I Ọba 10 - Edo Bible (E Baibol Ẹdo) Version 1996

Otuẹ Ne Ọba Okhuo Siẹba Mu Rre

¹ Ọba okhuo e Siẹba keghi họn otiti e Solomọn, ọ na gha rrie Jerusalẹm ne ọ mu ibo gie ẹe san.

² Ọ keghi rre ke irẹn kevbe eguọmwadia ni bun, deba avbe ekẹtẹkẹtẹ ne a kun emwi ni winhin yan, kevbe igoru ọrhẹnrhẹn. Iran ghi vba egbe, okhuo nii keghi nọ rẹn ọta ni bun ni lọghọ ne ọ ghi ye rre hia.

³ Rẹn keghi rhie ewanniẹn ye ọre ehia; a ma miẹn emwi ọkpa ne ọ lọghọ gbe ne ọ ma gie ẹe rhie ewanniẹn yi ne ẹẹn.

⁴ Ẹmwẹ ẹwaẹn ẹnrẹn nọkhua keghi wa la okhuo nii aro, deba ẹguae ne ọ bọe,

⁵ evbare ne ọ mu ye otọ, kevbe ewọe ni winna vbe ẹguae ẹre, owa esiesi ne ọ bọlọe ne emwa iwinna rẹn, iguemwi kevbe ukpọn esiesi ne eguọmwadia ẹre hẹ ye egbe, iran ni sa ayọn ne ẹẹn kevbe ese ne ọ zọ vbe Ọgua Osa. Ose avbe emwi na hia keghi gbe okhuo nii fi otọ.

⁶ Rẹn keghi tama e Solomọn wẹẹ, “Ẹmwẹ ne I họẹn vbe ẹvbo mwẹ vbe ekpa ruẹ kevbe ẹwaẹn ruẹn, ẹmwata nọ.

⁷ Sokpan, I ma ya ẹe yi I te rre do tobọ mwẹ ye aro mwẹ miẹn ọẹn. Sokpan, I ma kue họn sẹ ukhiọnmwẹ ọnrẹn, ẹwaẹn kevbe ẹfe ruẹ sẹẹ vbene a ta ma mwẹ ẹsẹse.

⁸ U miẹn uhunmwu esi ne ikhuo ne u viọre mwẹ! U miẹn uhunmwu esi ne iran mwẹ ighẹ avbe eguọmwadia ruẹ ni mudia ke uẹ ne iran gha họn ẹmwẹ ẹwaẹn ne u ta vbe ẹghẹ hia.

⁹ Urhomwẹ nọ ne Nọyaẹnmwa Osanobua ruẹ. Ọ wa rhie maa vbene ẹmwẹ ruẹn ye ọre hẹ, ne ọ na ya a ma ọba, ne u gha ye ẹmwata kevbe a i ghe ikpanro khaemwisẹ.”

¹⁰ Ẹre ọba okhuo e Siẹba na viọ igoru ne ọ sẹ omwa etọni isẹn ne Solomọn, deba emwi ni winhin kevbe ikpẹrọnmwọ. Emwi ni winhin ne ọ viọ ne ẹẹn, ọrọre ne ọ he bun sẹ ne ọ he ka miẹn ẹdẹ ẹsẹse.

¹¹ (Ye vbe deba ena hia, ọgbagba okọ ọghe Hiram ne ọ ya viọ igoru ke Ọfii rre kevbe viọ avbe erhan ni mose kevbe ikpẹrọnmwọ rre ba ẹre.

¹² E Solomọn keghi ya avbe erhan na ru emwi ne a viọ obọ yan vbe Ọgua Osa kevbe ẹguae. Ọ kevbe ya ẹe ru akpata kevbe ẹzi kẹn ne iran ni kpe emaba. Ena kegha re erhan ni mose sẹ ne a he viọ la otọ Izrẹl; a ma ghi vbe dọlegbe miẹn egbọre ke ẹghẹ nii gha dee.)

¹³ E Solomọn ne ọba keghi viọ emwi hia ne okhuo nii nọ rẹn ne ẹẹn deba emwi ne a ya mu ọghọ ye ọmwa egbe ne ọ wa ye azemwiobọ viọ ne ẹẹn. Ẹre okhuo nii kevbe avbe eguọmwadia ẹre na werriegbe gha rrie Siẹba.

