I Ọba 13 - Edo Bible (E Baibol Ẹdo) Version 1996

¹ Zẹ vbene e Nọyaẹnmwa gie ẹe, akhasẹ ọkpa keghi ke Juda gha rrie Bẹtẹl, ọ keghi wa sẹ evba vbe Jeroboam mudia ye ọkpẹn aka na ọ zọ ese.

² Zẹ vbene e Nọyaẹnmwa gie, akhasẹ nii keghi ya yan aka nii, ọ wẹẹ: “Aka o, aka, vbenian ọre Nọyaẹnmwa khare: A gha biẹ ọmọ okpia ọkpa nẹ Devid, a ghi gha tie eni ọmọ ni e Josaia. Ọ gha gbele avbe ohẹn ni do gha ga vbe aro ẹbọ enimayayi na, iran ni zọ ese vbe uhunmwu ruẹn, ọ ghi giẹn ugboloko emwa ne agbọn yan ruẹn.”

³ Aka na gha guọghọ ua a gha zagha emuẹn ni rrọọ kua. Ẹghẹ nii wa gha na rẹn wẹ e Nọyaẹnmwa ọ re ọ gele gie mwẹ uhunmwu.

⁴ Ugbẹn vbe Jeroboam ne ọba ghi họn ẹmwẹ na, ọ keghi niẹn obọ da ẹre, ọ wẹẹ, “Wa mu ẹẹn ighẹ okpia nii!” Vbe ọwarọkpa nii, obọ ọba keghi zeze sẹrriọ wẹ ọ ma ghi sẹtin si ẹe werriegbe.

⁵ Aka keghi wa wannọ ye ihe eva, emuẹn ne ọ rrọ na kharha ku otọ zẹ vbene akhasẹ nii ta ẹe vbe eni e Nọyaẹnmwa.

⁶ E Jeroboam ne ọba keghi tama akhasẹ nii wẹẹ, “Lahọ na erhunmwu ghe e Nọyaẹnmwa Osanobua ruẹ mẹ ne u tama rẹn ne ọ dọlọ obọ mwẹ yi.” Akhasẹ keghi na erhunmwu ghe e Nọyaẹnmwa, a keghi dolọ obọ ọba yi.

⁷ Ọba keghi khama akhasẹ nii wẹẹ, “Lele mwẹ gha rrie owa ne u do rri evbare kherhe, I gha san ruẹn ẹse ye emwi ne u ru na.”

⁸ Akhasẹ ni keghi wanniẹn wẹẹ, “A gha rhe wẹ te u wa ẹfe ruẹ hia ye ihe eva, u na mu obọ ọkpa mẹ vbọ, I i lele uẹ rae ra ne I guẹ re ra ne I guẹ da.

⁹ E Nọyaẹnmwa tama mwẹ nẹ wẹ ne I ghẹ re, I ghẹ da ra ne I la odẹ ne I la rre gha rrie.”

¹⁰ Rhunmwuda ọnii, ọ ma la odẹ ne ọ la rre, sokpan, ọ keghi la odẹ ọvbehe.

Akhasẹ Ne Ediọnmwa Ne Ọ Rre Bẹtẹl

¹¹ Akhasẹ ne ediọnmwa ọkpa keghi rre Bẹtẹl vbe ẹghẹ nii. Ivbi ẹre keghi do tama rẹn emwi ne akhasẹ ne ọ ke Juda rre ru vbe Bẹtẹl ẹdẹrriọ, kevbe ẹmwẹ ne ọ tama Jeroboam.

¹² Akhasẹ ediọnmwa nii keghi nọ iran wẹẹ, “De ehe ne ọ lae vbe ọ kpao?” Iran keghi ma ẹre nene odẹ,

¹³ ọ na wẹ ne iran rro ekẹtẹkẹtẹ irẹn ne irẹn. Iran na ru ẹe vberriọ, ọ na hin ẹnrẹn kpao

¹⁴ lele akhasẹ nii ne ọ ke Juda rre, ọ keghi do vba ẹre vbe o tota ye ototọ okan, ọ nọ rẹn wẹẹ, “Wẹ ọrọre akhasẹ ne ọ ke Juda rre ra?” Ọ keghi wanniẹn wẹẹ, “Mẹ nọ.”

¹⁵ Rẹn tama rẹn wẹẹ, “Lele mwẹ gha di owa ne u do rri evbare kherhe.”

¹⁶ Sokpan, akhasẹ ne ọ ke Juda rre ni keghi tama rẹn wẹẹ, “I i sẹtin lele uẹ gha rrie owa ra ne I miẹn ọghọ ne u mu yọ mwẹ egbe,

¹⁷ rhunmwuda, e Nọyaẹnmwa tama mwẹ nẹ wẹ ne I ghẹ re, ne I ghẹ da ra ne I la odẹ ne I la rre gha rrie.”

