I Ọba 16 - Edo Bible (E Baibol Ẹdo) Version 1996

¹ E Nọyaẹnmwa keghi gie Jehu ne ovbi e Hanani, ọ na wẹ ne ọ ya tama Baasia wẹẹ,

² “A ma te rẹn ruẹn, sokpan, I na ya a ru ọkaolotu ọghe ivbi Izrẹl ne emwa mwẹ, u keghi ru vbene Jeroboam ru, u ru orukhọ nẹ, u na vbe silo emwa mwẹ obọ la orukhọ. Orukhọ iran ya ohu mu mwẹ nẹ nian,

³ rhunmwuda ọnii, I gha rhie ruẹ fua, deba ẹgbẹe ruẹ, zẹ vbene I vbe ru e Jeroboam.

⁴ Ovbi ẹgbẹe ruẹ ne ọ wu vbe ore ẹvbo, avbe ekita ghi rri ọe. Iran ni wulo ye oha, ugu ghi rri iran.”

⁵ Emwi ọvbehe hia fẹẹrẹ ne Baasia ghi ru, kevbe iwinna udinmwẹ ne ọ winnaẹn, a gbẹnnẹ ọẹn ye Ebe Okha Avbe Ọba Izrẹl.

⁶ Baasia keghi wu, a na re ẹre ye Tiza, ovbi ẹre ighẹ Ela keghi rriọba lele ẹe.

⁷ E Jehu do ta ẹmwẹ ne Nọyaẹnmwa tae vbe ekpa ọghe Baasia rhunmwuda orukhọ ne Baasia ru ghe Nọyaẹnmwa. Ẹ i re orukhọ ne ọ ru ọkpa ọ re ọ ye ohu mu e Nọyaẹnmwa zẹ vbene Jeroboam ka vbe ru ẹe ke odaro ne irẹn, sokpan rhunmwuda, wẹ ọ gbe Jeroboam kevbe ẹgbẹe ọre hia.

Ela Ne Ọba Izrẹl

⁸ Ọ ghi rre ukpo ehan yan ugie ne Asa ne ọba e Juda rriọba. Ela ne ovbi e Baasia keghi rriọba vbe Izrẹl, ọ na khaemwisẹ la ukpo eva vbe Tiza.

⁹ E Zimri ne ọ re ọkpa vbe uwu emwa rẹn ni gbe aro ghe obọkpa vbe a wa ikẹkẹ okuo ọba ye ihe eva keghi khuan khẹ ọre. Ẹdẹ ọkpa, ọba keghi da ayọn ne ọ gha gbe ẹe vbe Tiza vbe owa Aza ne ọ gbearoghe ẹguae.

¹⁰ E Zimri keghi la uwu owa, ọ na gbe Ela rua, ọ na rriọba lele ẹe. Ọ ghi rre ukpo ihinrọn yan ugie ọre Asa ne ọba e Juda ghi rriọba, ọ re emwi na na sunu.

¹¹ E Zimri ghi wa rriọba ọwarọkpa, ọ keghi gbele ivbi ẹgbẹe Baasia hia. Etiọnrẹn ne ikpia kevbe avbe esiọre, ọ keghi gbele ehia a.

¹² Ẹre a na miẹn wẹ Zimri gbele ẹgbẹe Baasia hia fo zẹ vbene Nọyaẹnmwa la unu e Jehu ne akhasẹ ta ẹe.

¹³ E Baasia kevbe Ela ne ovbi ẹre keghi ya ohu mu e Nọyaẹnmwa ne Osanobua Izrẹl rhunmwuda ẹbọ ne iran ru kevbe ne iran na vbe silo ivbi Izrẹl obọ la orukhọ.

¹⁴ Emwi ọvbehe hia ne Ela ghi ru, a gbẹnnẹ ọẹn ye Ebe Okha Avbe Ọba Izrẹl.

Zimri Ne Ọba Izrẹl

¹⁵ Ọ ghi rre ukpo ihinrọn yan ugie ne Asa ne ọba e Juda rriọba, e Zimri keghi rriọba ivbi Izrẹl vbe Tiza la ikpẹdẹ ihinrọn. Ivbi Izrẹl kegha khọn okuo vbe Gibẹtọn ne ọ rre Filistia,

¹⁶ Iran ghi họn wẹ e Zimri khuan khẹ ọba ọ na gbe ẹe rua, ọwarọkpa nii vbe evba dandaandan iran keghi ma Ọmri ne ọkaokuo iran ọba Izrẹl.

¹⁷ Ọmri kevbe ivbi iyokuo ẹre keghi kpao vbe Gibẹtọn rre, iran na mu okuo gha rrie Tiza.

