I Ọba 11 - Edo Bible (E Baibol Ẹdo) Version 1996

E Solomọn Fi Iyeke Gbe Osanobua

¹ E Solomọn kegha ho ẹmwẹ ikhuo eghọẹn ni bun. Ye vbe gberra ovbi ọba Igipt, ọ kevbe viọ ikhuo e Hiti, e Moab, Amọn, Idọm kevbe Saidọn.

² Ọ keghi viọ ehia rọnmwẹ, vberriọ, e Nọyaẹnmwa ta ẹe wẹ ne ivbi Izrẹl ghẹ rhie okhuo vbe ivbi iran na, rhunmwuda, iran gha ru ẹe ne ivbi Izrẹl do gha ga ẹbọ ọvbehe.

³ E Solomọn keghi viọ ikhuo ni re ivbiọba iyisẹn yan arria eha (700) rọnmwẹ. Ọ keghi vbe zẹlẹ ọse iyisẹn yan uri (300). Iran keghi ya ẹe fi iyeke gbe Osanobua,

⁴ ọ ghi khian ọmaẹn nẹ, iran keghi si ẹe la ẹbọ ẹrrẹ ne a gho, ọ ma ghi ye ekhọe lele Nọyaẹnmwa Osanobua ẹre zẹ vbene Devid ne erha ẹe gha ye.

⁵ Ọ kegha gho Astat ne ẹbọ ne okhuo ọghe Saidọn kevbe Milkọm ne ẹbọ emwiekhue ọghe Amọn.

⁶ Ọ keghi ru orukhọ ghe Nọyaẹnmwa, ọ ma ghi rhie ekhọe lele ẹe zẹẹ vbene Devid ne erha ẹe gha ye.

⁷ Ọ keghi bọ ehe ne a na gho Kiẹmọs ne ẹbọ emwiekhue Moab ye odẹ ahọ e Jerusalẹm kevbe ehe ne a na gho e Milkọm ne ẹbọ emwiekhue Amọn.

⁸ Ọ keghi vbe bọlọ ehe ọkpa ne avbe amwẹ ọnrẹn hia gha na sẹtin gha giẹn eturari ne avbe ẹbọ ughughan ọghe iran.

^9-10 A gha rhe miẹn wẹ igba eva ọ re Nọyaẹnmwa Osanobua Izrẹl rhie egbe maa e Solomọn, ọ na tama rẹn wẹ ne ọ ghẹ gho ẹbọ eghọẹn, e Solomọn ma họn ẹmwẹ e Nọyaẹnmwa, sokpan ọ keghi fi iyeke gbe ẹe, rhunmwuda ọnii, ohu e Solomọn keghi mu e Nọyaẹnmwa.

¹¹ Ọ na tama rẹn wẹẹ, “Rhunmwuda ighẹ te uwa yan ru ẹe ne u rhia ile ne ima gba ta, u na rra iyi mwẹ, I yan rẹn wẹ I gha miẹn ruẹn arriọba nii, I ghi mu ne ọkpa vbe uwu iran ni winna ne uẹn.

¹² Sokpan, rhunmwuda e Devid ne erha a, mẹ i ra ru emwi na vbe ẹghẹ ruẹ sokpan, ẹghẹ ne ovbi uẹ gha na rriọba.

¹³ I i ra wa vbe miẹn ẹre arriọba nii hia, sokpan, I gha sẹ ẹwae ọkpa rae ne ẹẹn rhunmwuda e Devid ne ọguọmwadia mwẹ kevbe rhunmwuda e Jerusalẹm ne ẹvbo ne I ya khian ọghomwẹ.”

Eghian E Solomọn

¹⁴ Ẹre Nọyaẹnmwa na ru ẹe ne Hadad ne ọ ke ẹgbẹe ọba ọghe Idọm rre, sọtẹ e Solomọn.

^15-16 Vbe ẹghẹ ne ọ kpee fua de yi, vbe ẹghẹ ne Devid na khọn Idọm, e Joab ne ọkaokuo ẹre kegha rrie evba ne ọ ya tọnnọ avbe orinmwi ye otọ. Rẹn kevbe emwa rẹn keghi gbe uki ehan vbe Idọm, vbe uwu ẹghẹ na, iran keghi gbele avbe ikpia hia ni rre Idọm.

