn vbe amẹ khọn dee.”

⁴² Ehab ghi khian ya rri evbare, Elaija keghi hin uhunmwu Oke Kamẹl, ọ na vbokho egbe rriotọ vbene uhunmwu ẹnrẹn na gha rre akharha ẹre vbe igbọn.

⁴³ Ọ keghi tama ọguọmwadia ẹre wẹẹ, “Ya ghe odẹ okun ghe.” Ọguọmwadia werriegbe rre, ọ keghi kha wẹẹ, “I ma bẹghe emwi rhọkpa.” Igba ihinrọn ọre Elaija gie ẹe ne ọ ya ghe ẹre.

⁴⁴ Vbe ne ukpo gihinrọn, ọ keghi werriegbe rre do kha wẹẹ, “I bẹghe okuku amẹ ọ ma vbẹ sẹ atataobọ ọmwa, ọ ke uwu okun ladian dee.” Elaija keghi tama ọguọmwadia ẹre wẹẹ, “Ya tama Ehab ne ọba wẹ ne ọ la ikẹkẹ okuo ẹre ne ọ gha rrie owa ne amẹ ghẹ da ẹe yi.”

⁴⁵ Banbanna rriọ, amẹ keghi wa bi gba aro iso hia, ẹhoho keghi suẹn gha hoho, okpamẹ keghi suẹn gha da. Ehab keghi hin ikẹkẹ okuo ẹre, ọ na gha die Jezrẹl.

⁴⁶ Orhiọn e Nọyaẹnmwa keghi hin ya Elaija, ọ na gba ukpọn rẹn khinkhian ẹkun gbain, ọ na rhulẹ ke aro ne Ehab rhinrin ya sẹ Jezrẹl.