¹⁸ E Zimri ghi miẹn wẹ iran khọn ẹvbo nii miotọ nẹ, ọ keghi wa gha rrie ẹgun ne ọ ke uwu ẹguae sẹ ehia, ọ na rhu erhẹn ye ẹguae, rẹn tobọ ẹre keghi wu ye uwu aranmwẹ erhẹn nii.

¹⁹ Ọna sunu rhunmwuda orukhọ ne ọ ru ghe Nọyaẹnmwa. Ọ keghi vbe ru vbene Jeroboam ne ọ ke odaro ne irẹn vbe ru, ọ ya ohu mu e Nọyaẹnmwa vbe ekpa orukhọ ne ọ ru, ọ wa vbe silo ivbi Izrẹl obọ la orukhọ.

²⁰ Emwi ọvbehe hia ne Zimri ghi ru ya sẹ egbe ne ọ na si uma isọtẹ, a gbẹnnẹ ọẹn ye Ebe Okha Avbe Ọba Izrẹl.

Ọmri Ne Ọba Izrẹl

²¹ Ivbi Izrẹl keghi ghae egbe ye ihe eva, eso vbọ kegha ho ne iran ma Tibni ne ovbi e Ginat ọba, eso kevbe gha rre asa ọghe Ọmri.

²² Vbe okiekie, obọ iran ni rre asa ọghe Ọmri keghi ke okhunmwu, e Tibni keghi wu, Ọmri na rriọba.

²³ Ọ ghi rre ukpo ọkpayanọgban ne Asa ne ọba e Juda rriọba, Ọmri keghi rrioba Izrẹl. Ọ keghi ya ukpo iweva vbe ẹkete. Ukpo ehan ne okaro, ọ na gha ke Tiza khaemwisẹ.

²⁴ Vbe iyeke ọnii, ọ keghi dẹ oke Sameria ne ọ ha igho esiliva arria-isẹn ehan yi ne okpia ọkpa ne a tie ẹre Siẹma. Ọmri keghi gbe ekẹn ga ẹvbo nii, ọ na gha tie ẹre Sameria ne ọ ya ta e Siẹma ne ọ te ka yan uhunmwu oke ni.

²⁵ Ọmri keghi ru orukhọ ghe Nọyaẹnmwa sẹ iran ni karo ne ẹẹn hia.

²⁶ Ọ keghi ya Nọyaẹnmwa ne Osanobua Izrẹl mu ohu zẹ vbene Jeroboam ne ọ karo nẹ irẹn vbe ru, vbe ekpa orukhọ ne irẹn ru, ne Ọ na silo ivbi Izrẹl obọ ku orukhọ ẹbọ ne a gho.

²⁷ Emwi ọvbehe hia ne Ọmri ghi ru, iwinna udinmwẹ ọnrẹn hia, a gbẹnnẹ ehia ye Ebe Okha Avbe Ọba Izrẹl.

²⁸ Ọmri keghi wu, a na re ẹre ye Sameria, Ehab ne ovbi ẹre keghi rriọba lele ẹe.

Ehab Ne Ọba Izrẹl

²⁹ Ọ ghi rre ukpo evairrọvbe iyeva ne Asa ne ọba Juda rriọba, Ehab ne ovbi Ọmri keghi rriọba ivbi Izrẹl vbe Sameria la ukpo eva yan ugie.

³⁰ Ọ keghi ru orukhọ ghe Nọyaẹnmwa sẹ iran ni karo ne ẹẹn hia fẹẹrẹ.

³¹ Egbe orukhọ ne Jeroboam ru ma ghi sẹ ne irẹn, ọ keghi vbe ru yan vbe ne ọ na ya rhie Jezibẹl ovbi Ethal ne ọba Saidọn, ọ na vbe gha gho e Bal.

³² Ọ keghi gbe ọgua ne Bal vbe Sameria, ọna bọ Ogiukpo ne ẹẹn, ọ na mu ẹẹn ye uwu Ọgua Osa.

³³ Ọ na mu Amazẹ Asiẹrra ne ẹbọ ne okhuo yọ. Rẹn ọ re ọ ghi wa ru emwi ya ye ohu mu e Nọyaẹnmwa ne Osanobua Izrẹl sẹ avbe ọba Izrẹl hia ni ke aro ne ẹẹn.

³⁴ Ẹghẹ ọre, e Hiẹl ne ovbi e Bẹtẹl keghi dọlegbe bọ e Jẹriko. Zẹ vbene Nọyaẹnmwa la unu e Jọsua ne ovbi e Nọn ta ẹe ye otọ, Abiram ne ovbi e Hiẹl ne ọdiọn keghi wu vbe ọ gbe ẹyotọ Jẹriko, ovbi ẹre ne ọ ke otọ ighẹ Segub kevbe wu vbe ọ ghi bọ onurho ẹre.