Ẹfe Ọghe Solomọn

¹⁴ Ukpukpo ọre Solomọn ne ọba ya miẹn etọni igoru ne ọ gberra isẹn yan ugie.

¹⁵ Ọna kegha re ne ọ deyan emwi ne ọ miẹn vbe igho uhunmwu ne ọ fian ne iran ni do ẹki, ere ne ọ miẹn vbe ẹki kevbe emwi ne avbe ọba Arebia ya mu ohan kevbe avbe ogie isi ni rre otọe Izrẹl.

¹⁶ E Solomọn keghi ru asa nekhua uri, ọ na ya igoru ne ọ sẹ uwan ekesugie rhu ọkpọkpa vbọ.

¹⁷ Ọ kevbe ru asa iyisẹn yan uri (300) ne giẹrẹ ọvbehe, ọ na vbe ya igoru ne ọ gha sẹ uwan enẹ rhu ọkpọkpa vbọ. Ọ na wẹ ne a viọ ena hia ye Ugha Ẹgbo e Lebanọn.

¹⁸ Ọ kevbe ru ẹkete nọkhua ne ọ ye akọn eni kevbe igoru ne ọ mose sẹẹ rhu.

^19-20 Ikpawẹ ehan ọre a nana ya gha sẹ nene ẹkete. Vbene amazẹ oduma na rre obọ eva ọghe ikpawẹ nii, ehia kegha re oduma iweva. Amazẹ uhunmwu ẹkhuia ẹmila kegha rre odieke nene ẹkete, amazẹ oduma kevbe gha rre ọkpẹn ehe ne a viọ obọ yan vbọ. Ọba ọvbehe ne ọ he gha mwẹ ẹkete ne ọ ye vbenian, ẹ i rrọ.

²¹ Igoru ọre a ya ru ukpu hia ne Solomọn ya wọn amẹ, kevbe avbe emwi na lo ni rre Ugha Ẹgbo e Lebanọn hia. A ma lo e siliva, rhunmwuda, vbe ẹghẹ ọghe Solomọn, a ma ka ẹe ye emwi rhọkpa.

²² Ọ keghi vbe gha mwẹ ọgbagba okọ ne ọ lele ọgbagba okọ ọghe Hiram ye uwu ẹzẹ. Ukpo eheha ọre avbe okọ ẹre ya dunmwu, iran ghi viọ igoru rre kevbe esiliva, akọn eni ọsa kevbe emẹ.

²³ E Solomọn ne ọba keghi gue ẹwaẹn, ọ keghi vbe fe sẹ avbe ọba nekpa hia.

²⁴ Uhunmwu otọ agbọn hia keghi ho ne iran rre do gha họn ẹmwẹ ẹwaẹn ne Osanobua ya wẹẹ.

²⁵ Emwa ni rre hia ghi gha ha oko gie ẹe, avbe esiliva, igoru, ẹwu, emwi igbinna, emwi ni winhin, ẹsin kevbe ekẹtẹkẹtẹ. Erriọ ọ re ọ wa gha ye ke ukpo dinna ukpo.

²⁶ E Solomọn kegha mwẹ ivbi iyokuo ne ikẹkẹ okuo arria ihinrọn (1,400) ye, kevbe ẹsin arriaisẹn iweva (12,000), a keghi viọ eso vbọ ye ẹvbo ẹre, ọvbehe vbe ikẹkẹ okuo nii, ni dekẹe kegha re ne irẹn wa tobọ ẹre kha yan vbe Jerusalẹm.

²⁷ Vbe ẹghẹ ọre, esiliva keghi kpọ vbe Jerusalẹm zẹ vbene okuta wa ye vbọ, erhan sida keghi kpọkua vbene erhan sikamọ ye vbe ototọ oke Juda.

²⁸ Ewọe ọba ọ re ọ gha gbearoghe avbe ẹsin ne a viọ ke Musri kevbe e Silisia rre,

²⁹ kevbe avbe ikẹkẹ okuo ne a hẹ ke Igipt rre. Iran ọ re ọ gha viọ ikẹkẹ okuo kevbe ẹsin giẹ avbe ọba e Hiti kevbe Siria. Iran kegha khiẹn ikẹkẹ okuo esiliva uri eha (600) kevbe ẹsin esiliva igbe yan iki-ọkhọe (150).