¹⁷ Sokpan e Hadad kevbe ivbi Idọm ni gha re eguọmwadia erha ẹe keghi lẹ gha rrie Igipt. Vbe ẹghẹ ne a kha na ọvbokhan kherhe ọre Hadad gha khin.

¹⁸ E Midian iran ke kpao, iran na gha rrie Paran, emwa ọvbehe eso keghi vbe deba iran vbe evba, ẹre iran ghi na gha rrie Igipt. Iran keghi bu ọba gha khian, ọnii na mu otọe eso ne Hadad, deba owa ọkpa ọ na vbe gha rhie evbare ne ẹẹn.

¹⁹ E Hadad keghi ru emwi ne ọ ya ọba khian ọsiọre, ọre ọba na rhie ọtẹn amwẹ ọnrẹn ne okhuo, ọtẹn Tapenes ne Oloi, ne Hadad rhie rọnmwẹ.

²⁰ Ọ keghi biẹ ọmọ okpia ọkpa ne ẹẹn, a na he ẹre Genubat. Amwẹ ọba keghi kokẹe vbe uwu ẹguae, ehe ne ọmọ nii vbe ivbiọba gba gha ye.

²¹ E Hadad ghi họn vbe Igipt wẹ e Devid wu, kevbe wẹ e Joab ne ọka ivbi iyokuo vbe wu, e Hadad keghi tama ọba wẹẹ, “Gun mwẹ werriegbe gha rrie ẹvbo mwẹ.”

²² Ọba keghi nọ rẹn wẹẹ, “Vbọzẹ, I ma ru ne uẹn sẹ ra? Ọnii ọ si ẹe ne u na ho ne u dọlegbe gha rrie owa ra?” E Hadad keghi wanniẹn ọba ẹmwẹ wẹẹ, “Hẹko gunmwẹ gha khian.” E Hadad keghi wa gha re oghian dan ọghe Izrẹl zẹ vbene ọba Idọm vbe ye.

²³ Osanobua keghi vbe ru ẹe ne Rezọn ne ovbi Eliada sọtẹ e Solomọn. E Rezọn na, te ọ lẹ fua vbe ehe ne Hadadeza ne ọba e Zọba, ne arowa ẹre ye.

²⁴ Rẹn keghi do khian ọkaolotu avbe ikpata eso (Emwi na keghi sunu vbe Devid khọn Hadadeza miotọ nẹ ne ọ na vbe gbele avbe ọba ẹ Siria ni ga gie ẹe.) E Rezọn kevbe emwa rẹn kegha rre Damaskọs, emwa rẹn na ya ẹe ma ọba e Siria.

²⁵ Rẹn keghi vbe gha re oghian Izrẹl vbe ẹghẹ ne Solomọn na gha rre agbọn.

Emwi Ne Osa Ve Jeroboam Re

²⁶ Ọmwa ọvbehe ne ọ ghi vbe sọtẹ e Solomọn kegha re ọkpa vbe uwu emwa iwinna rẹn ne a tie ẹre Jeroboam ne ovbi e Nebat ne ọ ke Zareda ne otọ Ifreim rre. Iye ẹe kegha re okpokhuo ne ọ dẹgbẹ, a tie ẹre Zẹrua.

²⁷ Vbene nene isọtẹ ya yobọ ye otọ hẹ ọre ọna khin. E Solomọn kegha ran avbe uye ni rre odẹ ahọ ọghe Jerusalẹm, ọ na vbe gha rhie te ekẹn ne a gbe lẹga ẹvbo nii.

²⁸ E Jeroboam kegha re ọmọ ne ọ mwẹ ẹtin iwinna, e Solomọn ghi miẹn vbene ọ winna hẹ, ọ na ya ẹe ru ne ọ gbearoghe iwinna ne a ya ẹtin mu emwa winna vbe ẹwae Manasẹ kevbe Ifreim.

²⁹ Ẹdẹ ikẹtin vbe Jeroboam ke Jerusalẹm rrie ehe. Ahija ne akhasẹ ne ovbi Silo keghi do khian dekun ẹnrẹn vbe odẹ, rẹn ọkpa vbe ẹhi ẹre vbe oha.

