I Ọba 17 - Edo Bible (E Baibol Ẹdo) Version 1996

Elaija Kevbe Umumwẹ Amẹ

¹ Akhasẹ ọkpa ne a tie ẹre Elaija ne ovbi e Tisbi ne Giliad ke tama Ehab wẹẹ, “Vbe eni e Nọyaẹnmwa ne Osanobua Izrẹl ne imẹ ga, I tama ruẹn nian wẹ amẹ i ghi ra rhọ, evbu i ra ghi vbe tuo ọ te ya sẹ ukpo eha vbe ẹ i re te I fi ẹmwẹ na werriẹ ta.”

² Ẹre Nọyaẹnmwa na tama Elaija wẹẹ,

³ “Kpao vbe emwa na rre, laghe odẹ ahọ ne u lẹre ye ọkpẹn ovbi ẹzẹ Kiẹrit vbe odẹ ahọ ne Jọdan.

⁴ Ovbi ẹzẹ nii, ọ re u gha na gha sa amẹ wọn. I vbe tama avbe ahianmwẹ nẹ ne iran gha viọ evbare guẹ vbe evba.”

⁵ Elaija keghi ru vbene e Nọyaẹnmwa khare, ọ na ya tota ye ovbi ẹzẹ e Kiẹrit.

⁶ Ọ kegha sa amẹ ẹzẹ ni wọn, avbe ahianmwẹ kegha la ebrẹd kevbe emiowo gie ẹe ota vbe owiẹ.

⁷ Ọ ghi kpee kherhe, ovbi ẹzẹ nii keghi ka rhunmwuda ne amẹ ma na rhọ nii.

Elaija Kevbe Okhuo Ne Ọ Dẹgbẹ Vbe Zẹrafat

⁸ Ẹre Nọyaẹnmwa na tama Elaija wẹẹ,

⁹ “Banbanna nian, do gha rrie ẹvbo ne a tie ẹre Zẹrafat vbe ọkpẹn Saidọn, di odọ ya. I tama okhuo ẹgbẹe ọkpa ne ọ rre evba nẹ wẹ ne ọ gha kokuẹ.”

¹⁰ Ẹre Elaija na gha rrie Zẹrafat, ọ ghi wa sẹ onurho ne a la la ẹvbo nii, ọ keghi miẹn ẹgbẹe ne ọ ho erhan vbe evba ọ keghi tama rẹn wẹẹ, “Lahọ sa amẹ gun mwẹ wọn.”

¹¹ Rẹn ghi khian ya sae rre, ọ keghi niẹn urhu tama rẹn wẹẹ, “Lahọ u ghi rhie ebrẹd eso ba ẹre rre.”

¹² Okhuo ni keghi wanniẹn wẹẹ, “I ya eni Nọyaẹnmwa nọ rrọọ ne Osanobua ruẹ vẹn ihẹn wẹ, I i mwẹ ebrẹd hiehie. Emwi ne I ghi mwẹ ma gberra ovbi irhuarhua kherhe vbe uzokpo kevbe ofigbọn oliv kherhe vbe ovbi ẹluba. Te I rre do ho erhan na ne I ya le evbare kherhe ne ọ ghi guemwẹ ne imẹ vbe ovbi mwẹ. Evbare okiekie ima ọ re onii khin. Iyeke onii, ohanmwẹ ghi gbele ima an.”

¹³ Elaija tama rẹn wẹẹ, “Ghẹ fian afianma, ya le evbare ruẹ, sokpan ka le evbare kherhe vbe ne u mwẹ mu gun mwẹ nẹ, u ghi le ni dekẹe ne uwẹ vbe ovbi uẹ.

¹⁴ Rhunmwuda vbenian ọ re Nọyaẹnmwa ne Osanobua Izrẹl ta wẹẹ: ‘Irhuarhua nii i ra fo vbe uzokpo nii, ra ne ofigbọn ka vbe ovbi ẹluba nii, ọ te do sẹ ẹdẹ ne imẹ ne Nọyaẹnmwa gha gie amẹ rhọ.’ ”

¹⁵ Okhuo nii kegha khian ya ru zẹ vbene Elaija tama rẹn. Evbare keghi gha gue iran vbe ikpẹdẹ ni bun.

¹⁶ Zẹ vbene Nọyaẹnmwa gele la unu Elaija ta ẹe, irhuarhua nii ma fo vbe uzokpo nii, ofigbọn ma ka vbe ovbi ẹluba nii.

¹⁷ Ọ ghi kpee kherhe, ovbi ẹgbẹe nii ne okpia keghi gha khuọnmwi, ọ keghi gha tua yọ tua yọ, ẹre ọ ghi na wa gbẹmwẹ vbe okiekie.

¹⁸ Okhuo nii keghi tama Elaija wẹẹ, “Ọmwa Osanobua, vbu a ghi na ru mwẹ emwi vbenian hẹ yi? Te u rre do ye Osanobua orukhọ mwẹ rre ra, ne u gbe mwẹ ọmọ uan?”

¹⁹ Elaija keghi kha wẹẹ, “Mu nene ọmọ gun mwẹ.” Ọ keghi miẹn ẹre ọmọ nii vbe obọ, ọ keghi mu ẹẹn hin egedege gha rrie ehe ne irẹn ye, ọ keghi mu ẹẹn lovbiẹ ye ukpo.

²⁰ Ọ keghi ya urhu ne ọ la na erhunmwu wẹẹ, “E Nọyaẹnmwa Osanobua mwẹ, vbe u a ghi na ru okhuo ẹgbẹe na emwi ne ọ mu ohan vbe nian hẹ yi. Ọ fu ẹko sẹrriọ ne ọ na gha koko mwẹ, eban nian, u gbe ẹre ọmọ okpia.”

²¹ Ẹre Elaija na niẹn egbe yan ọmọ nii igba eha, ọ na na erhunmwu wẹẹ, “E Nọyaẹnmwa Osanobua mwẹ, huẹn ọmọ na kpaegbe ne ọ gha rre agbọn.”

²² E Nọyaẹnmwa keghi họn erhunmwu Elaija, ọmọ nii keghi suẹn gha hiọnrọn, ọ na rinran rre.

²³ Elaija keghi mu ọmọ nii tuorre vbe egedege, bu iye ẹe gha khian, ọ tama rẹn wẹẹ, “Ghe ghẹ ovbi uẹ ye rre agbọn.”

²⁴ Okhuo nii keghi wanniẹn wẹẹ, “Eban nian, I rẹnrẹn ighẹ ọmwa Osanobua ọ re u gele khin, kevbe wẹ Osanobua gele giọ uhunmwu vbe ne ẹmwata!”