I Ọba 14 - Edo Bible (E Baibol Ẹdo) Version 1996

Uwu Ovbi Ọba Jeroboam

¹ Vbe ẹghẹ nii, Abija ne ovbi ọba Jeroboam keghi gha khuọnmwi.

² E Jeroboam keghi tama ọvbokhan rẹn wẹẹ, “Fi egbe werriẹ mu egbe vbene ọmwa rhọkpa i ra na rẹn ruẹn ne u gha rrie ọghe Ahija ne akhasẹ vbe Silo, rẹn ọ re ọmwa ne ọ ta ẹe ighẹ I gha rriọba vbe Izrẹl.

³ Viọ ududu ebrẹd igbe gie ẹe, eka eso kevbe ovbi ọgọ ọghe owọn, nọ rẹn vbene ọ khian gha ye ovbi ma hẹ, ọ gha tama ruẹn.”

⁴ Ẹre irẹn na gele gha rrie owa Ahija vbe Silo. Ahija ẹ i ghi bẹghe rhunmwuda vbene ọ khian ọmaẹn sẹ.

⁵ E Nọyaẹnmwa tama rẹn nẹ wẹ amwẹ e Jeroboam dee do nọ rẹn vbene ọ gha ye ovbi ẹre ne egbe ma rran hẹ. E Nọyaẹnmwa keghi tama Ahija ẹmwẹ ne ọ gha ta. Amwẹ Jeroboam ghi rre, ọ keghi ba gha ru vbe ọmwa ọvbehe.

⁶ Sokpan, Ahija ghi họn vbe ọ he dee vbe onurho, ọ keghi kha wẹẹ, “La owa, I rẹnrẹn ighẹ amwẹ Jeroboam ọ re u khin. Vbu a ghi na ba ru hẹ vbe ọmwa ọvbehe yi. Iyẹn ne I ra na ma ruẹn i rhiẹnrhiẹn.

⁷ Ya tama e Jeroboam wẹ vbenian ọ re Nọyaẹnmwa ne Osanobua Izrẹl tama rẹn: ‘Te I hannọ zẹ vbe uwu ẹbu emwa nii, I na ya a ru ne ọkhaemwisẹ yan ivbi Izrẹl ne emwa mwẹ.

⁸ I miẹn ivbi e Devid arriọba mu ne uẹn. Sokpan u ma zẹdẹ khọ e Devid ne ọguọmwadia ne ọ wa ru vbene I ho vbe ẹghẹ hia, ọ kevbe gha ya uhi mwẹ ru emwi, emwi ne I we ne ọ ru ọkpa, ọre ọ ru.

⁹ Orukhọ ne u he ru sẹ ọghe iran hia ni ka gha rriọba khẹ ruẹ ẹsẹse. U fi iyeke gbe mwẹ nẹ, u keghi gua izohu mwẹ kpao vbekpa ne u na gha mannọ amazẹ, u na dunmwu ẹbọ ematọn ne u miẹn gha gho.

¹⁰ Rhunmwuda ọna, I gha gie ọkhọ rruan ruẹn I ghi gbele emọ ikpia ni rre uniẹn ruẹn hia kevbe ibiẹka kevbe eniwanrẹn. I gha ru ẹe ne ẹgbẹe ruẹ gbe ẹro, a ghi kpolo iran kua zẹ vbe isan ẹmila.

¹¹ Emwa ẹgbẹe ruẹ ni wulo ye ore ẹvbo, avbe ekita ghi rri iran, iran ni wulo ye oha, avbe ugu ghi rri iran. Mẹ ne Nọyaẹnmwa ọre ọ tae.’ ”

¹² Ahija keghi rhie te ẹe ma amwẹ e Jeroboam wẹẹ, “Banbanna nian, gha rrie owa. U gha wa da fi owẹ la ore ẹvbo nii, ovbi uẹ gha wu.

¹³ Ivbi Izrẹl hia ghi khiẹ ọre, iran ghi vbe re ẹre. Rẹn ọkpa kẹkan ọ re a gha dọlọ ẹre uwu yi ẹse vbe uniẹn e Jeroboam rhunmwuda rẹn ọkpa kẹkan ọ re e Nọyaẹnmwa ne Osanobua Izrẹl mwẹ ẹko ne ọ rhiẹnrhiẹn ghe.

¹⁴ E Nọyaẹnmwa gha ma ọba ọkpa vbe Izrẹl, rẹn ọre ọ khian gbele ẹgbẹe e Jeroboam ogbefo.