³⁰ Ẹwu ọgbọn ọre Ahija yọe. Ọ keghi kie ẹre, ọ na sọ ẹre ye ihe iweva,

³¹ ọ na tama Jeroboam wẹẹ, “Viọ oyọnmwẹ igbe vbọ ne eni gha re ọghuẹ, rhunmwuda, e Nọyaẹnmwa ne Osanobua ọghe Izrẹl tama ruẹn wẹẹ, ‘I khian miẹn Solomọn arriọba nii, I gha viọ ẹwae igbe ne uẹn.

³² E Solomọn ghi gha mwẹ ọkpa rhunmwuda e Devid ne ọguọmwadia mwẹ kevbe Jerusalẹm ẹvbo ne imẹ zẹe vbe otọe Izrẹl hia ne ọ gha re ọghomwẹ.

³³ I gha ru emwi na rhunmwuda, e Solomọn fi iyeke gbe mwẹ, ọ keghi ya gha gho Astat ne ẹbọ ne okhuo ọghe Saidọn e Kemọs ne ẹbọ ọghe Moab, kevbe Milkọm ne ẹbọ ọghe Amọn. E Solomọn ma họn ẹmwẹ mẹ, ọ de iyi, ọ ma rhie uhi mwẹ kevbe ilele mwẹ mwẹ zẹ vbene Devid ne erha ẹe ru.

³⁴ Sokpan I i ra wa miẹn e Solomọn otọ arriọba ni hia, I gha yevbe gie ẹe gha rre ukpo vbe ẹdẹ ne ọ gha ya vbe agbọn hia, rhunmwuda e Devid, ọmwa ne imẹ hannọ zẹ kevbe ọmwa ne ọ rhie uhi kevbe ilele mwẹ mwẹ.

³⁵ I gha miẹn ovbi e Solomọn arriọba nii, I ghi viọ ẹwae igbe ne uẹn.

³⁶ I gha sẹ ẹwae ọkpa rae ne ovbi e Solomọn ne a miẹn ehe na miẹn wẹ ẹ i mwẹ ovbi e Devid ne ọguọmwadia mwẹ ma gha khaemwisẹ vbe Jerusalẹm ne ẹvbo ne I mẹ zẹe kevbe ehe ne a na ga mwẹ.

³⁷ I gha ma uwẹ ne Jeroboam ọba Izrẹl, u ghi vbe gha khaemwisẹ yan otọe hia ne ọ yẹ ruẹ.

³⁸ A deghẹ u họn ẹmwẹ mẹ, u na ya uhi mwẹ gha ru emwi, I na so igiẹ ye ẹmwẹ uyinmwẹ ruẹn vbekpa ne u na ru vbene I kha re, zẹ vbene Devid ne ọguọmwadia mwẹ ru, I gha yaba ruẹ vbe ẹghẹ hia. I gha ya a ma ọba Izrẹl, I ghi vbe miẹn wẹ ivbi uẹ ọ re ọ khian vbe gha khaemwisẹ vbe iyeke uwẹ, zẹ vbene I ru ne Devid.

³⁹ Rhunmwuda orukhọ e Solomọn, I gha rri ivbi e Devid oya, sokpan, ẹ i ra gha re rhinrin ẹdẹ.’ ”

⁴⁰ Rhunmwuda ọnii, e Solomọn keghi te gha ho ne ọ gbe Jeroboam rua, sokpan, rẹn keghi lẹ gha rrie ọghe Sisiak ne ọba Igipt, ọ na gha rre odọ e Solomọn te do wu.

Uwu E Solomọn

⁴¹ Emwi hia ne Solomọn ru, iwinna ne ọ winnaẹn kevbe ẹwaẹn rẹn, a gbẹnnẹ ehia ye Ebe Okha e Solomọn.

⁴² Rẹn rriọba vbe Jerusalẹm yan ivbi Izrẹl hia vbe ukpo iyeva.

⁴³ Ọ ghi wu, a na re ẹre ye Ẹvbo e Devid. E Rehoboam ne ovbi ẹre keghi rriọba lele ẹe.