I Ọba 12 - Edo Bible (E Baibol Ẹdo) Version 1996

Arriọba Fian Eva

¹ E Rehoboam kegha rrie Siẹkẹm, ehe ne odẹ okuọ ivbi Izrẹl si koko yi ne iran do ma ẹre ọba.

² E Jeroboam ne ovbi e Nebat keghi do họn ẹmwẹ na vbe Igipt eke ne ọ lẹ gha rrie vbe ọ lẹ ne Solomọn, ọ keghi ke Igipt gha dee.

³ Ivbi Izrẹl ne odẹ okuọ keghi gie ne a tie ẹre, iran hia keghi bu e Rehoboam ne ọba gha khian, iran tama rẹn wẹẹ,

⁴ “Erha a ighẹ Solomọn, obọ dan ọre ọ ya mu ima, ọ na kun ihẹ ne ọ khua ye ima uhunmwu. A deghẹ u gie ihẹ na hogha sẹ ọnii, u na gie egbe rọkhọ ima sayọ, ma gha ye ekhọe ẹmwata ga a.”

⁵ Rẹn keghi wanniẹn wẹẹ, “Wa dọlegbe gha dee irakhuẹ ne I rhie ẹwanniẹn ne uwa.” Ẹre iran na kpao.

⁶ E Rehoboam keghi do mu iro na vba avbe eniwanrẹn ni gha gu erha ẹe zẹ iro ighẹ Solomọn. “Vbe uwa yayi ighẹ ọ kere ni zẹ wanniẹn iran na?”

⁷ Iran wanniẹn wẹẹ, “A deghẹ u ho ne u gele ga iran na ẹse, rhie ewanniẹn ne ọ rhiẹnrhiẹn ne iran, iran gha vbe gha ye ekhọe hia ga uwẹ.”

⁸ Sokpan, e Rehoboam ma rhie iro ne iran zẹe, sokpan, ọ keghi bu iran ni gu ẹe zẹ iro, iran ne irẹn vbe iran koko wanrre.

⁹ Ọ keghi nọ iran wẹẹ, “De emwi ne uwa yayi ighẹ ọ kere ne I ru? De ewanniẹn ne I gha rhie ne iran ni khare wẹ ne I gie ihẹ iran hogha sẹ vbene ọ ye?”

¹⁰ Iran wanniẹn tama rẹn wẹẹ, “Vbene u gha tama iran ọna khin, ‘Ikpi-nhianbọ mwẹ nekherhe mwẹ imi sẹ ẹkun erha mwẹ!’

¹¹ A deghẹ ihẹ ne erha mwẹ mu ne uwa te khua, ọghomwẹ gha ye khua sẹ, asan ọ re ọ ya gbele uwa, sokpan ekoboko ọre I ra ya lọkọ uwa!”

¹² Ikpẹdẹ eha ghi gberra nẹ, e Jeroboam kevbe ivbi Izrẹl keghi bu e Rehoboam ne ọba gha dee zẹ vbene ọ tama iran,

¹³ ọ keghi zẹ ọkpọrhọ ma iran. Ọ mu iro ne avbe ediọn gu ẹe zẹ fua, ọ keghi zẹ ẹmwẹ wanniẹn iran,

¹⁴ zẹ vbene avbe igbama tama rẹn wẹẹ, “A deghẹ te ihẹ erha mwẹ gele gha khua, ọghomwẹ gha khua sẹẹ. Asan ọ re ọ ya gbele uwa, sokpan ekoboko I ra ya lọkọ uwa!”

¹⁵ Vbe ẹmwata, e Nọyaẹnmwa ọ re ọ ru ẹe ne ọ ma na danmwehọ iran, ne ọ miẹn ehe na sẹ ighẹ eyan ne ọ la unu Ahija ne akhasẹ ne ovbi e Silo yan ma e Jeroboam.

¹⁶ Emwa ni ghi rẹn nẹ wẹ ọba i ra zẹ ye iran re. Iran keghi datu wẹẹ, “De ne ọ kan mwa vbe ẹmwẹ Devid yi! Ugbẹn ne ọ mu ovbi e Jese, ma mu mwa. Ivbi Izrẹl, edọmwadẹ ọghọe gha rrie owa ẹre. Ghe owa e Devid ne erha ne u tọn mu.” Ẹre emwa Izrẹl na sọtẹ,

¹⁷ iran na sẹ Rehoboam rae ne ọ gha khaemwisẹ yan emwa ni rre otọ e Juda.

¹⁸ E Rehoboam keghi gie Adoniram ne ọ gbearoghe iwinna ne a ye ẹtin mu emwa winna, gie ivbi Izrẹl, sokpan ivbi Izrẹl keghi filo okuta gbe ẹe rua. E Rehoboam ghi miẹn ọna ọ keghi zẹgiẹgiẹ deyan ikẹkẹ okuo ẹre, ọ na gha rrie Jerusalẹm.