¹⁵ E Nọyaẹnmwa gha rria Izrẹl ikhi. Ọ ghi gha mian gbẹghẹgbẹghẹ zẹ vbe ovbi erhan ne ọ zọ ye uwu ẹzẹ. Ọ gha silo ivbi Izrẹl vbọlọ hin otọe esiesi na ne ọ mu ne avbe erha iran odede. Ọ ghi zagha iran kua gberra Ẹzẹ Yufretes, rhunmwuda, iran gua izohu ẹre kpao vbekpa ne iran na ma amazẹ Asiẹrra ne ẹbọ ne okhuo.

¹⁶ E Nọyaẹnmwa ghi fi iyeke gbe Izrẹl, rhunmwuda, e Jeroboam ru orukhọ nẹ, ọ kevbe silo ivbi Izrẹl fi uwu orukhọ.”

¹⁷ Amwẹ e Jeroboam keghi kpao gha rrie Tiza. Ọ ghi rhie owẹ la owa, ọmọ nii keghi wu.

¹⁸ Ivbi Izrẹl keghi khiẹ ọre iran na re ẹre zẹ vbene e Nọyaẹnmwa la unu ọguọmwadia ẹre ighẹ Ahija ne akhasẹ ta ẹe.

Uwu E Jeroboam

¹⁹ Avbe emwi hia fẹẹrẹ ne Jeroboam ne ọba gha ru, avbe okuo ne ọ khọnrẹn kevbe vbene ọ ya gha khaemwisẹ hẹ, a gbẹnnẹ ehia ye Ebe Okha Ọghe Avbe Ọba Izrẹl.

²⁰ Ukpo eva yan ugie ọ re Jeroboam rri ọba la. Ọ ghi wu, a na re ẹre. E Nadab ne ovbi ẹre keghi rriọba lele ẹe.

E Rehoboam Ne Ọba E Juda

²¹ Ukpo ọkpa yan iyeva ọre Rehoboam ne ovbi e Solomọn gha ye vbe ọ rriọba yan e Juda, ọ keghi ya ukpo eha irrọvbugie vbe ẹkete vbe Jerusalẹm, ehe ne e Nọyaẹnmwa zẹẹ vbe otọ Izrẹl hia wẹ evba nii ọ re a gha na gha gọn ugie irẹn. Iye Rehoboam kegha re Naama ne ovbi ẹvbo ne a tie ẹre Amọn.

²² Ivbi e Juda keghi rukhọ ghe Nọyaẹnmwa, iran keghi ru emwi ne ọ gha gu izohu ẹre kpao ẹsẹse sẹ avbe erha iran odede.

²³ Iran keghi họlọ ehe ne iran na gho avbe ẹbọ ohoghe, iran keghi mannọ orre okuta kevbe ọkpọ erhan ni mwẹ irhu emwi ne iran gha ghoo, vbe uhunmwu oke kevbe ototọ erhan ni mwẹ irhu.

²⁴ Ne ọ ghi wa rhia sẹ ehia, ikpia kevbe ikhuo kegha rrọọ ni gha do ẹki ebabotu vbe aro ẹbọ iran ni ru ẹbọ. Ivbi Izrẹl kegha ru emwi emwiekhue hia ne emwa ne e Nọyaẹnmwa khulo kua vbe ivbi Izrẹl dee ra do la ẹvbo nii, ru.

²⁵ Vbe ukpo ne ogisẹn ne Rehoboam he ya vbe ọba e Sisiak ne ọba Igipt keghi mu okuo gha die Jerusalẹm.

²⁶ Ọ keghi viọ emwi ighobioye ni rre Ọgua Osa kevbe ẹguae hia gha rrie deba asa igoru ne Solomọn ru.

²⁷ E Rehoboam ghi ra ru ye ihe iran, ọ keghi ru asa ọghe oze, ọ na viọ ne iran ighẹ avbe iran ni khẹ onurho ẹguae.

²⁸ Ẹghẹikẹghẹ ne ọ rhirhi a ya gha rrie Ọgua Osa, avbe iran ni khẹ odẹ ghi viọ avbe asa nii mwẹ, iran ghi vbe viọ iran werriegbe gha die owa ne a khẹ.

²⁹ Emwi ọvbehe hia ne Rehoboam ghi ru, a gbẹnnẹ ọẹn ye okha avbe ọba e Juda.

³⁰ Vbe uwu avbe ẹghẹ na hia, okuo ọ re Rehoboam kevbe Jeroboam gba gha gue egbe khọn.

³¹ E Rehoboam keghi wu, a na re ẹre ye Jerusalẹm ovbi ẹre ighẹ Abija keghi rriọba lele ẹe.