¹⁸ Ẹre Akhasẹ ne ediọnmwa ne ọ rre Bẹtẹl nii na tama rẹn wẹẹ, “Akhasẹ vbe ruẹ ọ re imẹ vbe khin, e Nọyaẹnmwa ọ re ọ vbe gie odibo ẹre gun mwẹ wẹ ne I rhie ruẹ gha rrie owa, ne I ya mu ọghọ ye uẹ egbe.” Sokpan ohoghe ọ re akhasẹ ne ediọnmwa nii gha ta.

¹⁹ Ẹre akhasẹ ne ọ ke Juda rre nii na lele akhasẹ ne ediọnmwa nii gha rrie, ọ na ya gu ẹe rrie evbare.

²⁰ Ugbẹn vbe iran ghi rre e tebul nii, ẹmwẹ e Nọyaẹnmwa keghi bu akhasẹ ne ediọnmwa ni rre,

²¹ ọ na davan tama akhasẹ ne ọ ke Juda rre wẹẹ, “E Nọyaẹnmwa khare wẹ rhunmwuda ne u ma na họn ẹmwẹ ne irẹn tae, u ma ru emwi ne ọ wẹ ne u ru,

²² sokpan u na werriegbe ya rrie evbare vbe ehe ne ọ tama ruẹn wẹ ne u ghẹ na rri evbare, iran gha gbe uẹ ua, a i ra vbe re ruẹ ye idin ẹgbẹe ruẹ.”

²³ Iran ghi rri evbare fo nẹ akhasẹ ne ediọnmwa ni keghi gbalọ ekẹtẹkẹtẹ ne akhasẹ ne ọ ke Juda rre nii,

²⁴ rẹn na hin ẹnrẹn kpao. Ọ ghi sẹ odẹ, oduma keghi miẹn ọẹn, ọ na gbe ẹe rua. Ikun rẹn kegha rre adesẹ odẹ ekẹtẹkẹtẹ kevbe oduma ni keghi mudia kẹẹ.

²⁵ Emwa eso ghi gberra, iran keghi miẹn ikun ẹnrẹn vbe oduma mudia ke ẹe. Iran kegha rrie Bẹtẹl, iran na ya ta emwi ne aro iran miẹn.

²⁶ Ugbẹn vbe akhasẹ ne ediọnmwa ni ghi họn ẹn, ọ wẹẹ, “Akhasẹ ne ọ ma họn ẹmwẹ e Nọyaẹnmwa onii khin, ẹre Nọyaẹnmwa na gie oduma ne ọ ya dekun ẹnrẹn ne ọ gbe ẹe rua zẹ vbene e Nọyaẹnmwa khare ighẹ rẹn gha ru ẹe zẹẹ.”

²⁷ Rẹn keghi tama ivbi irẹn wẹẹ, “Wa rro ekẹtẹkẹtẹ mwẹ mẹ.” Iran keghi ru ẹe vberriọ,

²⁸ rẹn keghi hin ẹnrẹn, ọ keghi do vba ikun akhasẹ vbe otọ vbe odẹ, oduma ni kevbe ekẹtẹkẹtẹ ni na mudia ke ẹe. Oduma ni ma rri ikun ẹnrẹn ra ne ọ gu ekẹtẹkẹtẹ ni gbinna.

²⁹ Akhasẹ ne ediọnmwa nii keghi tọn ikun ẹnrẹn mu, ọ na mu ẹẹn werriegbe gha di e Bẹtẹl ne ọ do khiẹ ọre kevbe ne ọ vbe re ẹre.

³⁰ Ọ re ẹre ye idin ẹgbẹe irẹn, rẹn vbe ivbi ẹre keghi viọe wẹẹ, “Eyowo ọtẹn mwẹ ne ọtẹn mwẹ.”

³¹ Iran ghi re ẹre nẹ, akhasẹ nii keghi tama ivbi ẹre wẹẹ, “I gha wu, wa re mwẹ ye idin na, wa ghi mu ikun mwẹ diake ọghe ọe.

³² Ẹmwẹ ne e Nọyaẹnmwa gie ẹe do guan kan aka ne ọ rre Bẹtẹl kevbe avbe ehe ne a na ga hia vbe ẹvbo e Sameria, ẹ i mwẹ ọ ma sẹ.”

Orukhọ Ne Ọ Si Uwu Ne Jeroboam Ru

³³ E Jeroboam ne ọba Izrẹl ma zobọ vbe emwi dan ne ọ ru, sokpan ọ keghi ye gha ma avbe ohẹn vbe ẹgbẹe kẹkan ne iran gha ga vbe aka ne irẹn bọ ẹe. Ọ keghi ma ọmwaikọmwa ne ọ rhirhi a gha ho, ohẹn.

³⁴ Orukhọ ne ọ ru na ọre ọ silo ẹe ne ẹgbẹe ọre na fuan, ọ na wa gbe ẹro.