¹⁹ Wa ke ẹghẹ nii gha dee, ivbi Izrẹl ni rre odẹ okuọ ọghe otọe Izrẹl keghi khian emwa ni sọtẹ uniẹn arriọba e Devid.

²⁰ Ugbẹn vbe ivbi Izrẹl ghi họn ighẹ e Jeroboam werriegbe ke Igipt rre nẹ, iran keghi tie ẹre gha die iko ẹvbo, iran na ya ẹe ma ọba Izrẹl. Ewae ọghe Juda ọkpa ọre ọ ghi gha ga ivbi e Devid.

E Siemaia Ne Akhasẹ

²¹ E Rehoboam ghi sẹ Jerusalẹm, ọ keghi si arhumwu arriaisẹn iyihinrin (180,000) koko ke ẹwae Juda kevbe Bẹnjamin gha dee, ne iran do ya gbinna, kevbe ne iran viọ ivbi Izrẹl ni rre odẹ okuọ werriegbe rri ototọ irẹn.

²² Sokpan, Osanobua keghi tama e Siemaia ne akhasẹ wẹ,

²³ ne ọ bu e Rehoboam ọba e Juda gha khian ya tama rẹn ke ẹe kevbe emwa ni rre ẹwae Juda kevbe Bẹnjamin wẹ,

²⁴ e Nọyaẹnmwa khare wẹẹ, “Wa ghẹ gu etẹn uwa ne ivbi Izrẹl gbinna. Dọmwadẹ ọghọe gha rrie owa rhunmwuda emwi ne ọ sunu na, obọ mwẹ ọ re ọ ke rre.” Iran hia keghi họn ẹmwẹ e Nọyaẹnmwa, iran na werriegbe gha rrie owa.

E Jeroboam Fi Iyeke Gbe Osanobua

²⁵ E Jeroboam ne ọba Izrẹl keghi gbe ekẹn ga e Siẹkẹm kevbe ẹvbo Ifreim ne uhunmwu oke, ọ na ya gbe ẹghẹ eso vbe evba. Ọ keghi vbe kpao, ọ na ya gbe ekẹn gaa e Pẹnuẹl.

^26-27 Ọ keghi gu egbe ẹre zẹ iro wẹẹ, “Vbene emwi ye na, a deghẹ emwa mwẹ yo e Jerusalẹm ya zọ ese vbe evba ghe Nọyaẹnmwa vbe uwu Ọgua Osa iran ghi dọlegbe kie bu e Rehoboam ne ọba gha khian, iran ghi gbe mwẹ uan.”

²⁸ Ọ ghi roro ẹe nẹ, ọ keghi do mannọ ẹmila ọwẹe igoru eva, ọ na tama emwa rẹn wẹẹ, “Ọ kpẹre ne uwa kegha yo e Jerusalẹm ya gha ga. Ivbi Izrẹl, wa ghe avbe ẹbọ uwa ne ọ viọ uwa ke otọe Igipt ladian!”

²⁹ Ọ keghi mu ọkpa vbe ẹmila igoru ni ye Bẹtẹl, ọ keghi mu e nọkpa ye Dan.

³⁰ Erriọ ọre emwa ni na ru orukhọ vbekpa ne iran na ya gha ga vbe Bẹtẹl kevbe Dan.

³¹ E Jeroboam kevbe bọlọ owa ugamwẹ lele oke ni bun, ọ keghi vbe zẹ avbe ohẹn ne a miẹn wẹ iran i re uniẹn e Livai.

A Wẹ Ẹ I Maa Ne A Na Ga Vbe Bẹtẹl

³² E Jeroboam keghi vbe mu emwiukpo ugamwẹ gbọọ ye ikpẹdẹ ekesugie ọghe uki ne ogierẹnrẹn vbe Bẹtẹl zẹ vbene ọ vbe ye vbe Juda, ọ keghi ya zọ ese vbe aka ni rre Bẹtẹl ghe avbe ẹmila igoru ne ọ ru. Ọ keghi viọ avbe ohẹn ne irẹn ma ẹẹn yọ vbe Bẹtẹl.

³³ Ọ ghi sẹ ikpẹdẹ ekesugie ọghe uki ne ogiẹrẹnrẹn, vbe ẹdẹ ne irẹn bu ẹre yi, ọ kegha rrie Bẹtẹl ọ na ya ru emwiukpo ne irẹn tobọ ẹre mu gbọọ ne ivbi Izrẹl vbene irẹn na zọ ese vbe aka ni.